PUMPI LEH SAPTUAM OMDAN

"Tu in nou pen Krist pumpi na hi ua, a mimal mal in hiangte na hi uhi" – 1 Kor. 12:27

~ Rev. S. Thangnou

Senior Pastor, TBC (ABA) Delhi

TAKSA pumpi khat ahi a hiang tampi a nei hi. Hiang zousiahte tam mahleh pumpi khat ahi uhi. Tuamah bang in Saptuam sung ah zong hiang tuamtuam a om hi. Khenkhat Executive Committee, Mission Department leh a dang department tuamtuam te ban ah Sub-Committee tuamtuam om hi. Department neuten a lian a ka panlouh Saptuam a om hi keng chiin a tel thei kei hi. Keng in "khut ka hih louh jiak in pumpi ah ka pang kei" chileh hih ziak in pumpi ah pang lou ahithei diai?(1 Kor.12:15). Ka hiang te khat leh khat hihna ki-eng theilou a, Pasian in hiang chinteng pen pha asak bang in pumpi ah a koih hi (1Kor.12:18). Pawlpi sung ah sepna mun penpen Pasian in pha asakna mun hizaw ding hi chi a gelsiam hoih hi.

Tualeh pumpi hiang te khat leh khat kisim moh in kinelhsiah tuam thei lou hi. Mit in "Khut kiang ah bangmah in kung poimoh kei a chi thei kei hi (Kor.12:21). Depart ment hiam, member hiam semtu khat leh khat kipoimoh tuahchiat ahi chih akimuthei hi. Mikhat bek bukimna omthei lou  hi. Tuathamlou in pumpi ah hiang hatlou a kilangte zonga poimoh mahmah hi (1Kor.12:22). Pawlpi sung ah a hatlou a kilang committee om te zong a hatlou hang in apoimoh mahmah khat hi veve uhi. Khat leh khat kingaihsak tuah chiat ding ahi, aziak pen pumpi a kikhenna omlou a kilemkhawmte ahi uhi. Khat sep ding lai vatuh a sukbuai in asemtute di’n lungnop louhna piangsak theizaw hi. Eima gamgi chiangtan theihsiam ding a hoihpen hi.

Tualeh hiang khat in a thuak leh hiang teng teng in a thuakpih zel hi (1Kor.12:26). Etsakna: I khutme khat i satkhak chiang in, khutme bek in thuak lou a, pumpin zong thuak in nasak zou hi. Hih in Saptuam sung ah member khat hiam Department khat in a thuakna pen Saptuam in zong thuakpha hi, pumpi khat ahihziak in. Khat pahtawi a a-om leh hiang dang zousiah in a kipahpih zel uhi. Hibang in khat lohching leh pahtawi a omna in Saptuam sung ah lungdam na tungsak a kilungdam pih hi. Tuaziak in Saptuam i chih Krist pumpi khat a ahi a, kizomkhawm pumpi bang ahi hi. 

==09102022==

Share: