Kitheihsiam tuahna omlou Peace in bangmah tan hon tunlou ding

May 3, 2023 a i buaikhiakma a Manipur hill district-te a thiltungte abik in Reserved Forest, Protected, Wetland leh adangdangte mangngilh baih na lawmlawm hang e maw! 

Meitei government ah leadership kikhek zel mahleh "thawl thak a zu lui thun" (old wine in new bottle) toh kibang hilel ahi.

Meitei government ma a va kun a, "lemna leh muanna ka deih uh, nam tuamtuamte kituaktak a tenkhawm nawn ka lunggulh uh" chih i va genma a Meitei government in hon hih masak ding om hilou maw?  

"Meiteite'n Scheduled Tribes status demand ka tawpsan ding uh, hill district-te'n constitution provision nuai a land, rights leh cultural protection aneih theihna ding un Article 371-C pansan in Sixth Scheduled piak ahi ding chih tan bek hon tah (offer) ua, huai offer pen eilawi in i pomleh kilemna om thei pan ding hizaw hi.

Huai ban ah Meitei government toh kilemna in a contents ngeingei ding tuh Meiteite'n ganhing bangmai a hon thah uh mohna neilou mi 200 valte zangna-dopna leh kitunding nawnna ding piak ding, namkal buaina ziak a liam-le-baite a kivakna ding uh amau septheih toh kituak nna piak ding, namkal buaina ziak a case/FIR chiamteh a om teng zukkik ding leh suangkultangte khahkhiak ding, biakinn 300 val leh tenna inn-le-lou a sang a sim haltum leh hihsiat a omte compensation piak ding leh IDP-te ading rehabilitation package hoihtak bawlsak ding chihte a tel ngeingei ding ahi.

A tung a thute ah kilemna leh thukimna om masalou a peace leh communal harmony omsak ding deih chi a Kuki Inpi, Thadou Inpi, Hmar Inpui leh Zomi Council in a tuam chiat a Meitei government ah tuitum zaw hih sawm a i kidemtuah laiteng uh lemna leh muanna detdou om thei ngeilou ding hi.

Central leh Meitei government in Zomi, Kuki leh Hmar chi in community wise in kilemna hon bawlpih ngeilou ding a, Manipur government nuai a Ministerial berth i delhdelh un leng i buaina uh vengsak tuanlou ding hi. Huaiziak in pangkhawm a i core issues uh hivengna ding solution khat i paipihkhawm theihma teng uh normalcy, free movement leh peace chihte om theilou ding hi. 

Maipha zong kisa a nampuan va batsaksak leng tu hun ading in poimoh lou a, Meitei Chief Minister lungsim zong a sial, bawng, kel, belam leh ak a va kithoihthoih leng ngailou hi. I buaina uh pailel Zomi leh Manipur government kilemna leh kitheihsiamna ziak a veng ding hilou a, Hmar leh Kuki/ Thadou comminity-te'n a tuam a government toh kilemna leh kitheihsiamna aneih ziak ua veng ding leng hilou hi.

Chief Minister leh a cabinet member-te'n a political career humbitna leh a minhoihna ding un i gen-gen hon Amen kha mah un teh himahleh Meitei mi nautangte leh Arambai Tenggol te'n ading in "mit a nin om" bang kihikha mohlou ding hi.

Separate Administration demand apan District Demand, District Demand apan Multi-utility Hall demand a maw i kiak tel lawmlawm ding uh. 

Mohna neilou numei leh naupangte sisan kimawlpih in selfish politics sai nawnkei ni.

~ WAP