To all Well-Wishers! ~ Lt.Col. Muan Zou

INNSUNG hahsa leh genthei tah akon hung pieng a hung khanglen kahin, hahsatah in lekha kahin sim in; janmang tobang student life kahin mang tou in, Van leh Leiset sempa Chung Pathen vangbohna chang in BA kahin chai kum chet in Combined Defence Exam a lolhing in Indian Army kahin join tai.

Senneo apat nehding changei neilou va, abang kom leh school a gilkiel a ka kana jong ana um ahin, Pathen jal a leiset hinkho adia lolhinna kahin chanjou  chun genthei liengvai ho kalungset in, kavejou jipon; posting kana chena jouse ah genthei liengvai ho kabolthei chan in kana kithopi jing in, nei leh lam jeh a mivaicha noise a ima a simlou kiti hi kaneo apat leh tuni chan gei a kadeilou jing ahi. 

Eimite society sung ah tunichan in “Haves and Have Not” kikhenna a umjing in, hiche social media lah dung a jong muthei jing ahi. Neolai hinkho a kipat Nam kana ngailu jing in, kachena jouse ah jong Nam ka ngailutna umjing ahi. Tuchung ehsan gal in jong ka natohna anople boi tahen ti changei a kapan jing ahin, koima kom a kanaseilou, kana panlah najeh a Army Chief changei a report a kana um ahin, hinlah senior officer khat hung a eihin kimupin, aban aboi ima ana um tapoi. 

Kahung retired jouva Youtube kahin bol hin gam leh nam adia thilpha tamtah leh mipite lungel a khahlo na ahung umding, thu leh la hetthem lou ho hilchet na, lamkai te natoh thilbol ho accountable hisah a nampi movement ahiding bang a achesah ding tihi keima lungtup leh deidan ana hijing ahi. Sepoy pension hivang a kingol tei teilou ahi. USA leh Israel ah ex-military officer ho President leh Prime Minister muthei ding atam in, MNF movement hin pandoh a Mizoram state hin mudoh jong Havildar retired khat ahi. Eimite lah a jong tuni chan in society sung a hopsom kitup tah a pejing leh society a kineppi umtah chu ex-servicemen ho hijing uh ahi. Mikhat a natohna jeh a noise vang thil dihlou hiding ahi. 

Youtube talkshow kahin bol teng leh keima background jeh in govt a level sangtah a ana kive jing, adeh in Army lang a level sangtah a pao-le ho mangcha a ana kivejing ahi tijong kahailou ahi. Hinlah hiche ho jeh tah a jong idinmun uleh movement hou ichan ham khat a lamkai hon ahet jing uh ahi tijong mipite hetdia kadei ahi. 

Seithei leh seithei lou, authority ten ana hetdiu va kadei, gamsung law and order adia boilou ding tiho jong kahet mama ahin; milham khat lungel sang a sangjep a gelchil set a kabol jong um ahinai. Chuleh Vahshy leh LJT ho bep2 toh kihouthei tia seihon nampi sung vai ahin hop diu vang tijat umtah hiding ahi. Nam sung a kibung khenna hung um intin, ahao-avai a kikhenna hung um intin, abolthei-aboltheilou tia kikhenna hung umding, namsung khangtou thei lou ding ahi, among a jong genthei tah a hung khanglen kahijeh a koima noise leh khentum nei ngailou kahin, hitobang a natong ho jong keima deina toh kitoh lou ahi. 

Gam leh Nam adia pan lah jing ding ahin, eima bolthei nalam cheh a pan lah jing ding; THIP BEH-BEH A UM jong Nampi natohna khat ahi ti jong haimil lou hel ding ahi. ~ Lt.Col. Muam Zou

*via  W/A.

Share: