GAZA (Palestine) GAM BUAINA TOH KISAI NA THEINA BELAP IN

✍️  S. Thangzakap, M.Div., Bangalore

LEITUNG a thupiang la piang tulel lel in tampi om ta ma lehzong, Gaza leh Israel gal kan a khovel a nawkzou leh tok lingzou ding thu piang dang omlou hi. Ningkum October date 7 ni zingsang lam in Israel te Sabbath ni in thakhat thu in Hamas te’n Al aqusah flood chi minvoh in Israelte surprise attack bawlkhum uhi. Tua attack na a mi tampi shi leh liam om hi. Tualeh mi bangza hiam te zong salmat in Gaza gam ah zohpi uh. Tualeh hih suprise attack ziak in Israel Prime Minister Benjamin Netanyahu in Hamas te tungah Operation Iron Dome chi minvoh in gal phuang khum hi. Tua ahiman tuni tan in hih gal pen paitou lai a, Gaza lam hi in Israel lam hitaleh mi sang val tuak shi khin ta uhi. Tualeh hih gal pen mi pawl khat te’n galpi thumna hung kipat nang ahi achi uhi. Tualeh khenkhat te’n Laisiangthou a zawlnei te thugen tangtunna ahi achi uhi. Hih gal ziak in adiak in tumlam gam te a Palestine Supporter leh Israel Supporter te zong nakpi’n kinawk tua uhi. History theichian lou mi pawkhat te’n Israelte nakpi’n mohsak zouta uhi, aziak hih gam pen Palestine gam ahi, Israel gam ih chihpen aomna nai lai ahi chi uhi. Ahinlah history hoih deuh a thei te’n Palestine gam teng zong Israel gam ahihlam thei kit uhi. Bangteng hileh akibuaina uh pen bangma dang hilou in gam leitang ziak ahi chi chu michin in kithei chiat hi.

A chiangzaw sem a ih theithei na ding un abul abal kan chet angai ding hi. Tuaziak in ih thei dandan in hih Palestine gam ihchi amaw Gaza ihchi amaw ahung piankhiat dan leh kua te khutnuai ah ana om e, chite aban ban in ih enn suk suk ding uhi.

PALESTINE: Palestine ih chi min ahinleh Rome kumpi Hadrian in ana patkhiat min ahi. Tua masang in Palestine chi min om khalou hi. 3rd Century A.D in Israelte in Bar Kochba lamkaina nuai a revolt hung bawl ua Rome kumpi hung dou uhi. Ahinlah vangsiathuai tak in Rome sepaih te khut ah tampi in ahinna uh ana tanloh uhi. Tualeh hih revolt pen history a Israelte a ding a last revolt in kichiam teh hi. Hih revolt ziak in Israelte tampi in shihna tuak uhi. Ashiloute mat in om uhi, tualeh a damlai sun teng tumlam gamah a tai mang ta uhi. Tualeh hih gal zoh in Rome kumpi Hadrian in Israel mite leh a biakna te uh sukbei sawm in nakipi in pan hung la hi. Tuachi’n Israelte dan sinna skulte susiat sak uhi. Tualeh hih Judea gam achi uh, Israel gam pen Palestine chi’n hung khek thak uhi. Tuachi’n hih Palestine min hung piangkhia a tuni tan in omden lai hi. 

Ahinlah Laisiangthou a Palestine omlou hi. Tuaziak in a min masa te tungtawn in a tangthu ih sut ding uhi. Amin tutan a omlai pen ahileh Gaza (Palestine) ahi a tualeh hih Gaza (Palestine) pen Llaisiangthou sungah om ahimanin Gaza chin min toh a tangthu ih sut masa ding uhi. 

Gaza pen khopi upa mahmah leh historical events tampi ana tung na mun ahi. Tulel in hi Gaza khopi Muslim te khop himaleh Laisiangthou hunlai in Cannan mite khopi ahi. A tangthu detail deuh in ih hithei dandan in tamlou ih enn suk ding uhi.

Gaza kichi gam ahileh Pasian in Israelte kiang a piak ding a ana chiam na Kanna gam a leng gam khat ahi (Princely state). Cannan gam Pasian in Israel tate a ding a achiam sa gam pen gam baisa hilou hi, gam awng leh miten louna gam hilou hi. Cannan gam ah mi nam 7 teng hi. Tualeh hih gamchiam gam a teng mi leh nam te delkhia mang leh that mangsiang a Israel te’n gamchiam alua ding uh ahi.

Gaza gam lua masa te

Atung in Gaza khopi ahileh Avvim mite khopi ahi (Deuteronomy 2:23). Laisiangthou in hih Avvim mite bangchi bang mi e chi hung gen chiang lou hi. Tualeh hun bangtan hiam nung in Caphtorim mite hung khang khia in hih Avvim mite athai mang ua, tuachi’n amah un Gaza gam ah hung teeng uhi. Tualeh hih Caphtorim mite apat in Philistian mite hung piangkhia hi (Genesis 10:14 /ESV).     Tuaziak in Gaza pen Phillestian te khopi hung suak hi. Tualeh Thukhunlui hun lai in Phillestian te in khopi nga nei uhi, tuate ahileh Gaza, Ashkelon, Ekron, Gath leh Ashdod te ahi uhi. Tualeh hiteng lak a khopi poimoh pen ahileh Gaza ahi. Tualeh Phillestian te pasian poimoh pen ahileh Dagon ahi.

 Thei ding a poimoh: Gaza (Palestine) gam luah tu te:

       1. Avvim te

       2. Philestian te

       3. Greek te (Alexander conquest hun in)

       4. Rome te (Roman Empire hun in)

       5. Muslim te (Crusade hun in)

PHILISTIAN MITE LEH ISRAEL MITE (Vaihomte hun in)

Israelte Cannan gam hung lut khit nung un gam hung hawm uhi, tualeh hih Gaza gam pen Judah nam te in tang kha uhi (Joshua:15:47). Tualeh gam ahawmzoh un Judah te awl awl in agam amah ua ding a kipia teng hung lua tou tou uhi. Tuachin Gaza, Ashkelon leh Ekron mual gam te hung lua zou uhi, ahinlah phaijang gam te luah zoulou uhi, aziak hih gamkai mite in sik sakol lengkai nei uhi (Judges 1:18-19). 

A lua zoulou na ziak uh ahileh sik sakol lengkai ziak hilou in Pasian amuan ngamlou man uh hizaw hi. Aziak Pasian in a gam pia khin ta hi, tualeh agam aluahthei na ding un Pasian muang kawm a agam a teng mite a tha bei mang ding uh ahi. Ahinlah Israel mite’n Pasian thupiak zui zoulou hi. Judah te guak hilou in namdang bangzah hiam in zong a tenna na ding ua kipa gam a teng mite delkhia zoulou uhi. Manasseh, Ephraim, Zebulun, Asher leh Naptali hih nam nam te in zong agam mite delkhia zoulou uhi (Judges 1:27-33).

Tualeh hun hung pai tou zel in Israel mite’n a melma te uh delkhia zoulou uhi, tua ziak in a melma te uh khut ah salmat in hung om uhi. Vaihawmtu Jair zoh in Israel mite Philistian te khut ah kum 18 sung saltang in om uhi (Judges 10:7-8).

Tualeh Vaihawmtu Abdon zoh in zong Israel te Philistian te khut ah kum 40 saltang in omkik uhi (Judges 13:1).

Vaihawmtu lahi Siampi lahi Eli hun in Philistian te leh Israel te hung kidou uhi. Kidouna ah Israel te gal zoulou zaw uh ahi man un, Pasian bawm vala uhi. Ahinlah amah uh gintat bang talou hi, galnang zoulou in gallel uhi, tua ni in Israel sepaih mi sang sawm thum si hi. Tua bek thamlou in a suan mah mah uh Pasain bawm pen agal te un mat sak uhi. Tuaziak in tuani pen vaihawm mite hun sung a ding a vangsiat ni pen ahi ding hi. Gal ah Eli ta tegel Hopni leh Phinehas zong shi hi, tualeh Pasian bawm Philistian te’n amat thu uh Eli in azak chiang in amah zong shi ngal hi. Tua leh tuani in Phinehas zi in tapa khat nei hi, ahinlah a pasal leh a inpipa leh Pasain bawm aom nawnlou athei chiang in daseng leh lunggim seng seng ahi ding hi, atapa min di’n Ichabod chi’n aphuak hi, akhiatna ahileh, “Thupina in Israel taisan chi na ahi” (I Samuel 4:1-22).

ISRAEL KUMPI TE LEH PHILISTIAN TE (United Kingdom)

Kumpi Saul hun in Phillestian te toh Israel te pen kidou den uhi. Saul leh atapa Jonathan te’n Phillestian te ana zou uhi (I Samuel 14:22-23,31). Tualeh David in Phillestian te mihatpa Goliath zong that a, tuachin Israel mite in Phillestian te ana del mang uhi (I Samuel 17:50-54). Ahinlah gal hung om kit zel a tuachin  tua gal ah Phillestian te’n Saul leh atapa thum teng Gilbo mual a that siang uhi (I Samuel 31:8-9).

David kumpi ahi masang in Saul akipat atai mang lai in Phillestian kumpi Achish kiang ah kum khat leh kha li va om hi (I Samuel 27:7). Ahinlah Phillestian mite’n David ahihna athei tak un bangma loh lou in a khakhia ta uhi (I Samuel 29).

Tualeh hun sawt lou nung in David Israel kumpi ahung hita hi. Philestian te’n David kumpi ahi athei un David zong ding in hung kuan uhi. Tualeh gal hung om a David in Phillestian te a zou ta hi (II Samuel 5:20). Kumpi Solomon hun in Phillestian te ana zou kit hi, tualeh amah uh tung ah vai ana hawm khum hi (I king 4:24).

DIVIDED KINGDOM leh PHILISTIAN TE:

Kumpi Jehoram hun in Pasian in a mohna uh hang in Phillestian te khut ah ana piakhia kik hi. Tuachin Phillestian te leh Arabian te hung kuan in Judah hung sim ua, tualeh lengpa inn a van teng leh atapa te (Jehoahaz atapa tum pen chilou) leh a zite pum in salmat in apui mang ta uhi (II Chronicles 21:16-17).

Uzziah Judah kumpi ahilai in Philistian te va dou in tualeh a kulh baang te uh va susia hi, tualeh a a gamsung ua khopi zong va bawl uhi (II Chronicles 26:6). Ahinlah, kumpi Ahaz hun in Phillestian te hung khang khia kik uhi. Tuachin Judah te tungah gal hung bawl kik uhi. Galzaw in Judah gam bangzahiam te lak sak kik uhi (II Chronicles 28:18).

 ALEXANDER THE GREAT

Alexander the great Greek/Greece kumpipa hun in leitung gam tampi tung ah vai hung hawm hi. Tualeh Gaza zong va luh a tua leh zou hi. Ahinlah akhopi susia lou in Greek culture leh philosophy zilna mun in zang hi. Tua leh Alexander a shizoh in a lenggam pen a sepaih general Li te kihom uhi. Tualeh hih Israel gam kimkot teng ah vaihawm ding in Ptolemy leh Selucus/Selecuid te gal in kinei den uhi. Tualeh atawp khong in Selecus te’n gal zou in Cannan gam leh a kimkot a gamte tung a vaihawm uhi. Tualeh hih Selecus teh vaihawmna nuai ah Gaza hung om kik hi.

HASMONEAN PERIOD

Selecus te’n kum bangtan hiam Cannan gam tuam a vaihawm nung un Israelte in helna hung bawl uhi. Aziak a biakinn ua vok luang bangzah e khat toh a biakbuk uh (Zerubabel Temple) su nin sak uhi. Tuaziak in Judah Meccabes te pata teng in helna hung pan uhi. Bangtan hiam nung in hih a revolt movement uh hung hat sem sem hi. Tuachin atop in Selecus te paikhia in zalenna mu uhi. Tualeh hih a zalen hun sung kum bangzah hiam sung teng Hasmonean period kichi hi. Tuachin Israel mite in zalenna nga in mani kivaihawm uhi, tualeh Gaza gam lam zong vaihawm khum uhi.

ROMAN EMPIRE

Hun bangtan hiam zoh in Rome te hung khangkhia hi, tuachin Rome army general Pompey in Israel hung dou in zou hi. Tuachin Hasmonean period a hung bei kik a Roman period hung kipan kik hi. Tualeh atawm lam a gen in Israel gam hi in Gaza (palestine) gam hitaleh Rome kumpi te khutnuai ah hung om uhi. Tualeh Rome kumpi Hadrian in hih Israel gam teng (holy land) amin PALESTINE chin hung khek thak hi.

MUSLIM

Rome Lal Gam A.D 476/467 vel in hung puksia hi.Tuachin hih Israel gam leh akimkot a gamte gam zalen hung suak uhi. Ahinlha hih hun in Israelte a gam ua om nonlou uhi. Rome kumpi Hadrian hun in Israel te’n last revolt Bar Kochba lamkaina nuai ah na nei uhi. Ahinlah vangsiat huai tak in ana zouta kei uhi. Tua gal a Israelte mitampi ashi uhi, tualeh ashi leh adam sun sun teng tumlam gam leh Africa ah ataimang siang ta uhi. Rome Lal Gam a puksiat nung bangtan hiam nung in Muslim te’n hih Israel gam leh a kimkot hung luah uhi. Catholic te toh tamveipi hih gam kitu in ana kihau uhi. Tualeh hi dan a Muslim te leh Catholic te hih gam siangthou kituh a akihauna pen uh Crusade kichi hi.

OTTOMAN EMPIRE

Ottoman Empire 12 leh 13 century A.D in Turkey gam ah hung khang a, tualeh awl awl in hih Ottoman Leng te Muslim gam te tung ah hung vaihawm uhi. Atomlam a gen in 16 century in hih Gaza (Palestine) gam tung ah zong vaihawm khum uhi. Tualeh galpi khatna hung kipan a, galpi ah Ottoman Leng te leh gal ah a support gam Germany te’n gal lel uhi. Atomlam a gen in 1922 in hih empire hung bei kik hi.

BRITISH EMPIRE

Ottoman Empire a hung puksiat nung in hih Israel gam leh Gaza (Palestine) gam teng tung ah British te’n vaihawm khum uhi. Tualeh hih Israel gam pen Palestine gam chi’n hung sam kik uhi. Tua hunlai in Israelte zong hih gam a tampi hung tung kik ta uhi. Tumlam gam a bawl siatna tampi te ziak in tampi in Zionist movement pansan in hih Israel gam ah Israel State dinkik na di’n pan nasa tak in hung la uhi. Tualeh a tomlam a gen in Gapi Nihna (World War II) zoh in British te’n Israelte zalenna hung pia uhi, tuachin Israel gam hung piang khia hi.

EGYPT EMPIRE

May 14, 1948 in Israel in zalenna ngah uhi, tualeh zalenna a ngah zoh uh a zingni in Arab gam te toh gal nei ngal uhi. Tualeh Israel in Cannan gam teng abon in lua zou lou hi. Tua hun in Gaza (Palestine) gam pen Egypt military vaihawmna nuai ah hung om tou kik hi (1948-1967 sung). Tualeh 1967 a Six Day War (Yomkipur War) ah Israel in hih Gaza (Palestine) gam te Egypt khut apat in lakhia zou hi. Ahinlah kilemna dungzui in Sinai Peninsula gamkai Egypt khut ah pia kik uhi, ahinlah Gaza (Palestine) gam pen a Israel khutnuai ah hung om hi. 

ISRAEL VAIHOM NA

1967 a Yomkipur War (Six Day War) zoh apat in hih Gaza (Palestine) gam pen Israel te khutnuai ah hung om uhi. Tuachin hih gam pen Israel in vaihawm khum uhi. Tualeh Israel sepaih te zong tampi hih gamsung ah om uhi. Ahinlah atomlam a gen in 1993 in Israel toh Palestine Liberation Organisation (PLO) ten Oslo Accord kichi kilemna suai hung kai thei uhi. Tualeh hih accord dungzui in Israel sepaih te’n Gaza (Palestine) pawt san uhi. Tuachin 1994 in Palestine in Independence phuang uhi. Tuachin amah ule ama uh kivaihawm gam hung suak thei uhi.

HAMAS leh PALESTINE

Kum bangtan hiam nung in Hamas te hung khang khia kik uhi, tualeh tha khatthu in 2006 in election hung tuh ua, hung zou tou ngal uhi. Tuachin Palestine gam vaihawmna pen Hamas te khut ah hung om a, tuni tan in om den lai hi. Tualeh Hamas te’n election a zoh ua pat in tuni tan in election om kik nailou hi. Hamasa te’n vaihomna ahung tang kik nung ua kipat in Israel leh Palestine buaina hung kipan kik hi. Aziak Hamas te ahileh pure Palestinians hilou uhi, amah uh ahileh anti Jews militant groups ahi uhi. Tualeh U.N in zong terrorist group a aphuang khit sa ahi.

GAZA LEH ZAWLNEI TE GENKHOLHNA

Old Testament a zawlneite in atangpi in genkholhna gen chiat uhi. Tualeh a thei bailam ding in Old Testament a zawlneite thugen teng a kan khawmtu lianpen ahileh Toupa Ni (The day of the Lord) ahi. Tua Toupa Ni pen khenpi ni in kikhen  thei hi -- Anai (Near day ) leh  Topa Ni Thupi (Great and awesome day of the Lord). Tualeh Toupa Ni ih chi pen Thukhenna Ni leh maban a thil hung tung ding te kum sang lenggam, leithak vanthak te  genna ahi. Hih Toupa Ni anai pen sung ah Pasian vaihawmna leh Thukhenna tung ding te kimuthei hi, tua te ahileh atamzaw tangtung khin ta hi. Hih Anai Ni in Judah lenggam, Israel lenggam, Babylon lenggam, Assyrian lenggam, Moab, Phillestian, Edom leh adang Israel melma te tung a Pasian thukhenna tung ding te genna  ahi, tualeh atamzaw tangtung siang khin ta hi.Tualeh Topa Ni Thupi pen ahileh hung tung nai lou ahi.

Gaza toh kisai in Pasian thukhenna leh gawtna tung ding te Zawlnei nga in ana genkhol uhi.Tu in nga lak a thum te a ih enkhawm ding uhi.

 1. Zechariah: 9:5 

Phillestian te khopi nga lak a ni tung a thukhenna tung ding kimu thei hi.

Gaza tungtang hichin ana gen hi, “Gaza a kipat in kumpipa a mangthang ding achi hi. Tualeh Ashkelon pen ten lou na gam suak ding ach hi”.

2. Zephaniah:2:4-7

Khopi thum tung a Pasian thukhenna tung ding kimuthei hi. Zawlnei Zephaniah in hichin ana gen kik hi. “Gaza ki taisan ding hi. Tualeh Ashkelon pen hung hawm ding hi, tualeh Ekron pen ki phungkalh ding hi chi hi”.

 3. Amaos 1:6-8

Gaza khopi li teh tung a Pasain thukhenna tung ding te kimuthei hi.

 Gaza: Akulpi uh mei in ka hal ding Toupan achi hi.

Ashdod: Ashdod a teng teng ka pai khia ding.

Ashkelon:

Ekron: Ekron tung a ka khut a tu ding.

Hih Minor Prophet (zawlnei neu) te  tungtawn in Pasian thukhenna Gaza (Palestine ) khopi li tung ah tung ding ahi dan kimuthei hi.Tualeh question lian mah mah chu hih zawlnei te  thugen tangtun khin ta maw? Atung leh bang hun in? Atung nai keileh bang hun chia tung di chi pen tulai  tak a ih thei nop pen pen uh ahi.

History ih et chiang in Judah kumpi Uzziah hun in khatvei va dou uhi, tualeh Phillestian te khopi nga lak a khat susia uhi (Gath khopi, II chronicles 26:6) tualeh li teng pen gen khak in omlou uhi. Tuaziak mah zong ahi ding hi, zawlnei te’n Pasian vaihawmna tung na ding agen na lak ua zong hih Gath khopi min kimu kha nawnlou hi.

Hun hung pai tou zel in BC 332 vel in Alexander the great in Phillestian gam (Gaza/ Palestine) va luh in zou hi, ahinlah susia lou hi. Tua nak sang in Greek culture leh philosophy zilna mun suak sak hi.

 Tualeh Maccabean Revolt hung om a, Judah te’n Selecuid/Selecus vaihawmtute hung zou uhi. Tuachin Israel lenggam hi’n Phillestian lenggam te amah uh thuneina nuai ah om uhi. Ahinlah hih hun ah zong Zawlnei te thugen complete destruction (Suksiat dim dem na) pen muthei in om nai tuan lou hi.

Rome te hun, hung tung tou a, Muslim te hun British te hun tan tadong in complete destruction pen tang tung kim lou hi. Partial fulfilment chu om mah, ahinlah complete fulfilment pen tu tadi in muthei in om nailou hi.

Complete fulfilment a tung nailou na ding a gintatna ziak te:

a) Complete destruction om nailou.

b) Zawlnei te thugen a complete destruction hung om dia tua zoh chiang in Israel mi a gam a hung kileh kik te’n hih gam te ah teeng ding uhi achi uhi.

History ih et kik Chiang in Judah te Three Return ana om a ahinlah tua return te a hih zawlnei te thugen complete fulfilment kimu lou hi. Tuaziak in hih Gaza leh Ashkelon teh tung a Pasian thukhenna tung ding pen a bukim tadi nailou phot chi ding ahi. Ahinlah bang hun chiang a hung tang tung kim  ding ahia chi pen gen thei lou ahi.

Israel prime minister Benjamin Netanyahu thu gen te leh Zawlneite thugen etkakna:

Zawlneite in Gaza leh Ashkelon siat didan limtak in hung gen uhi, tua leh tulel a hih gal a Israel prime minister-pa thugen pawl khat ih zak te bang ahia, ih chileh Gaza pen suksiat dimdem di chi ahi. Ten theilouna suak sak di chi ahi. Hih gal pen Israel in pan lou a, ahinlah zou ding hi chi kik hi. Tualeh hih gal dou di’n tu’n Israel sepaih (IDF) te mi 300000 Gaza tuam ah om khin ta ua, tualeh ground operation zong mun pawl khat a pan lel lel ta uhi. Tua leh defence minister-pa in tua bang mah in gen hi. Ahinlah hih gel thugen pen zawlnei te thugen tangtunna ih chi thei tuan kei uhi. Tua ziak in hih pen ei mani mihing pilna leh siamna toh mawk genthei thil hilou ahi. Ahinlah Pasian in a utleh ami te mah zang a Zawlneite thugen tangtung kim sak thei veh veh ahi. Tualeh tu tadi in Israelte in Gaza a tenna inn sang nga val susia ta uhi. Tualeh a suksiatna nung uh ih etleh nasia mah mah a, ten kik theina ding hinawn lou hi, tualeh hih gal ziak in Israel in Gaza (Palestine) a ding thautui, neek leh taak ding leh electric supply teng khak tan hi. Tua kawmkal ah Gaza (Palestine) border a om Muslim gam Jordan leh Egypt government in Gaza refugees te dei lou uh ban ah refugee la utlou uh ahidan gen khia uhi. Tua ziak in Gaza (Palestine) mipi te maban chu gen hak mah mah phot ahi tamai hi. Bangteng hileh Pa lem gel dan dan in thil bangkim hung om tou tou na ding hi.

Thukhitna

Hih gal toh kisai in bangmah ih bawl thei aom kei hi. Hinlah hih gal ziak in mi tampi te adiak in ei Christian te hung lung phawng sak hi. Zion a pengkul a mutna video vel uh ih muh chiang un mitampi te’n huntawp na ding leh galpi thumna hung kipatna ding, rapture hung tung ding, Antichrist hung pai ding chite gen leh sak in om hi. Tualeh social media ah hih thupiang lapiang teh ziak in Pasian thugen leh prophecy gen zong hung tam hi. Tuajiak in pilvang zong poimoh mah mah ding ahi. Athugen teng uh adiklou leh lak taklou china hituan lou hi, ahinlah Laisiangthou toh akituak nai chi hi vel chet ding pen poimoh zaw hi. Tualeh tuasa’ng in ei mahni hundamna kivel chet phat ding poimoh zaw hi. Aziak bangthu bangla piang ta maleh zong ei hutdam a ih om nak leh lau ding bangmah om lou hi. Tua ziak in ei mani mimal ginna leh ih hutdamna dinmun kivel chet zawk ding pen poimoh zaw tham hi.

Asim kha teng pasian in thupha hung pia ta hen.

~ TBCD NEWSLETTER | Sunday | 26 May 2024

 

 

Share: