Kaisar kianga Pilat thupuak ~ Thangpi Naulak

Rome gam a uk Kaisar kiangah a kumpi nasem Pilat in Jesu tungtang thu vaihawmna leh singlamteh tunga khai ding tawh kisai thu a puak pen Turkey gam St. Sofia Constantinople Biak Inn sungah a Manuscript om hi. Hih manuscript pen feet 2X4 a za hi in dal 50 bangin sah hi.

Rome gam-uk thunei pen Tiberius Caesar,

A zahtakhuai pen gam-ukpa zahtakna kong pia hi. Zan diak dongin ka ukna gamsung a thupiang lamdang lua ahihmanin laigelhin thukician kong hilh nuam hi. Hih thupiang ten den mah ciangin i gam leh nam paizia hong kilamdangsak kha phial zongin ken lamdangsa lo ding hi ing. A hang pen Pasian ten a thukimpih lam uh ka khuanung theih hi. Juda gama Vallerius Flaceus' dinmun ka luah ni bang hamsiat lawh nuam zaw kik ta ing. A hang pen tua hun pek pan in khamuang leh nuamsa in ka om ngei nawn kei hi.

Praetorium luah dinga Jerusalem ka lut niin annkuang umna thupi tak tawh Galile gam ukte leh Siampi te banah a nasemte ka zon hi. A hun ciangin kuamah hong kilanglo mawk uh hi. Tua pen ka hina thupi simlo leh kumpi zahtaklohna in ka ngaihsun hi.

Ni bangzah hiam khitciang ka lam-et lohpi in Siampipa hong hawh hi. Rome mite kianga om leh amaute laka neek leh dawn pen amau biakna in kham cih gen hi. Ahizongin a gamtat khuaheek ka et ciangin paulap a zong lel hi in ka thei hi. 

A lawp nangin a thugente up sak ding lunggulh mah leng, tualai tak gamuk te pen mipi ten melma zahin ngaihsun uh theihna khat ka nei hi. Tua manin Rome mite hih gama siampi te lakah pilvang dingin theihsak ding kuul kasa hi. Hihna sang leh dinmun hoihzaw a neih theih nang uh ahih naakleh a pianna nu uh zong taisan nuam ding uh hi. Ram uk veve pen Jerusalem zah a uk hak om dingin ka um kei hi. Hun bangtan hiam khat sung pan thuneihna hong sut thei dingin thei ka hihmanin ka khamuang hi. Tuabang thu hong piang ding hi mawk leh, amau mekmit dingin galkap lah hau hetlo ing a. Galkap za, sia za kiim leh ka tha hong dawl galkap za kiim bek ka nei hi. Syria gam vaihawmpa kiangah galkap tamzaw hong piakbeh dingin ka ngen hi. Aman lah a kumpi gam a cingzo ding khawp nangawn galkap a neihlohna thu tawh hong dawng hi. I cinzoh zah val dongah gualzawh sawmna hangin galkap kicinlohna in I kumpi a puksak khak ding lau mah mah ing.

Mipite lak pan ka hih theihzah in kidawm in ka maltat hi. Hih mipi a kiphin nuam mah mahte siampi ten hawlhthawh in buaina a piansak khak ding uh ka lauthawng hi.  Ahizongin ka hih theih bangin hih mite lungsim paizia theih ka sawm tinten hi.

Khualak kam tamtakte laka khat in ka lungsim luah den hi. Galilee khua a tangval khat thuhilhna in mipi te lungsim la peuh mah hi. Tua tangval in Pasian geelsa om bangin Rome kumpi kiangah kiphinna omsak dingin mipite hansuah ci-in kigen hi. Ahizongin ka lungnoplohna sawtlo sungin ka mangngilh thei hi.

Hih Nazareth tangval Jesu pen Judate sangin zong Rome kumpi' lawmhoih hi zaw pian mawk ei. Ni khat Siloe ka khen lian laitak mipi tampi a omkhawm ka mu hi. Ka tel-et ciangin mipi maiah tangval khat singkunga ki-ngawm kawma ding khat in thu-hilh hi. Tuapa Jesu ahihlam miten hong hilh uh hi.

Amah leh a thu-ngaite kibatloh hang bek in zong lungmuan huai lo kasa hi. A sam puang hiuhiau leh a meel mah mah pan zong vantung pana hong kumsuk tawh kibang hi. Kum 30 kiim a pha mi khat ahi hi. Hibang lianga mi siangtho pen ka mu ngei nai kei hi. Amah leh a thugen a ngai khamul vom thiapthuap te pen kituaklo in etlawm hetlo hi.

Ka om lam theih le uh a hun uh buai kha ding ahihmain paisan mai ding hoih kasa zaw hi. Ka secretary nusia in a thu leh late uh limtaka ngaisim dingin thu ka pia hi.

Ka secretary pen Manlius ahi hi. Cataline hong tun  hun ding ngaka Etruria- a om langpang pasal khat ii' tupa ahi hi. Manlius pen Juda gam sunga sawtpi ana om khin ahihmanin mi gamtat khuaheek theisiam leh Hebrew pau zong a siam mah mah khat hi. Ka nasem den khat ahihmanin  ka mung mah mah hi.

Praetorium ka tunkik ciangin Manlius in Silom tuili geia Jesu thuhilhna hong gensawn hi. Jesu lungsim tawng gimna gencian dingin misiamte laigelh muh leh theih ka nei kei hi. A kiphin nuam Juada nam tampite laka khatin Jesu kiangah Kaisar siah piak aman leh man loh dong hi. Jesu in," Pasian nate pasian kiangah pia unla, Kaisar nate kaisar kiangah pia un" ci in dawng hi.

A pil man leh a thuhilhnate hangin Nazareth tangval suahtakna ka pia hi. Ut leeng manin Pontius kiang pan na nawtkhia thei hi. Ahizongin tuabangin gamta leeng Rome kumpi dikna leh mipite tunga hoihnate thudonlo in diklo taka vaihawm ka suak ding hi. Tuabanah hih mipa in thusia piangsak lo hi. Tuamanin hih mipa ka keem zel hi. Tuabanga ka cin leh kep lam aman bel thei vetlo hi. A utbang gena a ut dan a om dingin suahtakna ka pia hi. Mipite maiah thugen in a nungzui ding zong a teel theih nangin phalna ka pia hi. Thukhenten zong a kham ding uh ka phal kei hi. Jeseu thuhilhna ten pi leh pute hunlai peka biakna ngeina te hong kheek leh; Pasian in tuabang a pian ding phal het kei hen,  hi hi tuabang kikhekna hong piang ahihleh Rome kumpi in kiniamkhiat takin a thuhilhnate a theihpih leh a thukimpihman hi lo thei lo ding hi. Kei ka hih leh bel a cinglo leh hehpihhuai pen himah leeng Judaten Pasian makaihna a cih uh Pasian geelna a tangtungsak ka hi ding hi.

Jesu suahtakna kipia ahihmanin Judate hong khanglo uh hi. Tua te pen mi hau  milian te hi lo in mi genthei leh mi zawng te hi zaw hi. Hi e, Jesu in mi genthei liangvaite thudon mahleh  mi hau mi liante phawk khollo hi. Tuamanin Nazareth vangval suahtakna pen kibuaisak lo hi. Jesu in, " No laigelh leh Pharisaite aw, guul suan na hi uh hi" ci-in " Han lui a za kizuut thak na bang uh hi. Mihingte muhna ah na hoih hangun no mau ah sihna om hi" ci hi. Khatvei bang mihau leh aki phasakte taai in, tawm mahleh neihsun sun piak Pasian muhna ah manpha zaw ci hi. Nisimin Prsetorium in Jesu ki heekna thu ngah den hi.

Kamsiatna a tungah a tun ding lam zong miten hong hilh hi. Jesusalem khua ah kamsang kineihte bangzah vei hiam khat denlup in om khin uh a, Kaisar kiangah zong kamtai zel uh cih thu khawng ka thei hi. Tuabangpi mahin ka gamtatzia senate in zong hong thukimpih hi. Parthian kidona a tawp ciangin galkap tamzaw piakbeh dingin hong kamciam uh hi.

Buaina hong om thut hileh a daisakzo ding galkap ka neihlohmanin Praetorium buaisaklo ding leh kumpi milian te gamtat a kuullo dingin ngaihsutna thak ka nei hi. Jesu kiangah laikhak in Praetorium ah hoilmna neia hong hawh dingin ka zon hi. Amah zong hong pai takpi hi. Spanish sisan kihel Rome pasal ka hihmanin launa ka neihloh lam nong theihsa hi. Nazareth tangval hong tun ciangin kumpi kizepna bukim tawh a maiah ka kilatciangin ka khuuk leh khe khauh geugau hi. Vuak ding laua mi gilo a liing keei mah bangin ka khut kisat kauh kauh hi. Amah lah pasal lungnem mah mah khat ahi hi.

Kei lam manawh in hong kalsuan thei hi. Ka kiang nai hong tun ciang dinkhawl hi. "Hong tungta ing" ci ngel in thei ing. Ahizongin kammal khat zong pau khia lo zel hi. Lungsim takpi tawh na muak in limtakin ka en hi. Pasalpha leh Pasian lim natawm a suai siam ten amah bang mi lamdang lim a suaih uh ka mu kha ngei nai kei hi. Amah leh a gamtatzia ah genbaan nang om lo hi. Ahizongin lamdang sa lua ka aw khawng kikheel mang ahihmanin ka van eh ngam kei hi.

A tawpna ciang Jesu ka va ci sam hi. Ka aw pen a si dektak aw bangin ngaihlo hi. "Nazareth Jesu kum 3 sung vilvel na utbang gen thei dingin suahtakna kong pia hi. Ka kisik het kei hi. Na kammal te mi siangthote' kammal mah bang hi. Greek mipil Socrates leh Plato te thu leh la na sim ngei na hiam bel thei het keng. Na thu leh late bel mi pil pen te a' sangin sangin gilzaw hi. Gam-uk pa zong hih thu kitheisak khin hi. Kei, ama' tanga hih gam a uk a sawltak zong tuabang suahtakna na neihmanin ka kipak hi. Na ngah dinga kilawm thu zong ahi hi. Ahizongin na thuhilhna ten na melma te leh thunei pawlkhat khanglosak cih pen na kiangah ip dingin ka ngaihsun kei zaw hi. Tua pen a lamdang zong hi lo hi. Socrates zong amah a hua mah mah om in, tuamanin kithat hi. Nang hanga huatna hong piang pen thuapnih pha hi. Nang leh na thuhilhnate a huat ban uah, suakta taka thuthilh khuan kong piak manin kei natawm hong hua uh hi. Rome kumpi maul eh amau vaihawmna a om theih nanga Hebrew mite kianga thuneihna a piaksa suhsak dinga nang tawh a pangkhawm danin hong ngaihsun uh hi. Kong nget nop pen, thu hong pia ing ci lo ka hi, tuban amaute lak pan paikhia inla, mipite na thuhilhna ah zong pilvang lecin deih ing. Amau ngaihsutna leh lungsim paizia zong theihsawm in zahtak sak in. Tua ahih kei leh na melmaten a zahtakhuaina uh a kisiasak in hong ngawh ding uh a, mipi tampi ten nang hangin buaina piangsak kha ding uh hi. Tua in a lo thei lo in na tungah vaihawmna hong tungsak kha ding hi.

Nazareth tangval in aw dam takin" Lei kumpi tapa na kammal te pilna tak tak pana hong gingkhia hi kei. Kawl lak tuisam te phuul khia nawn kei un, phaiguam singte leen mang khin kha nuteh" ci in thu pia in. Tui sam phul ten Pasian bawl banga om ahihlam hong hilh ding uh hi.Pasian bek in tui phul ding leh phul lo ding thei hi. Ken aman takpi kong hilh hi: Saron kung a paak ma in mi dik sisan suak ding" ci-in hong dawng hi.

Ka lungsim tawng ah," Na sisan luang lo ding hi" ci-in ka dawng hi. Hih aki phasak Pharisaite, Rome kumpi in suahtakna a piak  a susia nuamte sangin na pilna hang bek tawh zong kei adingin na manpha zaw hi. Kaisar nangawn leh-heek uh hi. Ama kiang pana amanpha a ngahte uh launa suaksak uh hi. Kaisar pen mi hangsan leh amaute siat nang a zong den ahihlam laithei lo te lungsimah tuh uh hi. Veivai geuh mah mah! Khatvei vei Tiber guama Ngia ten zong tu mul silh in gitlohna in zang uh cih thei lo uh hi. Amau te lak pan kong cing ding hi. Ka Praetorium sun leh zan in nang adingin bukna mun hi hen.

Jesu in a lu pei veuh veuh hi. Pasian meel suna hong nuihsan kawm in, a kammal a tangtungsak den pa in " A hun hong tn ciang mihing tapa adingin lei tung lei nuaiah buk nang om lo ding hi" ci-in hong dawng hi. " Mi dikte adinga bukna om sun tung lam bek mah hi" ci-in a khut tawh van lam kawk hi. " Kamsang ten a gen kholhte uh tangtung kim ding hi" ci hi.

"Tangval" ci-in hoih takin ka dawng hi. " Ka ngetna te hong kheelsak kei lecin hoih ding hi.Ka uk gam sunga mite kepcing pen ka mawhpuakna hi. A lo thei lo a ka sep ding ahi hi. Tuamanin na thuhilhna te ah zong na pilvaan kuul ding hi. Ka thupiakte palsat het kei in, athuhkik nang thei khin hiteh. Na tungah lungdam peuh mah ing, dam takin."

"Lei kumpi tapa" ci-in Jesu in hong dawng hi. "Kidona a piangsak dinga hong pai ka hi kei hi. Kilemna a piangsak ding leh itna tawh nasem dinga hong pai ka hi zaw hi. Augustus Caesar in Rome lemna leh muanna a piak ni a piang ka hi hi. Keima kiang pan biakna leh politics hanga kithahna piang ngei lo hi. Tuabang pen miten ka tungah hong tungsak ding ka lam-en zaw hi. A hang pen ka pa, a lampi hong hilh pa deihdan bekin ka tungah thupiang ding hi. Tua manin ka tunga na hoihna leh phatnate nang adingin khawl zaw in. Biakna taua thah dinga ki-aap khin man dingin na thuneihna om lo hi".

Tua thute a gen khitciangin kumpi inn panzaak pan in a taang mah mah lim a pai ka nung et hi. Ka tawl dam liang hi. A hang pen leitunga vangik pen pua khia danin ka thei hi. Ama om sung teng ka tawldam thei kei hi.

Tua hunlaia Galilee gam a uk Herod kiangah Jesu a melma ten heek uh a, Nazareth tangvalpa tungah phuba lak sawm uh hi. Heroda in a lungsim deihdan lian in mala leh, Jesu si dingin vaihawm ding hi. Ahizongin a thuneihna te a kiphatsak pih mi khat ahihmanin Senate te kiangah tuitum loh khak a lau luat manin Jesu tungtang thu vaihawm ding lau hi. Ahizongin Judate hangin Roaman officer te lauthawng ngei lo ding uh hi. Zan diakin Herod Praetorium ah hong hawh a,  thu pawlkhat genkhawm hi ung. A ciah ding ciang Nazareth tangval tungtanga ka lungsim hong dong hi.

Nam thupi sung pan philosopher thupi a piankhiat zel mah bangin ken zong Jesu pen philosopher thupi mah mah khatin ka ngaihsun hi ci-in ka dawng hi. A biakna leh thuhilhna ten Pasian gensia lo ahihmanin a siantho lohna zong om lo hi. Tua pen a gamtatna pan a dikzia ki mu thei den hi. Tuamanin Rome kumpi in zawng a ut bang gen thei dingin suahtakna pia hi, cih ka hilh hi. Herod in a lungsim sia seel sawmin hong nui teisam hi. Zahtakna hong piak khitciang paikhia hi.

Judate biakna pawi thupi hong tun ding nai ta. Khuapi ah mipi tampi hong omkhawm uh hi. Nazareth tangval that nuam in gamlum peuhmah uh hi. Ka mi sawl ten hih mipi te sapkhawm nagin Temple sum zangkhin cih hong hilh uh hi.

Rome galkap makai khat bang ki vuagawp hi. Syria gam-ukpa kiangah galkap za tampi leh sakol tungtuang siam ngetna lai ka khak hi. Ahizongin buaina hong piang mahleh, tuabang dinmun a tawpsak thei dingin ka galkap neih a tawm zia ka thei tel sem sem hi. Sialpi guahthuaka thuak ding lobuang deihteel ding dang ka nei kei hi.

Juda mipi paikhawm ten Jesu man takpi uh hi. Praetorium pen amau adingin lauhuai lo hi. A makaite hilh le uh zong Judate thuneihna sut sawma, kua hiam tawh aki pawl ka hi tuan kei hi. Himahtaseleh aw ngaih tak tawh,"Khailum un, khailum un" ci-in awng ziah ziah uh hi.

Tua hunlai in Jesu a deihlo pawl thum pangkhawm uh hi. Herod pawl leh Sadukai pawl te pankhawmna a hang nam nih om hi. Nazareth tangval a huat man uh leh a puakgik uh Rome kumpi hakkol paihkhiat a sawm man uh hi. Rome gam a ukpa lim tawh khuasiangtho sung ka lut pen tu dongin hong ngaidam thei nai lo uh hi. Tua tungtang thu ah bel zong khial thei mah ing. Ahizongin tuabang te pawl amau muhna ah khialna neu bangin kilang thei lo hi.

Lungkimlohna dang a neih uh pen mipi omkhawm nading buuk bawl nanga Temple sum zat ding ka gen man hi. Ka thugen pen dek deklo uh hi. Pharisaite pen Jesu a langpan dente ahi uh hi. Kumpi thu zong khuadon nuamlo uh hi. Kitatsat loa kum thum tawntung Nazareth tangval a gensiatna te un amau ah mudahna kipsak hi. Tua huatna lungsim pua uh ahihmanin Jesu paina peuh suulzuih ton tung uh hi.

A meidawi luat manun cikmah a aki pawlpih ngeiloh uh Herod leh Sadukaite tawh kipawl tazen uh hi. Hih pawlte banah buaina meetpih a sawm mi lungsim hoihlo tampi lungkimsak kuul laideep hi.

Jesu siampi lian pen pa kiangah paipih in a sih nangin thukhensak uh hi. Tua tung in siampi lian pen Kaiapha hong kipia hi. A kiman mite thu a vaihawm bangin thu akikhen nangin kei kiangah hong sawl hi. A vaihawmsa bangun a tangtun theih nangin a hih theih zah in seem hi.

Jesu pen Galile gam mi ahihmanin tua laia thukhen Herod in vai a hawm ding ahih thu tawh ka dawng hi. Herod kiangah ka sawl pah hi. Amah pen thukhen siam leh a pil mah mah khat ahih mah bangin Kaisar thukhenna ah lungkim ning ci in mipa thu kei khen dingin hong kilehsak hi. A sawt lo in kumpi inn kimkot pen kulh tawh ki-um hong bang hi. Nai khat khit nai khat a lungkimlo  mi hong tam sem sem uh hi. Nazareth mual dung panin Jerusalem khuapi hong lut ziah ziah uh hi. Khuapi ah Juda mipi khempeuh hong pai ahi mai tam cih theih phial ding khat hi.

Thupiang ding a mu khawl thei kici Gaul mite khat zi in ka nei hi. Kap kawmin ka khe bulah bawk in hih bangin hong ngen hi: " En in hih mi siangtho sukha peuhmah kei in. Zan nitakin mangmuhna ka nei hi. Tui tungah a pai laitak ka mu hi. Kha nei in a leen laitak zong ka mu hi. Huihpi leh tuihual te thupia in, tui sunga ngasate nangawn in a thu mang uh hi. En in Kidron mual a tui naak pan sisan hong suak hi. Kumpi Kaisar lim zong nam a mangthang sakte luangin sincip hi. Ni leh khate khawl cip uh hi. Virgin numei pasian zong hansunga kizalh ni mah bangin Ni in dahpih hi. Mawk aw, Pilat thuhoihlo ten nang hong muak hi. Na zi in kong ngetna na thudon kei leh Rome leh a sunga vaihawmte tungah hamsia om ding hi. Kaisan nangawn in hong lehngatsan ding hi".

Tua hun in suangpaak kahlei khawngah mi dim ta hi. Jesu zong ka kiangah hong tunpih kikta uh hi. Ka nuaia nasem te tawh thukhen zum manawh in ka pai uh hi. Aw ngaih sim tawh mipi ten bang deih cih ka dong hi.

Amau ten "Nazareth Jesu that ding" ci in hong dawng uh hi. " Bang mawhna bawl ahi hiam?"

"Pasian gensia hi. Temple kisiat ding thu genkhol hi. Pasian tapa Mesia kici in Juda kumpi zong kici lai hi."

Roman Dan in tuabang te pawl sihna thu kipia ngeilo hi" ci-in ka dawng hi.

A kikamzo nawn lo mipi ten "Khailum in, khailum in" ci-in awng ziah ziah uh hi. Tua mipite aw in kumpi pa inntual liing sakzo hi.

Tuabang mipi gamlum lakah dai dide in a om pen Nazareth tangval Jesu bekmah hi. Ka hihtheihzah in a suaktak nang ka vai hawm hangin lawhsam hi. Tuaciangin ka lungsimah bang hih ding cih thu khat bek om lai hi. Tua beek in ahinna a hotkhiat ding ka lam-en hi. Tuabang hunpi ah a ki zang zel bangin, a kiman mi khat kikhahkhia zel hi. Tuaciangin amau pau leh a mawhnate uh a pua ding pa khahkhiat ding thu ka gen hi. Amau ten Jesu kilhcip ding ci uh hi.

Tua a deihna uh pen amau Dan tawh kituak hetlo cih ka thei hi. Mau dan ah Sanhedrin leh Court president theihpihna leh thukimpihna mawhsakna thugelh a om kei leh kuaman thukhen thei ding kici hi. Siamloh a tan ni in kuamah vuak leh sat ding kiphallo hi. A zing cianga gotna a thuakma in Sanhedrin in a vaihawmna leh thukhensatna en pha kik ding hi. Amau zat danin puanzaak keng thukhen zum kawngkhak cing leh sakol tunga tuang tangko in lamtawn in mi mawhpa min leh siamloh a tanna hang a gen ding ahi hi. Amah a panpih leh a siamtan theih dan ding a thei a om khak leh ciin a kimanpa adingin thu theihpih ding a thak zonsak zel uh hi. A kiman pa in zong thuthak a om leh thum vei thukhen kik dingin ngetna bawl thei hi. A dan uh thei kawmin vauna lau manin Jesu lamah pangngam lo, lau ding a om nawn loh man a Jesu a panpih nuam kik mi khat beek a om khak leh ci-in ngetna ka bawl kik zel hi. Ahizongin"Khailum in, khailum in" cih lo ngal zak ding dang om lo hi.

A lungkim khak uleh ci-in Jesu vua dingin thu ka pia hi. Ahizongin tuaciang a sinsona uh khangzaw hi. Tuaciangin mipite muhna ah ka khut ka silsiang hi. Jesu in sihna ding zahdongin mawhna bangmah nei lo hi. A nuntak theih nangin ka hihtheihzah in ka panpih hangin ka lawhsap lam ka kilangsak hi. Hih migilote sisan buasak nuamin a dangtaak uh hi.

Gam vaihawmna lama ka dinmun tawh kituak in mipi lungso ka mu kha zel hi. Ahizongin tutunga zaha mipite lungkimlohna mu kha ngei keng. Jerusalema hell sawltak khempeuh zong kihel kim uh ci-in gen nuam liang ing.

Mipi te pen khe tawh apai zong bang lo uh hi. Praetorium pan Zion mual lam manawhin huihpi bangin kizial gawp uh hi. A hehna aw uh gin-ngaih peuhmah hi. Tuabang mipi husa pen Pannonia lama kumpi a paikhia nuamte lakah nangawn ah khatvei zong ka za ngei kei hi.

Tua buaina in so saan laitakin mi thupi Caesar sih nia khuanim mah bangin khuamial hi. Ides of March zong tuamah bang hi. Tua laitak a ki phin den te gam uk keimahin mawhna nei lo Nazareth tangval sihna hanga na kasak manin damlai gotmun ka ciam kha hi.

A ki nusia khuapi-a keibek a om tawh ka kibang hi. Ka kiimah kuama dang hong om nawn lo hi. Jerusalem in a gilsunga om Gemonica kivuina lam nga in lua khia hi. Siatna hiuhpi in hong nuai in dahna in hong tuam hi. Ka nasem leh galkap makai te tawh Calvary lam zuan in ka pai uh hi. Tua laitak a kiliatsak pen ukzawhna khat ahi hi. Tuamanin kei bek hong ki nusia hi. Tua laia thupiang pen mihing thu hi lo zaw in Pasian thu ahihlam ka lungsimah hong thak suak hi. Golgotha lam pan in a ngaih mah mah aw khat hong ging hi. Tua pen mihing' bil in a zak ngeiloh natna thuak aw ahi hi. Meidum sahtakin Temple tung zum khuh in khuapi tuamcip hi.

Tua thupiang pen lei leh vanah zong lipkhap huai pen phial ding hi. Dionysius leh Aeropagite bangin, " Leitung a bawlpa in thuak ahih kei phial leh zong leitung kehsia hinteh" ci liang uh hi.

Leitungin khasiatna a thuak laitakin Egypt leitaw lamah naakpi in zinliing hi. Tua hangin mikim lauthawng uh a, upmawh thu a mawk gen thei Jud ate bang lauluat manin a si lo bek uh hi. Antioch khua-a puteek laisiam Balthasar in zong tua bang thu a pian khit ciangin si hi. Lamdang a sak man leh a lau luat mana si hi lo kuaman thei lo hi. Amah pen Nazareth tangvalpa lawmhoih khat hi.

Zankim khitciang ka kumpi puante silhpha in Golgotha lamzuan in ka pai hi. Hoihna in kithawihna kizo thei hi. Mipite amau inn lam zuan in ciah mang khin uh  hi.Tua thupiang ah mipite khial maw khial lo cih kinialna tampi om hi. Tua pen a neih zel uh kinialna hi mahleh kinialna haihuai suakin lametna bangmah piangsak lo hi. A muh leh theih te un launa, dahna leh kisikna piangsak hi. Galkap tawmcik ka neih ten zong dahpih uh hi. Sun dan dungzui in Mu lim zong khuh uh hi. Juda galkap ten zong gen nei in phun nuah nuah uh hi. A thugen uh bel theitel kei ing.

Pawlkhat in Rome mite tungah Pasian ten thulamdang piangsak ci-in gen uh hi. Khat vei vei bang pasal leh numei kipawlkhawmin dinsa in Calvary mual lam en ngeingai uh hi. Thu bang hong piang diam cih a ngak bangin tang vet lo in en de du uh hi.

Praetorium lamah bel lungsim in gamkhempeuh ngaihsun kawm leh khasia takin ka kik hi. Nazareth tangval sisan kai step te ka tawn to hi. Tua laitak puteek khatin bang hiam khat hong nget sawmin hong pang ka mu hi. A nungzuite tawh akibang Rome mi pawlkhat mittui tawh a nungamah ding zihziah uh hi. Hong muh phet in ka khe bulah bawk khup in kap hi.

Puteek khasia kap muh pen nuam het kei. Kei lah a khasia sa ka hihmanin ka meltheih loh puteek tawh ka kap khawm uh hi. Tua ni a mipi te mittui luang bel thupi hetkei. Tua banga lungsim pia lo a kap khem ka mu ngei kei hi. Nung ngatsan a zuakte, thu theihpihte leh "khailum in a sisan luangsak in" a cit e meikhup in bu mang khin uh hi. Ka gensa mah bangin Jesu in thawhkikna tungtang thuhilhna nei hi, tua pen thutak ahihleh hih mipite muhna ah hong piang leh ka deih hi.

"Pu aw" ci in ka ki control zawh ciangin ka hopih hi. "Kua na hi hiam? bang ngen nuam na hi hiam?" ciin ka dong hi.

"Josef, Arimathai mi hi ing" ciin hong dawng hi. " Ka phei tungah tawi in Jesu luang ka phum ding phalna nong piak nangin kong ngen hi" ci hi.

"Na ngetna kong phalsak hi" ci-in ka dawng pah hi. Tua phetin Manlius zong galkap te tawh a pai dingin thu ka piapah hi. Tuabangin cing kei le uh thu hoihlo piang kah ding hi.

Ni bangzah hiam khitciang haan hawwm cih kithei hi. A nungzui ten Jesu aman a gen kholh mah bangin thokik hi ci-in khuasungah tangko uh hi. Singlamteh tunga khailup sangin tua thu mipi ten za nuam zaw uh hi. A thugen zuau leh thudik ka tel lianlo ka hihmanin ka kantel hi. Herod hong ngawhna bangin, ka khial hiam cih na theihnop khak leh ci-in nang tek tek in tel lecin ka deih hi.

Josef in mah han ah Jesu phum hi. A thawh kik ding thu a genkholh pen thudik a hih leh hih loh ka ngaihsun ngei kei hi. A kiphum ni zingsangin siampi khat Praetorium ah hong pai a, nungzui ten thawhkina um mahmah ahihmanin a luanggu in thokik hi cih sawm uh cih hong hilh hi. Kumpi a cing galkap makai Malcus kiangah ka sawl hi. Juda galkap te tawh a kuul leh a kitangsam zah kizuisaka han cing dingin thu ka pia hi. Tuabanga ka hih hang pen bang bang piang ta leh ei Roman te hilo in amau leh amau ki mawhsak ding uh hi.

Han hawm cih thuthang hong om ciangin, ka lungsim hong la peuhmah hi.

Galkap khat Isham akici ka sam hi. Ama hong hilh bang bang limtakin ka ngaihsun hi. Thu omzia hibang hi: Han sungah khuavak a lamdang mu uh hi. A tungin numei te paaknam tui zuut dingin pai uh hin cia kici hi. Ahizongin bangcin hancing galkap ten mu lo uh haim cih dotna khat hong piang hi. Tuabang thute ngaihsut laitak a kiim teng hong taang hi. Han pan in misite siluang tuamna puan tawh hong tho sup sup uh hi.

Lawp leh thatho takin awng ziazua uh hi. Tua laitak aki lawm zaw a  zaak ngeiloh tumging za hi. Huih lakah pasian phatna kidim hi. Tua laitak ziin naakpi a liing tawh kibangin leitung liing hi. Ama thu in ding zolo ahihmanin leikeu ah tuuk hi. Tui peek dan in lei pen tawl dan in ka thei hi. Khuaphawk lo in a om manin tualai thupiang thei nawn lo hi.

A hong khanlawh kik ciang bangcin om na hi hiam cih ka dong hi. Leitaak ah a mai leitawh kimat in bawk khup cih gen hi. Tuabanga a om hang pen a ihmu lai phawn khak mana nguaina ahih leh hihloh ka dong hi. A ihmut loh lam hong gen hi. Ihmu leh duty laia ihmute gawtna a natzia thei ahihmanin ihmu ngamlo ci in hong dawng hi. Ahizongin mi pawlkhat lumin ihmu cih hong hilh hi. Tua pen bangtan vei hiam cih ka dong hi. Kician takin ka theih loh hang nai khat sung bang hinteh. Han ah pai in han sung a va et leh etloh ka dong hi. Lauahihmanin pai lo cih tawh hong dawng hi. Galkap dangte hong tun ciangin a quarter lam uh manawh in paikhia uh hi.

Siampi ten dotna a dong uh hiam cih ka dong hi. Dong uh ci-in hong dawng hi. Ziinliing hi ci dingin thu hong pia uh. Ka ihmut kal un a nungzuite hong pai in a luang gukhia uh ci un hong ci hi. Tuabangin ci leeng sum tampi hong pia ding uh hi. Tua laitaka amh tawh kiho siampi pa mimal lungsim bangdan hiam cih ka dong hi. Amau te laka pawlkhat in Yeshua pen mihing hi loin, mari tapa zong hi lo a, nungak siangtho suul pana hong piang Bethlehem khuami zong hi lo in ngaihsun uh ciin hong dawng hi.

Ka ngaihsut dan in Judate upna pen man ding hi. A hang pen tua pa nuntakna tawh kituak peuhmah hi. Belsekpa khutah tungman a om zel mah bangin a melma leh lawm ten zong thudik ciin panpih uh hi. Tui zong leenggahzu suaksak thei hi. Sihna zong hinna suaksak thei hi. Tuihual khawlsak in huihpi zong khaam thei hi. Tuipi sunga ngasa zong a kamsunga sum muam kawm sa in sam khia thei hi. Tua bang hih thei in tua sanga thupi zaw tampi piangsak khin hi. Tua pen thudik hi ci in Juda khempeuh thutheihpih in a om ngam ua tua in amaute melma suak sak hi in ka thei. Mithat leh vangu hi loa, dan palsat zong hi samlo hi. Mimal khatpeuh tungah zong khialhna nei lo hi. Tua pen a lawmte bek thamlo in mi tultampi in thudik a hihzia thei uh hi. Marcus in singlamteh tung a kikhai lai in,"Hih pen Pasian tapa ahi hi" a cih pen ken zong ka um dekta hi.

A zahtaakhuai kumpi pa aw, hihte thutak ka ngaihsut khiat theihte hi. Ka hihtheihzah in pilvangin a kitel thei bang pen in ka gelh hi. Antipater in ka tungtang thu hoihlo tampi na kiangah hong tun ahihmanin ka vaihawmna leh thukhente a dik leh dikloh na theih nangin na zat ding hong lam-en ing. I gam kumpi tungah citak dinga kiciam kawmin deihsakna kong pia hi.

Na nasem cinglotak,

Pontius Pilate 

@WhatsApp

Share: