Lamka, Dec 15: Thangkhal Sinlai Pawlpi (TSP) in ahing tung ding December 18 (Tue) ni chieng Lamka apat 17 km vel a gamla, S. Geltui khuo (Singngat sub-div) ah kum 25 chinna Silver Jubilee thupi tahin lawm ding uhi. Tami Jubilee ah Singngat MLA Ginsuanhau, Thangkhenhang (Chief of S. Zezaw) leh S. Lianzamang (Chief of S. Geltui) te'n Chief Guest, Functional President leh Chief Host hina toh uop ding ua, Ginsuanhau in TSP Silver Jubilee muolsuong hong ding hi chi'n S. Lianzalal, chairman, TSP Silver Jubilee Committee in Zogam Today hil hi.
Sun hun programme ah Chinminlian leh Ngaisoniang compere hiding ua, Zan hun (Musical Night) ah Lianminthang compere hi ding. Tami musical night ah Grace Zamnu, Muallum MDC, Suanchinpau Guite, Lungthul MDC, Siandong, Singngnat MDC, Tongkai Baite, Saingaikot MDC, T. Goukhomang, president, Zomi Youth Association (ZYA) Gen Hqtrs leh Pauminlianthang, president, Thangkhal Peoples' Organisation, Manipur te'n Special Guests hina toh uop ding uh chi Lianlal apat kiza hi.
Thangkhal Sinlai Pawlpi (TSP) ahileh October 31, 1989 nin "Dihtatna in nam a tawisang" (Prov. 14:34) chi thupi pansan a ana ding khia, founders – T. Kamsuanlal (tulel a MELC Delhi pastor), Thangsuanhang (Lecturer, Lawngtlai Govt College, Mizoram), Mangminthang (tua pastor), Khupsuanhau (M. Tanglian) leh Khuplam (S. Geltui) – te'n ana phukhiet uh hi'n gen uhi.
Zou sung a ham chi tuomtuom – Khuongnung, Haidawi, Tungkuo, Khodai leh Thangkhal – lah ah i unau Thangkhalte a piching khat a suo uhi. Unau Thangkhalte ahileh 1978 kum apatin Thangkhal Peoples' Organisation (TPO) chi'n ana kikhaikhawm ua, March 4, 1984 in M. Tanglian khuo ah Thangkhal Christian Association (TCA) chi'n hattuom khat ana um uhi.
I Zoupih unau Thangkhal te'n Chin hills a Thangkhal khuo a nuasia zaw un, Hausapi vum gei a um Mulaam (Mulam) khuo ang sat uhi. Tua khu Manipur a ateen khawm masatna uh, 1836 vel hidia gintat ahi. Tami khuo a tenlai un Sukte Inpi Pu Thuamkholian in unau Thangkhalte ana beel a, amapa khu hausa (chief) in ana pang sah kia uhi. Pu Thuamkholian khu Thangkhal khuo a ahausapa uh ana hi a, ama ahileh Chin Hills a Sukte Lal ana kigen minthang, Pu Khanthuam tapa 8 lahah a 5-na ahi. Ama'n Thangkhal te'n Thangkhal khuo anuasia tah chieng nuomsa nawnlou leh gaalmuong kisah nawnlou in abeh-le-phung leh a silate khenkhat toh Mulam a unau Thangkhalte hing beel hi'n kigen hi. Tuachia Mulaam ang teen lai un Manipur leengpa'n Kom mi bumsiem khat, Thatsiak kichi Mulam a teengte (Meitei Lengpa'n Kamhau mite chia ana zaau mama a kigen) bum di'n sawl a, tuachi'n Pu Thuamkholian zi leh tate (tanu ngen) ban ah ami asate khatkhat in shi bei uhi. Atawp khawng in Pu Thuamkholian in Chin hills lam zawt san hi'n unau Thangkhal te'n a tangthu uh Zogam Today kungah gen uhi.
Unau Thangkhal te'n Mulam apat Old Khaukual (1846), Tuidam (1910), T. Khajang (1915), Gangpimual (1915), T. Khuangkhai (1920), Khuainuai (1930), Hiangtam Khonou (1938), Suangkuang (1940), S. Kullian (1940), Tuibuang (1946), Ngoiphai (1946), M. Tanglian (1947), Saiboh (1950), M. Khuangmun (1951), M. Khaukual (1955), S. Belbing (1960), Teikot (1969), Phaisan (1970), M. Buangmun (1971), S. Geltui (1971), S. Munhoih (1973), Teisalzang (1975), M.T. Geltam (1975), T. Kotlian (1975), V. Suangzang (1980), Zoukhuonuam (1996), Goshem (1998), S. Phaiza (2006) leh M. Saizang (2006) banah Singheu, S. Muallum, S. Zezaw, Zouveng leh Zahong khuo hing sat/luoh toutou uh chi'n zong gen uhi.
Unau Thangkhal te'n Pasian thu 1939 kumin Convention Saptuam (tua EBC) a evangelist Thongluan apat ana zui uhi. 2010 kumin New Testament Bible zong amau ham in kinei ta uhi.
Courtesy: ZOGAM TODAY, December 16, 2012
|
No comments:
Post a Comment
Comments not related to the topic will be removed immediately.