2008 kum a Tuivai lui a ka sil tuah chimul thohuai

By:-

Hau Min Thang @Sonchiinpa

Hausaveng, Singngat

2008 kum August ha in Tuinuam khonuai a ka zanglou uah lawi (buffalo) enkol kawm in keimatang ka giah ahi. Bunou te ahoi kipat ding laitah leh haam (lounou) ho pat thei phial ta ahia, ni sa gua zulou in bunou te san pian in ni sa lel mama uhi. Tami hun laitah in Tuivai zong tui tamlou in nga behna nuam hun giap hi. Nitaah lang nai 3:00 pm ahi phot le nga annta ka nasep hi phot mai dan ave. Nga annta in mi ni leh thum bang luidung ah ki sutua in amun bang kitu bawlpian in ka om uhi. Ni khat ka Pusuan (GZS) in Minthang aw, zanlai dak 11 vel in na khuh lechin ngahat a lian tongtan te man ding na hi ang chi a, kei zong ka tha nuam mama hi. Khomui zul luikuang diap 6:00 pm in vial (round) khat khu kipan (lenpi toh nga annta khu) tuazou 8:00 vel ahi tadiai in nitaah ann nekhia, khawl tawldam in radio western music vel ngai kawm in zan nai 11 ka ngah chenchen mai hi. Ka imu kha a, zinglam 1:30 vel ana hi ta hi. Ka thungpi+ka bawm, tempong leh lenpi la in solha va singseng nuai ah ka kuan khia hi. (Ha vaah hoi muang in datmei ka keng sih hi). Pa Thangpu zanglou taw *tuangsuahli* ka gei suh ta a khunah gipgip gapgap phitphet parat chia thawm ging om a aki gengen te ade aw chi in chimul bang thou a zau huaisim vial hi. Awl awl in singkungpi bazam te ka en le *simbupi* sa ne khat ana mit de kelkul, abazam go ha vah in hoitah a sal kha na a natuang, oh ka thau om le pung chia hing kap khe ma ding hiveng chi in ka peisan a kalung amuong ta hi.

Ka nga annta abul pen Likhai lui tun ah kang kipan tou ta hi. A banban in kang khutou a, nga tamlou chu ka mansam ta hi, gintat banglou annta ki ne seng nonlou in sip vawt, munkhat ah *ngahat* gagap tan khat mansam ing'e. Tuachin, *tuangsuahli* kang phatou kia ta petma a, solha tang in asal kha lou *nalun* kungpi liim nuai mial ah a vom diahkhol mi hidia gintat khat ding zel tou zel ka mu hi. Awl a saisip kawm a houpi hiat hiat in koi na hiai? Bang bawl ne, mi na mah sa na mah? ka chi vang in asip a ei kidawng vawt sih hi. Tuaphet in ka *chimul thou* in kalu bang *ahhbawm* chia pha hile kilawm mawh hi. Kei zong *nimit* (minute) thum vel ka omna mun ah tou phot in mit phelou in ka en hi. A ki pia ngai in ki pia a, bang teng hi le va nai vang in va theichian vang chi in ka tempong lakhia in ka zuanphei ta hi. Ka nai ta mama a, a mun ka tun kuan *suongtum* khat la a ka se ma leh zuailah *singbul muatpi* khat ana hi. Kangthei chian phut a, kang hal/pil huai a, ni teng a suhpei toupei a ki mu hizenpi in... nui zat la huai, *theikhial* a keima ki zausah ka chi le ka thang la pai mama, hahaha...

A omdan chu solha vah in asal kha chet lou dailing bawh hui in asem hiauhiau in singbul pen alia zel, a dailing kung hui sem a kiloh zel pen in singbul pen kipia hidan a ka mu, touzel ding zel dan a ka mu ana hi vial avele. Solha va muang a ka torchlight puah lou in tamtan hing tun.

Next: Tuivai, Singtam lui tun a giah na.

Share: