Pate Ni Message 2025 ✍️ Pastor Thangdoulal Suantak

Thupatna

Pate ni na zang masa pen ahihleh Nupi khat ahi a, amin ahihleh Mrs John Bruce Dodd ahi. Amah pen America gamsung a Washington kichi bial in a huamkhak na sung a om Spokane kichi town khat ah a na teeng hi. Hinu pen Pate Ni na pankhia leh na zang masa penpen nu ahi a, ama'n bangchibang a ana patkhiat e?, chih i en diing uh hi.

Kum 1909 hunlai ahi a, May kha a Nute Ni kizakna Saptuam khat ah, Mrs John Bruce Dodd zong a va kikhawm hi. Hua kikhopna a, Pastorpa thugen, "Nute itna" chih thupi a zaakna tungtawn in a Pa itna a ngaihtuah khia hi.

Amah pen a neulai in a nu in a na sihsan hi; tualeh a nu in a sihsan hunlai in, a pasal (Mrs John Bruce Dodd pianna pa) in a kep diing in ta (naupang) guk a tawh a nusia hi. Innsung a nu pen omkei lezong, a pa in bukimtak in a tate guk teng, Khristian innkuan hoihtak bang in a enkol hi.

A unau ua hoihtak a, a khantouhna diing ua a pa kipumpiakna leh a nasepte ngaihtuah in khasetak in a om a, tuachiin biak-inn sung a, a touna mun ah, a pa pahtawina saang pen piak diing ngaihtuahna a nei a, tualeh leitung pumpi a pate tengteng zong pahtawi diing ahihdante a ngaihtuah hi.

Tuachiang in a teenna uh khopi, Spokane Ministerial Presidentpa kimuhpih diing in Mrs John Bruce Dodd a kuan a a kiang ah, "Kum teng a Nute Ni simsial in Nute i Nute uh i phawk or i ngaihtuah khia gige uh hi; hichibang mah a kum teng a i Pate uh i phawk or i ngaihtuah khiat gige na diing uh ni khat na guat diing ahi; hua pen Saptuam zousiah in Pate pahtawi n ani a, a zak chiat diing uh ahi," a vachi hi.

Tuachiin Spokane Ministerial Presidentpa'n a thugen pen a na pomsak a, June Pasianni a thumna pen Pate Ni hita diing in a guat a, hua pen Mrs John Bruce Dodd pianna Pa Birthday ahi.

Tuachiang in Spokane khopi a Mayor (Spokane khopi council chairmanpa) in hih Pate Ni thu a na zaaktak in, Pate Ni zak chiat diing in thusuah a bawl hi.

A khonunglam in Spokane a om Governor in zong, Spokane khopi a Saptuam in Pate Ni a zak diing uh thu a na zaa a, tuachiin ama'n zong state pumpi a Pate Ni zak hi diing in thusuah a bawl hi.

Hichibang a Pate Ni thu a kithanlai in William Jennings Brrant in America kivaihawmna Senate ah, Pate ni pen, National Holiday hi hen, chi in agenda khat ah a pua a, tuachiin kum 1924 in, America gam ah, Pate Ni pen National Holiday hi diing in thuphuan a omta hi.

America president a 30na Calvin Coolidge in, "Innkuan zousiah in Pa pen a zah ua a pahtawi chiat diing uh ahi," chi in, June Pasianni thumna pen Pate Ni hi diing in a namdetna thuphuan a bawl hi.

 Hichih hunlai a kipan in leitung pumpi, a diak in Khristiante lak ah Pate Ni pen, kilawpna leh thanuamna liantak tawh zakh in a omta hi. Tualeh Mrs Dodd (Mrs John Bruce Dodd) pen a lungtup America mipite'n taangtunpih ua amuh ziak in a kipak mahmah hi. 

A khonung in Mrs John Bruce Dodd kiang ah, 'Pate Ni zakh ahihna ah bang kisamlai nasa a?' chi in mite'n a dong ua, amahnu'n 'Pata Ni chiang in innkuan in Biak-inn kikai kim chiat henla, Pate a diing in silpiak neu-khat chiat piak hihenla, tualeh i pate uh kiang a i gen ut, i na gen ngailouh thu manpha khat chiat bek genna om leh," chi in a dawng hi.

Hih ni pen Saptuam in Pate zahna leh pahtawina ni, 'Pate Ni' chi a, a na zak uh ahihna ah, pate a diing diak in, hih ni pen a thupina ni uh ahi hi.

Tuni a 'Pate Ni' zang a kikhawm i hihna uah, ei Pate'n zong i etthak diing ua poimawh a om hi. Huate Pastorpa a kipan in i na ngaikhia diing uh hi.

🧑‍💻TONGKUP-ZAITHA💪

Share: