LM Khaute workers meet om, Election tuhding ahihdan puangkhia

Tuni 14 December 2021 zinglam dak 11:30 in VPC hall, Bethel Veng ah LM Khaute workers meet zang uhi. Huai hunzatna M Luahkhanchin in makaih in, Upa Thangkhankap in thumna in pan a, Upa K. Paukhansuan in keynote address genna nei hi.  Hunzat sung in Hausa tuamtuam leh makai tuamtuam in thugen uh a LM Khaute Ex DGP & Intending Candidate 58 Ccpur AC in leng thugenna nei hi. LM Khaute in huai hun a a genna ah hun paisa in mipi a ding a nasem dia kipekhia ahihdan ana gen khe ngeita mahle tu in a sepna apan Voluntary pension la zen a hong kipe khe taktak ta ahihman in, maban ah Election om ding ah mi palai khat hihsawm a MLA dia contest ding ahihdan puang hi.  Nam leh gam ngaihnatna pen mipite a hidan a gen in, mipi palai ding a hong kipiakkhiakna tawh kisai a genna ah a khankhiakna leh a pianna mun Lamka pen a ngaihnat ziak ahihdan gen in, a sung ah nam tuamtuam I tenkhawm na tak ua ngaina ahihdan gen in, SP Honghih lai apan 3 Bills tan in tuni tan in I lak ah lemna leh muanna hong om theihna ding a panla den ahihdan gen kawm in, tu in leng a vision pen khat leh khat kal a kilemna om a, khekhat a luankhawm ding chih ahi chi hi. Development tawh kisai in Central Govt mawhpuakna hi a, himahleh Local Area Development pen bialtu MLA mawhpuakna ahi chi a, Pathian ziak a mipi palai dia telching ahihleh mipi tanding a hongpai development peuhmah mipi a hisak vekding leh Fund himhim ahiding bangtak a paisak hiding chin gen hi. Thilteng nam tuamtuam kitengkhawm himahleh sep leh bawl ah kuamah khentuam lou a, eite ngen hiding ihi uh chikawm in, khentuamna omlou a semkhawm ding ihi uh chi hi. Kidemna leh kigensiatna tamtak hong om mahleh thuthang tuamtuam te I taksang louh ua, I vek ua pangkhawm a gam leh nam bawlhoihna ah pangkhawm le hon gensetute'n hon zoulou ding uh ahihdan gen in, pangkhawm ni chi hi.  Churachandpur District SP aahihlai in gamsung buaina ziak in khentuamna omlou in, Citizens welfare Association kichi hihhat a om in, kipumkhatna ding in leng lam tuamtuam ah pan naktak in la a, huai hunlai a SP maimai himahleh tu in MLA hong hileh platform lianzaw tham a mite angvan leh panla thei ding ahihman in MLA hileh a hihtheih ding lianzaw a, huaiziak a leng MLA tuhsawm ahihdan gen hi.  Anti Tribal Bill ziak a buaina nasatak omlai in, ni 600 val siluang om pen naktak a a panlak nung a koihkhiak theih a om ahihdan gen a, amah panlakna ziak in JAC leh makai tuamtuam tawh hiamkham bawl a hong om in, buaina hong vengthei chi hi. Final Solution tan ah CM Biren tawh amah panlakna ziak a siluang 9 leng vui a om thei ahi chi a, hiai tungtang ah debate ut omleh leng mansa ahihdan gen hi. District sung a teng Community teng in lungsim munkhat pukawm in panla khawmni chi a, huai hileh kingaihnatna tawh I gam pen kibawlhoih in kipuahpha theiding chi hi. Aman a genzelna ah genthei leh tagahte kankuah a nasem ding a kipia ahihdan genkawm in,  khamtheih zongsangte etkolna tawh kisai leng awlmawh huai sa ahihdan gen in, Border Area development bawlkhiak theihna ding a PM Modi kiang a thusun ana bawlkhin ahihdan a gen banah Act East Policy tungtawn a gamsung puahphatna ding a lampi hoih taktak tamkhop om ahihdan leng gen hi.  Maban ah Rail honglut ding a, Lamka tan honglut theihna ding in leng bang lampi om hiam chih ngaihsut poimawh a sakthu gen in, tup tampi nei mahleh huaite lawhching sakthei mipite ahihman un mipi kithutuak a sepkhiak ding omte semkhe sak ding in ngen a, Education leh Health sector ah panlak ding tampi omlai ahihdan gen in, Covid hipi lai in leng mimal ah amah hihtheihna zahzah in panla a, PM Health Card leng District Hospital ah bawltheih mahleh aman a mu dingte innbul mahmah a tutding a deihziak a tuni tan a CCpur District sung a Health card 1000 val bawlsakta ahihdan gen a, MLA khat ihih leh scheme omte Door Delivery I bawl ding hilou ding hiam chi in, mipin a nungthuap nak uleh Govt service a kum taktak semkhinsa ahihna ah Govt scheme hamphat pih theihding tamtak thei ahihman in, huai scheme te a mu theidingte kiang ah ahi bangbang a a muhna ding un panlak hiding chi hi. Huntawp ah Khatkhotong Baite in kipahthu gen a, Upa Vialkhogen Khaute in thumna a khak in, huai hun a paikhawm teng in annkuang umkhawm uhi. Lallianmang Khaute @ LM Khaute, IPS, Director General of Police (DGP), Manipur in voluntary retirement ngenlou hileh Feb 1, 2022 in pension ding hi. LM Khaute in UPSC saina a Civil Service Exam na ah kum 1985 in Indian Police Service (IPS) ngah a, kum 1996-97 sung in CCpur district ah Superintendent of Police (SP) len a, huai hun sung in khamtheih doudalna lam ah CWA, Philantrophic organisation leh Press tawh pangkhawm in lawhchingtak in thilhoih tamtak semkhia hi. Amah May 5, 1999 in Dy. Inspector General of Police (DIGP) in kaisang a, Sept 17, 2007 in Inspector General of Police (IGP) in kaisang hi. Nasephoih ziak in Nov 15, 2010 in Addl. Director General of Police (ADGP) in kaisang nawn a, Jan 1, 2016 in Police a dinmun sangpen Director General of Police (DGP) in kaisang hi. Aman service a a om sung in nasep hoih leh thil tamtak sepkhiak ziak in award leh pahtakna medal tamtak sang hi. LM Khaute bel official record dungzui in CCpur district sung a Mualkot khua ah Jan 8, 1962 in piang a, a pa Suangkhopau leh anu Kholkhochiin ta 6 te lak a 3na hi a, a zi Niangthiandawi @ Mimi Khaute tawh tapa 2 leh tanu 3 nei uhi. LM Khaute in voluntary retirement a lak nung in Manipur DGP thak ding in P.Doungel guan in om hi.

Share: