Bangziak a Nithumni A thou Ahia?

Tualeh “vui in aom a, Laisiangthou dungjui in Nithumni in athoukikta hi” (I Korinmite 15:4). 

Tuni Easter Sunday ahi toh kiton in Jesu bangziak a Nithumni a thou ahia chi thulu zang in, ni thumni a athona ziak tak ih thei kham kham ih ki kumkhawm ding uhi. 

Jesu thokitna pen Laisiangthou sung a alaigil pen ahi. Aziak hih thohkitna omlou hileh Laisiangthou pen amawknapi hilel ding hi. Tua ahi man in Paul in Korin saptuam mite kiang a Thohkitna omlou hileh ka thugen uh athawn ahi ding a tualeh na ginna uh zong mawknapi ahi ding hi achi hi (I Korin 15:14-15). 

Tua ahi man in hi thohkitna ih chipen Laisiangthou sung pumpi a ding a athu laigil pen hung suak hi. Aziak hih thohkitna omlou hileh Laisiangthou pen laibu dangte toh akikhiatna omlou ding hi. Khrist thohkitna in Laisiangthou pumpi Pasian THUMAN leh THUTAK ahina kipsak hi. Laisiangthou sung a Khrist thohkitna thu omlou hileh ih Laisiangthou pen document seal leh signature omlou toh kibang ding hi. Ih certificate neite uh government apat hitaleh a dang dang jong, hih ih document/certificate teng a abon in sealed leh signature om chiat hi. Tualeh tua seal leh signature ziak in ih document pen hung manpha in zakthei hung suak pan hi. Tua ma bang in Laisiangthou zong Khrist thohkitna ziak in zakthei hung suak hi. Aziak Khrist thohkitna in Laisiangthou pen Pasian thutak ahina seal leh sign nam khum ta hi. 

Bangziak a Jesu nithum ni a thou ahia?

Hih dokna toh kisai dawnthei na’ng lampi tuam tuam om hi, ahinla eite atam zawte theidan in Jesus in Pharisaite leh laigelmite kiang a Jonah ngapi gilsung a Nithum leh Janthum aom bang in mihing tapa jong  nithum leh zanthum  leigil sung a aom ding hi (Matthai 12:39-40) achi na pat in Jesu pen Nithum ni a thoukik ding ahi ih chi uhi. Dik ma ahi, ahinla Jesu bangziak a Nithum ni seh seh a thou ahia, bang ding a ni Li ni ahikei leh ani ngani vel a thoulou ahia chi pen kuama in kisut lou hi. Aziak Jonah chiamtehna Jesu in agen ziak in Jonah toh kibei sak hi. Tua ahiman in hih Nithum ni a athona ziak athu laigil tak pen kithei khalou hi. Tua ahi man in tuni in hih athu laigil hi ding a ih gintat pen ih gensawm ding uhi.

Laisiangthou leh number thum: Laisiangthou sung a number tampi om hi. Tuate lak a number tallang deuh ahi leh thum (3), sagih (7), sawmlehni (12) leh sawmli (40). Hih number thumpen tamveipi Thukhun Lui hileh Thukhun Thak hileh muthei in om hi. Tualeh tampite lak pan a atallang deuh hih anuai ateh ahi. 

Thukhun Lui A

👉 Iseralte pate mithum:  Abraham, Isaac leh Jacob ahi uhi. Mosi hi in zawlneite kiang ah Pasian akilak chiang ahikei leh thu agen chiang in napu napate uh Abraham Isaac leh Jacob Pasian kahi chi gige hi.

👉 Noah tate mithum: Sem, Ham leh Japheth ahi uhi. Hih mithumte tungtawn in Pasian in leitung a mihingte tangthu hung sunzom tou kit hi.

👉Abraham in vantungmi / mi thum a zintun hi (Genesis 18:2).

👉 Mosi puanbuk leh Solomon temple pen khenpi thum in kikhen hi (Outer Court, Holy Place, Holy of the Holiest). 

👉 Egypt gam a gawtna sawmte lak a kuana pen mial a gawtna ahi. Tualeh hih mialna a gawt hun sung Nithum ahi (Exodus 10::21-22).

👉 Isaiah 6:3 a Seraphimte in Pasian aphatna hua siangthou chi kamma thumvei zang uhi.

👉 Esther in kumpi Ahusura a muding in amipite Nithum anngawl ding in thupia hi (Easter 4:16).

 

Thukhun Thak A

👉 Jesu anu leh apa in Nithum sung mansua uhi (Luka 2:46).

👉 Paul Nithum khua mulou in om hi (Nasepte 9:9).

👉 Jesu in mipi 4000 avakna a hih mipite in Jesu nungzui in Nithum anngawl  uhi (Matthai 15:32).

Hih atung a thumal THUM ih muteng apat in number thum pen athupina let a vangletna leh Pasian program tangtunna ding a zak ahidan tamveipi hung musak hi. Tua ahi man in hih number thum pen number thupi leh vanglian ahidan hung musak hi. 

NITHUM NI A ATHOHNA ZIAK AHI LEH ANUAI A TEH ZIAK AHI DING HI:

👉 Nithumni pen hinna kipatna ni ahi: Thilsiam toh kisai (Creation) a Pasian in thil khempeuh ni guk sung in siamkhia hi. Tualeh hih Thilsiamna sung a hinna pen ani thumni in leitung a muthei in hung ompan hi. Ani thumni in thil hingthei Pasain in omsak pan hi (Genesis 1:12-13). Loupa sing leh theiga chituam tuam khaichi te ani thumni a hung om pan ahi uhi. Hih ani thumni a leitung a hinna nei ahung om ma bang in Jesu zong ani thumni a hung thou ahi ding hi. Pasian in a thilsiam dan dungzui a tapa zong ani thumni mah a kaithou kit hiding ahi. 

👉 Nithumni pen Toupa ni ahi: Exodus 19 :10-16: na sung a Pasian in ami Iseral teh toh kimusak ut in Sinai Mual a hung kumsuk ding chi hi. Tualeh Pasian in Mosi kiang ah a Nithumni in kung kumsuk ding chi hi. Tua ahi man in tuni leh zing kisusiang un aziak ani thumni in kung kumsuk ding chi hi. Tua ahi man in ani thumni a ding in kimansa in omun chi hi. Hih apat in Nithum pen Pasian a ding a nithupi ni poimoh leh amah ni ahidan hung musak hi. Tua ahi man in Jesu Nithum ni a athona pen bang ma dang hilou in amah ni ahi ziak ahi ding hi.

👉 Nithum ni ahi leh tung ding kitna (Restoration) ni ahi: Hosea 6:1-2: “Aw hung pai un, TOUPA kiang ah kilehkik ni uhang. Aziak ama'n eite hung botzan a, himahleh, hung damsak ding hi. Ama'n eite hung liamsak a, himahleh, hung tuam ding hi. Ama’n ni nih nung in eite hung halhsak thak ding a, Ama muhna a eite i hintheihna ding un, Ni thum ni in eite hon kaithou ding hi.” Hih Bible tang pen Laisiangthou siam khenkhat in Khrist a kaithou ding genkholna ahi achi ua, khenkhat in Iseral kitungding kitna ding ahi achi uhi. Ahinla a bang bang hileh hilai a ihmu theipen ahi leh a Nithumni pen ahi leh tungding kitna ni ahi. 

Hih thu teng tungtawn in Jesu bangziak a Nithumni seh seh a hung thou ahia chi kimukhia theita hi.

 A simkha zousiah Pasian in theisiamna hung peta hen. Amen!

~ Thangzakap Suantak, M.Div

Bharat Bible College
Hyderabad, Telangana

-------31032024---------

Share: