Lungdam ing! ~ Zogam Today Editor

Kum tamsim pei nua in tuni (Noupi 30, 2025) in Zogam Today suoh kum, kum sawm (13) ahing chingta hi. Tuni’n Zogam today kum 13 achin mi tampi atheilou a um diing in kagingta hi. Hinanleh, tuni a kum 13 ahing ching thei na zieh zong mi tampi nasep na zieh ahikia leuleu hi.

India kumpi in zong (media) 4th pillar of nation/democracy ana chi mabang in, tunin Zogam Today zong nam sung, gam sung khantou na ding a khuom khat ahi. Zogam Today in hoitah a na ang sep suo thei na ding in Amasapen in ei a mipi ten i tawsot uh poimaw ahi. Nam dangte bang ding a khaam mu/sepna tha mu ahisihleh kumpi toh akisaipi lang a khangtou uh e ichi leh MEDIA zieh ana hi khin khian ahi. Khosung,vengsung a thu leh laa, khantouna kikup khawm thei na um sun khu media tungtawn apat ana hi ngitnget hi.

Zogam Today khu nang leh kei a ahi, I nam a ahi. Th a –le- jung, sum-le-pai tampi seng a I nam a ding a news hing pieng khie ahizieh in nep ngai sih vai. Singdang, angdang saang in eima tongdam Zogam Today ma subscribe chiet lei eima leh eima ki tou del/ ki panpi tuo suo ahi. ‘God help those who help themselves’ chi ma bang in eima leh eima kipanpi tuo chiet vai.

Tuaban ah kum 13 i chinna uh toh kizui in Zogam Today kipat chiil apat pan analate, tunitan dong a i pichinsuo na ding ua, tha-le-zung, sum-le-pai, vanzah machine, thu-le-la leh lam chi tuomtuom a panla jousie tuni’n noute kang geldoh zing a, na tung uah kakipah mama hi.

Subscriber-te zieh in tunitan in news hawm na ding umtou zel in, CSO lamkaite, hattuom lamkaite, Nam lamkai tuomtuomte ban ah mimal tah a ngainatute leh pan late jousie zieh a tambang dinmun mu thei ihi zieh un, kum 13 i chinni in LUNGDAM ING chi kammal lou ngal noute ding in lethuh kang nei jou sih a, kisuonla ahuai mama hi. Maban ah zong kal kisuonzom zel ding a, nga in a hinna ding tui a poimaw bang in i news uh hinsuo na ding in subscriber-te’n nang lahzompi zel ua, sum-lepai nang thawkhawm zel uh poimaw ding hi. Th eituo khat khu i news uh kum 13 masang a ipat lai uapat tunitan in news subscription fee khang nailou hi.

Pasian in Zogam Today a ding a panla kha jousie na bawn un hing guolzawl chietta hen!

Long Live Zogam Today!!

~ S. Nengkhanlun, Editor, Zogam Today

Courtesy: Zogam Today | 30 Oct 2025

Share: