Zomi Nam Ni Thupuak

-- gendan tuam deuh in --

PASIAN in A Pasian Hihna a A Kiveinatna Pasian lak a i phuullouh leiba uh ahi.

Pasian in Amah lungkimsak ding a  a bawl leitung mihingte'n, Amah nusia in Amah theiphalou bang in omta chih A theih man in, Amah a ding in minam khat bawl a, tua minam pen nam dangte kiang a Amah theihpihtu a pang a, tuachi-a mi zousiah in Amah a biakna ding in, chih ngaihsutna a neih man in leitung ah minam a phutkhia hi. Deut. 7:6-7. (Nang leh kei zong minam khat i hih uh leh, Pasian lak ah phuullouh leiba i nei uh hi).

Mihing leh ganhingte a chii-chii, leh a nam-nam a khen Pasian ahi. Gen. 1:25; 11:9 (Kikhenna tungtawn a Pasian thupina kilatnate ngaihtuah in).

Pasian in a chii-chii, a nam-nam a a khen mihingte'n, ama'uh chii leh nam chiat, ama'uhte bawlpa sâng in a ngaihsak zaw uh hi, chih a mu a, tualeh a Pasian limsaklouhna un ama'uhte khelhna ah a kailut a, tatna lou a hitheilou ahita uh chih a muhtak in, JESU KHRIST mihingte tatna ding in a hung pia hi. Hilezong mihingte i khial lai veve uh hi. (Paisian lak a i phuulloub beila bat uh, a dinkhiat diing dan ngaihtuah ni.)

Tangtawn a omden ding nna leitung mihing in a kibawl theikei chih i na zâk ngai ding uh ka gingta hi. Leitung a mang ding a tualeh a sung a om zousiah zong a mang ding hi, chih laisiangthou a pan in i muthei uh hi. Hilezong tangtawn tan a omden ding khat a om a, tua pen BIAKNA ahi.  Pasian pen tangtawnpa ahi a, Amah a om laisiah Biakna in zong beini nei ngailou ding hi. Hih biakna pen leitung i damlai ua i bawl ding uh leh tangtawn dong a i bawl touhzel ding uh ahi a, leitung mihing zousiah tung a Pasian kinepna zong ahi. (Pasian lak a na phuullouh beiba bang na chi dit sawm a?) Tuaziak in, Pasian in A Pasian Hihna A Kiveinatna pen Amah Biakna mi zousiah in a piakna ding uh ahih man in, Pasian Kiveinatna ah eite kilamthak ni.

Pasian tangtawn Pasian ahi a, Amah a om laisiah Amah BIAKNA in beini a neikei ding hi.

By:-

Pastor Thangdoulal Suantak

Thangkhal Bible Old Testament Translator

Share: