LANGH DO KHUP’ KAH TAMLAWHNA

"Amah in Topa' inn, kumpipa' inn leh Jerusalem khua sung inn khempeuh hal hi; inn lian khempeuh amah in haltum hi."

Kumpite Nihna 25:9 TB77

A kham a zangah Zomite' khuapi teng kiban hal sese a maw Topa.

Jacob suan gige, Judah leh Israel-in kikhen sese, kumpi tuamtuak nei  sese kei le uh mi' sila-in om liang lo mah ding uh hiven maw Topa.

David leh Absalom, pata lawmlawm thah ding mat dingin kivau kei le uh Israel mipi tampi mawk sih zenzen lo ding hi a maw Topa.

Joab in a sanggampa Asahel phu a lakna-in Abner that zenzen kei leh a khantawnin David tawh kilangneih den lo ding uh hi a maw Topa.

KA PU KA PATE UH

Ukpi Pu Hau Cin Khup leh a pu (A Nu' lam) Pum Za Kham nitakin kilai uh hinapi zingsang ciangin Sial kigawh thuk buang uh hiven maw Topa.

Laitui Hausa Pu Suang Khaw Kam in siah pia nuam lo ahih manin Ukpi Hau Cin Khup tawh Magywe ah thu kinei uh hi. Pu Suang Khaw Kam gul in tuin si mawk hi. Ukpipa in "Ka galpa" ci zenzen loin Laitui khua dong Pu Suang Khaw Kam' luang tun buang hi a maw Topa. 

TU KHANG HUNIN

Ka Zomi pih ka laizomte biakna leh politics ah pawl tampi kisuah uh a, a tuahsia, a si, inn kihal a om ciangin a langlam penpen in "Awi ta bek ing" kici liang uh hi, Topa aw. Ka minamte adingin kahtam ka lawhlawh ding longal cih nading thei nawn keng ka Pasian aw.

NAM DANGTE 

Namdang ten hong it kei leh phamawh kei, ei leh ei buang ki-it  ni, a khial i om leh kithum ni, kimaisak ni, online panin kigal koko kei ni, gatang kuangah gatang kai ciatciatin thu sung khawm ni, khangsawnte' maban ding saupi khung khol ni. 

KEI HONG KO ZIAHZIAH ZAW UN

I minam buppi mi' ciamnuihna, mi' kam-uih thoihna, mi' lamtang gamlumna lel ding a, khat leh khat kiphinphin-in na kikoko liang uh sangin na lungsim uh dim let lua, so lua ahih leh ka hoih lohna, ka melsiatna, ka ginatlohnate na kan theih zahzah uh kan unla, ek kha zenin hong ko huanzaw unla, Zomi tengin kithuahna-in hong nei un, ci-in kong kipumpiak hi. 

Guptuam paihtuam a neilo;

Langh Do Khup

Khuata mipa

Tagah bilbing

Itna Innpi

Zogam pan

*Via WAP 

Share: