Thu Khen Kei Un Kichi Pen Bang Gen Utna Ahi Diam?

 ~ Dr. Kammuanmung Thangniang

Pro Pastor, TBC (ABA) Delhi

Mathai 7:1 na in, “Thu khen kei un, tuahileh thu khen in na um kei ding uhi” achi hi. A kigelhdan (literal) tak a lading hilei, mi hoihlouhnate gen kei un, nou hoihlouhnate zong midangte’n a hung genlouhna dingun chih hiding hi. Ahi’n, hih bible tang in agensawm pen mi hoihlouhna genlouh ding hilou hi.

Hih bible tang sung mahmah ah zong Jesu’n midangte tung thu khen dingdan gen hi. Zawlnei tak leh taklou a gah in ki theih ding hi chi hi. Zawlnei tak leh taklou itheihna dingin amaute hindan leh gamtatdan i-et ding, thu khen na ibawl ding chih na ahi mai hi (Mathai 7: 15-20). Johan 7: 24 na a Jesu’n hibang in thugen hi, “A kilang bangin thu khen kei unla, diktat takin thu khenzaw un.” Thu khen louh ding hilou in, diktak a khen ding ahizaw hi. Bible mun khat a thu um leh mundang a thu um kikalh ngailou hi. Tuaziak in midangte hoihlouhna gen kei un chihleh gen un chih pen anih in dik thei lou ding hi.  Mathai 7: 1 na in agen pen mi dang tung thu khen louh ding hilouzaw chihna ahi.

Tua ahihtakleh, Mathai in thu khen kei un achih in bang a gen utna hiam chih i enlai ding uhi. Mathai in hih thu agenna pen Sermon on the Mount thugen na ahi. A thugen ahihleh gintute’n gingtu hinkhua Pasian deihna bang a azak ding dan ahi, Pharisaite’ hinkhua zakdan dikloute pansan a agen ahi. Mathai 6 na a Pharisaite ann ngol thumdan, midangte a panpihdan uh, hauhsakna a delhdan uh pasian lunglam hilou ahihdan ana gen hi. Pharisaite buai huai na mahmah ahihleh amau dikpen dan a kikoih in midangte tung thu khen hat mahmah uhi. Amau a bukim (perfect) kisa in, Pasian bang tuk in midangte hoihlouhna gen uhi. Tua ziak in Jesu’n Pharisaite thu khen dan diklou pen Mathai 7: 1 na ah ahung gen ahi.

Tua ahihtakleh, thu khen kei un a chih chiangin, Jesu bang agen-ut na hiding hiam? A gen ut ahihleh hih ahi, Pharisaite bangin kiliansaktak, kidiksaktak, kihoihsaktak in midangte hoihlouh nate gen kei un. Midangte hoihlouhnate itna toh gen ding a, Pasian deihna bang a ahi’n dinguh tupna ahi ding ahi.

I kidiksak a, i kihoihsak chiangin midangte hoihlouhna leh diklouhna muh baihlam mahmah hi. Mi khat hoihlouhna leh diklouhna i gen chiangin, ei kihoihsak ziak, ei kidiksak ziak ahikhak ding lauhuai mahmah hi. Kua hiam khat biakinn kai hatlouhdan igen chiangin, kei amah sangin ka hatzaw vele chih lungsim a ipuak ziak lel hithei hi. Tuachih mahbangin, kua hiam khat hinkhua zakdan hoihloute igen chiangin kei ama sangin ka hoihzaw vele chih ziak lel ana hitheih hi. Midangte tung thu ikhen (judge) chiang a ilungsim puakdan leh ilungsim in atup pen poimoh mahmah hi. Iitna leh a hoihna ding uh tupna ahih ding ahi.

***23102022***

 

 

 

Share: