Zawlneite Hihna Leh Pahtawi Na ~ Rev. S. Thangnou

 Local Pastor, Thangkhal Baptist Church, Delhi

“Tualeh unaute aw Toupa a na lamkaite uleh nou hung hilhtute thei zing un, ... a nasep ziak un amauh thupitak a itna a ngaisang ding in kung ngen hi. Kituak chiat in om un.”  (1 Thess. 5:12, 13)

Pasian nasem i pastorte toh kal theih behlapna ding in point kilawm tamlou:

1. Pastorte mel leh taksa om  dan etlouh ding hoih hi. A hihna uh et ding hizaw hi.

2. Amaute nu leh pa bang  a, it a zahtak ding hi.

3. Sia bang a bawl a, thudok a kihilhsak ding hi.

4. Lawm bang akikhawl a houlimpih ding hi.

5. Inkuanpih bang a huh ding hi.

6. Ta bang a hilh/taihilh ding hi

7. Nidang a Siampute bang hung deihsak te hi ua, gensiat a min daisak louh ding hi.

Matthai 10:41: “Kuapeuh Zawlneite...kipahpih in Zawlnei nuam man a mu ding.....mi diktatte... kipahpih in mi diktat nuam man amu ding.”

 Thukhun Lui hun in Zawlneite tung a thupha bawl te'n thupha tamsem ngah uhi. Tuate:

1. Zarephath khua a meithainu in a neihsun tangbuang sip khat leh sathau themkhat toh Elija a vak a thupha tampi a ngah hi. (1 Kg 17:13)

2. Shunam numeinu in  Elisha zintun jel a, hoihtak in kem a, tapa a neihloh hi. (2 Kg 4:8-17)

3. David in Saul zahtak in Toupa thaunilh chi in a thuk ngam kei a, a damsung gualzohna lianpi a ngah hi. (1 Sam 24:6, 10)

 Thukhun Lui hun in Zawlnei Siampi simmoh te'n samsiatna thuak uhi. Tuate:-

1. Ka sathau nilhte ... ka Zawlneite poi khoih kei un. (1 Kro 16:22)

2. Toupa sathau nilhpa  hamsiatte  thahlup ding in thupia hi. (2 Sam 19:21)

3. Toupa in sathau nilhpa a hundam hi. (Sam 20:6)

4. Pasian sathau nilh Elisha a nuihsan a kou naupang 42 vompi nih in petlum uhi. (2 Kg 2:23, 24)

5. Eli tate in a pa  Siampi nasep simmoh bawl in bawlsia ua, gal sung ah sih loh siang uhi. (1 Sam 4:11)

6. Korah leh a pawlte in Mosi leh Aronte simmoh kha ua, a langpang mi 14950 lei kamkak in valhtum hi. (Numbars 16:1-50)

Nidang in Zawlnei, Siampi te Pasian teel leh sawl ahi ua, “Pasian mipa” chi in zahtak uhi. Pasian apan thupuakte ahi ua, hangsan tak leh diktak in a thupuakte mihing te kiang ah agen uhi. Kuama'n mohsakna nei ngamlou, kawk ngam lou uh hi. Amauh te'n thupha pia thei in zong samsia thei ua, a chih bang un tangtang taktak hi.

Sam 105:15 sung ah “Ka thaunilhte khoih kei unla, Zawlnei te hihna kei un”. “Khoih kei un” chih khiat na pen, nawng kaisak, dong tangsak, mohsak kei un, atung ah khutnga, khutkhial kei un, gensia, khasia sak kei un, zahtak un, mi dang sang in thupi zaw in bawl un chihna hi. Bangchi bang zahtakna leh limbawlna i nei uh hiam? A simmoh a bawlsia kha i omleh nidang a kipan a thuak ngaite thuak na pen a kikhek in a kikhel nai lou ahi hi. Ahihhang amaute hihna kipahpih te'n a nuamman zong mu ding hi.

Toupa’n simtute telsiam ding in thupha hong piata hen!

****06112022****

 

 

Share: