Zogam Today in kum 13 chinna Anniversary Thanks Giving nei

Lamka, October 31: Zogam Today kum 13 chinna program October 30, 2025 (8:30AM) in ZSP Library Hall, Zogal Hall, Zoveng ah um hi.

Program hun ah Chinlunthang, MLA, 60-Singngat in newspaper ahileh society leh nam a ding a fourth pillar khat ahi'a, hinanleh newspaper khat run kichipen hamsa a, sil baisam hilou ahina ah Zogam Today Editor pu dinmun theisiempi in deisahna toh tamveipi khawlsan ding in ana genpikha zel chi hi.

Zogam Today ahileh private publication ahi'a, ahi'n, newspaper simloute a ding a zong Zou vernicular newspaper khat um ahi chi atheina ding uh leh chile-nam khantouna ding a poimaw fouth pillar khat kepbitna ding a Editor S. Nengkhanlun leh a staff te'n phatuomngai tah a theitawp a suona tung ah apatat thu gen in mailam hun a 25th Anniversary (Silver Jubilee) program zahtou ahi theina ding a well-wisher te'n supporter group khat abawl khiet ding un poimaw mama ding chi hi.

Tualeh Thangzamang, President UZO GHQ in chi-le-nam a ding, gamsung khantouna ding leh nam dang te'n zong Zogam Today tungtawn a information amu theina ding a Editor S. Nengkhanlun leh a staff te'n theitawp suo a tuachi'a, 13th Anniversary program zahthei ahina tung ah kipahpi thu phuong in media kichi khovelpumpi siemkhetu leh siemhoitu ahi chi'n gen hi. Chidang-Namdang toh tuni'a UZO GHQ in kal kibang a asuon theipen Zogam Today Newspaper zieh zong hiding ahi chi'n gen hi.

Tuaban ah Zogam Today Adviser Mannuamching, DC/Pherzawl in masawnna ding in leitung ah bangma anuom umlou a, apal ngam pa'n apal ding, azui ngam pa'n azui ding ahi chi'n gen in Zou Literature kepbitna ding a Class IX to XII text book zong umta ahina ah Zogam Today staff te'n literature toh kituoh a ham zahdan/spelling zahdan improvement bawltou zel ding in hanthawn hi.

Zou community te'n Zogam Today Newspaper tungtawn a media platform anei theina ding a S. Nengkhanlun in challenges (tha-le-zung, sum-le-pai a hamsatna etc) tuomtuom a maituote palsan a tuni'a 13th Anniversary program lawchingtah a zahthei ahina tung ah mimal tah in kipahpi thu phuong in Zou literature kepbitna ding a theitawp suotou zel ding in adeisah thu gen hi.

Tualeh Pu Michael Ginzasuan, Advisor, Zogam Today in zong Editorial Staff -te patat thu gen in, maban ah zong supporter group pichinsuo a I newspaper uh hinsuo na ding ngaisut poimaw chi hi. Alangkhat ah Editor & Publisher, Zogam Today in social media influence zieh in India gamsung mun tuuomtuom ah small & medium newspaper a tamzawte survive jou nawnlou in sihbeita a, tuakawmkal a tuni'a Zogam Today in subscriber tamloute leh well-wisher te zieh a 13th Anniversary program zahthei a um ahidan gen in naupang noukhat hinanleh journalism line a alutna nung kum 25 bang chingtou ta chi hi.

Zogam Today daily newspaper ahileh October 30, 2012 a patkhiet ahi'a, tuami masang in Zopatong, Zogam Th usuo, Zogam Today weekly/monthly etc. ah kum tampi ana semtou chi hi. Program ahileh UZO GHQ, ZYO GHQ, ZSP GHQ lamkaite leh wellwisher te'n uop a, Rev. Dr. SK. Manlun in thumsahna leh annkuong latna nei hi.

Zogam Today 13th Anniversary kipahpina in Rev. Dr. SK. Manlun leh a innkuonte’n kalkhat newspaper print man ding in panpina bawl ua, tuaban ah Pu S. Dalthang, Pu Thangsuankhup, Treasuer UZO GHQ; Pu Dr. Lincoln Zou, PRO, MLA/Singngat; Upa M. John Zou, Secy (External) UZO GHQ leh UZO GHQ te’n sum-le-pai in phungvuh uhi.