Tualthat diá muonmaw mi 2 kiman

M. Lal Zou luong toukhie in postmortem bawl

Lamka, October 17: Gousuanlal @ M. Lal Zou s/o (Late) Th angchinkhup of Belpuan, Shingnat Sub-Divishion shina toh kisai a Police te'n ginmaw mi 2 man a, thudohna anei uh tungtawn in road accident zieh a shi hilou a, mikhut lum a shi 'Murder' ma ahi chi chetna ding in tuni'n Shingnat Police panna in Imphal apat Forenshic Team leh JNIMS doctor te'n P. Kamdou Veng Cemetery ah M. Lal Zou luong toukhie in postmortem bawl uhi. 

Postmortem ahileh Video coverage nuoi a bawl ahi'a, Forenshic Team leh JNIMS doctor te'n Postmortem abawl sung un Th angpu Tonshing, OC/ Shingnat PS, UZO GHQ leh UZO nuoi a frontal organization leader te'n zong hanmun ah uop uhi.

M. Lal Zou ahileh apeisa August 14, 2022 zingmawnglam nai 7:00-8:00 kikal in Shingngat hanmual gei ah a shisa in kimukhie a, speed lover mikhat ahina ah mijoushie in gari accident zieh a shi hiding in gingta uhi.

Hinanleh hiamhei a adehkhu kisatna mah muthei ahiban ah hepina bei a kisoisahna hiding a gintat liamna ma tuomtuom atahsa tung a muthei ahina ah meltheilou pawlkhat in atha hiding a gintat ahizieh in UZO GHQ panna in Zou CSOs te'n accident zieh a shi hilou a "well planned murder" ahi chi'n gingmaw in daan leh thupieh enkaitu, law enforcement acency te'n kintah a case investigate bawl a tualthat tute daan toh kituoh a gawtna peding chi'n mawpaina thusuo bawl uhi.

Alangkhat ah M. Lal Zou shina toh kisai a Police te'n Press Release a suona ua Gousuanlal Zou s/o (L) Th angchinkhup of Belpuan Village, Shingngat Sub-Divishion, Churachandpur ahileh aliamna ma thuo joulou in shi (succumbed to his injuries) a, ama shina toh kisai in a innkuonpi te'n koima ginmaw neilou chi'n August 14, 2022 in GD Entry No. 07/SGT-PS/2022 registered bawl uh chi hi. Hinanleh UZO GHQ leh Zou CSOs te apat complaint amu uh toh kituoh in October 4, 2022 in FIR No. 21(10)2022 SGT-PS u/s 302/201/34 IPC registered uh chi hi.

Regular FIR registered bawl ahijou leh Mobile Handset pansan a CDR/ SDR examination hoitah bawl ahijou in M.Lal Zou shina toh kisai a muanmawpipen Chinminthang (27) s/o Khamzakap Manlun of Belpuan Village, Shingngat Sub-Division, Churachandpur thudohna nei ahi'a, tuanah ama'n (Chinminthang) M. Lal Zou toh kitheisiamlouna anei zieh un M. Lal Zou pen singkhuo zang in alu thumvei satsah chi'n kiphuong chi ahi.

Singkhua a alu thumvei a satsah zieh in M. Lal Zou dam joulou a, Shingngat Hanmual gei ah Chinminthang in puo in Gari accident a shi toh kibang ding in midang panpina toh va koi chi'n kiphuong chi ahi. 

Shiltung toh kisai in Police in mi 2 man in tualthattu ding a muanmaw pipen Chinminthang jail ah koi ua, akithuopi mikhat ahileh kum chinglou (juvenile) ahizieh in Juvenile Home ah koi uh chi'n press release in tahlang hi.

~ Zogam Today | 18 Oct 2022

Share: