THUPI: PA CHITAH & A MUOPHUONA ~ Pastor Dr Thangboi Zou

JUNE-15, FATHER'S DAY

Tangtel: "Tualeh nou Pate aw, na tate uh, suhlungthah sih unlen, Mangpa thununna leh thuhilna ah entup zaw un"_ (Ephe. 6: 4).

*I tangtel a kipan point 2* kikum khawm vai ei, tuate ahileh:

a) *Tate suhlungtha lou ding*: "Nou Pate aw, na tate uh suhlungtha sih un" (Ephe. 6:4, Kol. 3:21).

Tamna Laisiengthou tang kipete giel in agetnuompen ahileh, _"Tate Pasian deina banga kep zing ding"_ chi ahi. Eph. 6:1-3 na sungah Tate'n nu leh pa thu man ding dan agen masa hi. Paul in Ephesa Hattuom a Pate kunga aget thupipen ahileh, _"Tate tunga nu leh pate mohpuohna khu, i tate Mangpa thununna leh thuhilna a etkawl ding ahi"_ chi ahi hi. 

*Thupil khat* in, _"Tate toh hun zatkhawm khu tate tunga Sum tampi seng sangin ahoizaw hi"_ chin agen hi. Tulai Pa (nulepa) tampi'n a tate laisiemna ding bou abuoipi ua, athupipen leh amanpha pen a Hagaulam hinkhuo ding buoipi nu leh pa avang mama hi. Pa innsung apat vamang tampi igam in ineita uhi. *Pasian in Kumpi Hezekiah* kunga, _"Na innsung siemtup tan dam joulou a shi ding na hita hi"_ chin (2Leengte 18:5). Aman a mohpuohna innsung sangin a gamsung leh mipite agelkho zieh hidia suikhiet ahi hi. *Ken P. Canfield* in, _"Pa tahtah ten Pa chi khu hina min maimai in a gel sih ua, nasep theina in azang uhi"_ chin agen hi. Pa khu hina (Title) hilou in mohpuohna ahidan agetnuomna hizaw bou hi. *Laibu Khat* in, _"Ei Khristian Pate vang Ta neiding mai hilou in, Hagaulam a i tate enkawl ding (spiritual fathering) a mohpuohna pieh a um ahi"_ chin akigiel hi. *Gordon MacDonal* in, _"Khovel a Pa tampi a um a, hinanleh innsung enkawl tahtah pa tawmnou ahi, ta nei dinga nupa hina a sepding uh Pa zousie in atheisuoh ua, hinanleh Pa tahtah hina khu tahsa lam a ta nei guoh ahi sih hi"_ chin anan gen hi. *Job* in, _"Zingmawng tengin a tate adin Maitam abawlpi zing hi"_ (1:5). Pate aw, tunin na tate kepdan pilvan hun, na ta hina chiA na moh phawphaw leh na tate delmang na hi kha thei (zaw ding) hi. Tua ziehin Pasian deina banga lungkim sah ding khu kizil tavai.

b) *Pasian thu toh Thunun ding* (Eph. 4 b): 

Tamin agetnuom pen ahileh, _"Lamdih a pui ding"_ (discipline) agetna ahi. Laisiengthou in tate Pasian deidan a kepding ahidan agente ahileh: 

i) Na tate aneulai un Pasian kungah ap in (1Sam. 1: 28, Luk 2:22), 

ii) Na taten abawl zousie uh Pasian in chiemte/ melchi ahidan hil in (Late 139: 1-2). 

iii) Pasian in na tate a itdan, amaute adia tupna nei ahidan, hil in (Luk 1:13-17, Rom 8:30, 1Pet. 1:3-9),

iv) Na tate Pasian deidan in aum na uai, a Ginna uh ahatzing na dingun, nang khu a etton ding in um inlen, itna leh lainatna toh kem in, chin Paul in agen hi (Phil. 1:27).

  

*Gary Chapman* in, _"Tate etkawlna ah kangtalai lim 2 toh gente hi, tuami ahileh thuhilna leh zilsahna ahi a, atai hoi theina dingin kangtalai thau khu itna ahi. Bang chi bang zilsahna nei zong lei, na tate'n na itna atheichet lou uleh aphatuom lou asuo ding hi"_ chin agen hi. 

*Chuck Swindoll* in, _"Tate hoilouna khu Hattuom akingoh a, tami sih dih hilou ahi. Na innsung a na thuzawlou zieh hizaw bou hi. Eiten innsung a i thuzawlou i tate khu hattuom Lamakaite'n (Pastor, Upate) athuzaw ding dia i ngaisut na uh pen adihlou ahi"_ chin agen hi. Na tate na innsung a na thuzaw ngeingei leh heimun ah um ulezong na thuzaw jou dinga, nanleh na thuzawloute Pastorte, Evangelistte leh Pasian nasemten theitop hing suopi nan ulezong, nisim a a umpi nang apan pan nalapia mateng kikhel lou ding uhi.  *Dr John R. Rice* in, _"Ka tate piengthalou pia zinei-pasal nei a ka hakhiet sangin, piengtha uh henlen shi uleh ka deisah zaw hi"_ chin agen hi. Nang nan ate nakepdan toh bang chi na sah ei? Miten atate pientha ding ngaikhaw mama uhi. Nang na tate sangin SUM ngaikhaw na hi zieh a na tate piengtha lou uh hileh hi.

*Akhupsitna*:  Pi John Bruce Dudd piena Pa hoina, chitna te zieh in leitung miten Pate Ni zat ding ahi chia apuokhiet ngam laiin, nang na taten nang a pat bang azil khie uai? Noah in, _"Tuizin akipat a innsung mite ahunkhie hi"_, Nang Sietna akipat na innsung mite (adia in na Tate) na hunkhe jou diei? Kingaitua pha in. *Kumpi Hezekiah* khu agam leh Nam adia dia Pa chitah, etton tah ahi, nanleh Pasian in, "Hezekiah na innsung siemtup tan, dam doh joulou a shi ding nahi" chin agenpi hi. Pasian in "Khotang leh Chi-le-Nam sangin Innsung ngaikhoh zaw ahidan" aching mama hi.

*HINNA TANGHOU*

_Devotional Message 2025_

*Pastor Dr M. Thangboi Zou*

Share: