KUA ZAWK NA MU CHIAN A, SABILTUNG MAW JESU

✍🏼  Rev. Rawna Kopsiam

Palm Sunday ni in Jesu Sabiltung tunga tuang in Jerusalem khuapi ah lut a,  mitampin a na vaidawn uhi. Khenkhatten Lampi ah a puante uh a phah ua, khenkhatten bel singsawl leh tumnahte tawi in na vaidawn uhi. Lampi a apuan phahte uh Sabiltung in hon sik phei mialmialta mai hi. Himahleh kuaman huai ah sabiltung hong pai i puanphahte uh a sik nin kha ding lakhia mai ni chilou hial uhi. Bangziak ahi di.

 Mipiten Sabiltung sangin Jesu muchian zaw uh chihna ahi ve.  A ngaihsutna uah Sabiltung sang in Jesu lian zaw,  Lampi a puan kiphahte Jesu sik bangbang in a lungsung uah ngaihsun thei mawk uhi. Min sabiltung hilou in Jesu mu chian zaw uhi.

Mi khat bike suakthak liklek tung a tuang in hong tai ding hi kichi leh mitam zaw ten chu bike tunga tuangpa sang in a bike pen munuam zaw kha ding uhi. Nak hoih e, bang model a, Kua companyte bawl a de aw. Bangzah man ei de aw chi in vanai et mahmah kha thei uhi. A bike a tuangpa sangin a bike pen mah na mu nuam zaw in a lungsim uh la zaw hi kha thei hi. Huai bike hong tai na ding lampi a puan vaphah hial om khol ken teh maw.

Palm Sunday ni in leng Sabiltung pen mu chian mahmah le uh zaw huai sabiltung siknit ding lel in zaw a puan uh a phah uh a gintak huai kei. Sabiltung tunga tuangpa a muh chet luat ziakun  sabiltung sik khak ding a puanphah lungkim mahmah lel uhi.

Zumhuai sim lah a nop a nuam thak khat ka thiltuah khak kon gen zenzen di aw. Shillong khuapi a om ESC te biakinn ah nitak khat thugentu dia chial a ka om man in ka vakikhawm hi. Kikhop tawp in na hon ngaina ua ka kipak lua chi in kikamsiam sak takin ka gen hi. Upa simta papi khat in hichin hon dawng hi. " Nang hilou, na sunga om na neih Jesu pen ahi ka ngaihnat uh chi".  Huai pa thugen ka zak tung in chu genkhial, paukhial kha lua kisa in ka zum sim man hi. Ahia ka ngaihtuah thak leh,  Ehe min ka sunga om ka neih Jesu mu uh, ka mel ah Jesu mel dawk kha eive maw chi in kipahna in ka dim a Toupa min ka phat thak hi.

Palm Sunday ni a Sabiltung pen zeldin thubawl in hichin gen sak uhi. A ni nawn a ngaihsak a a omlouh ziakin sabiltung in a lawmpa kiangah, lawm tuni bang chidan a le, kuaman hong thupi bawl nawn het kei ua chi in dong hi. A lawm sabiltung in Jesu toh na omkhawm ziak a min hong ngaina uh hilel e. Jesu toh om khawm gige lechin min nang hilou in Jesu mu ding ua hon ngaina ding uh ahi chi in dawng hi.

Dorca pawlten anntang pham a pham ban uah Jesu zintunna chi in pham belh lai pawl om uhi. Jesu muchian loute a ding in chu hiai Jesu zintun na chi a vapham belh sese chu ngaih poimoh huai khollou dih mah ahi chih sim phet in a om hi. Ahia sabiltung tunga tuangpa amuchiante a din zaw Jesu zintunna bawl haksa khol kei leh kilawm. Jesu mu chian loute a din bel anntang pham khong Dorcaten a zuak nawn maimai ding uh eive le. Jesun ne kha mahmah kei chi a pham utlou baihlam thou di eive maw. 

Huai mah bang in Biakinn, Pathian teenna munsiangthou ahi chih thei a, zahtak siamten Bible in Pathian hing Temple na hi uh a hon chih leng theisiam in kikem siangthou thei le uh kilawm maw.

Unau tukum Palm Sunday ni in Jesu na na mu kha tei hia. Hosanna chi a kikou naupangte leh tumnahte kia mu kha  in paungaihna a kikou pen bang bengseng a na sa maimah na hi hia le. Paungaihna  a ngaihtaka kikouten a pahtawi uh huai Jesu na na mukha hia.

Siahdongtu Zakai in mipi ziakin Jesu mu theilou himahleh a muh masiah lungkia mailou in zong den hi. Zakai in leng Jesu mufuh ka sa mahmah mai hi. Jesu a muh leh kikhekna thupitak nei hi. Toupa kua lak a leng na negu hita leng leng,  a leh li in ka din kik ding chi topmai hi. Toupa tuban ka negu nawn kei ding chi lel leh leng a kikhekna thupi lua khin hia. A leh li in ka din kik ding chitel hi veh aw. Eiloi in ka negu nawn kei ding chi a kikhek lel ding leng haksa salua hihanga maw. Ditkik ding chih hial chu haksa deuh inteh maw. Zakai in chu ka kisiklua ka hih nawn kei ding chih chauh hilou in, a leh li in ka din kik ding chi top mai hi.

Jesu toh na kimuh nung un nang mimal ah bang kikhekna om in na thei a le. Tuban hih nawn lou ding chi a kikhekna maw,  ka hihsiatsate leng bawl hoih thak ning chi maw. Jesu nungzuihna leh Pathian nna sepna kha a man man te hih mai theih hih chi kei veh aw maw. Eiloi in zaw Pathian thu i hauhsakpih sawm sek ua hi ven,  min ka man leh mang ka himai di, sih leh sih, dam leh dam chi in a sia tawp khawk leng tuak dia mansa in Jesu nung a na zui uh hi veh aw.

Eiloi in bel,  ei utdan leh nopsak na tan chiang in  i zui zawngsang kha talakloh ua, Khros pua kawm a zuih ding chih kipeih nawn lou a bang hi. Mihausa khat Jesu kiang ah hong pai a,  Sinsakpa tangtawn hinna ka neihna din bang ka hih kul ding ahia chi in dong hi. Jesun na neih peuhmah zuak inla, tagahte kiangah pia in huchin van ah gou na nei ding. Huai khit chiang in  hong pai inla, na khros pua in hon zui in chi in na dawng hi. Mihausapan maimial tak in Jesu zuilou in kihem mang mai mah hi. Aziak bel khovel gou leh van gou luah khawm a sawm ziak ahi. Huailah ahitheih chi si kei a. A neih-le- lam a mu chian mahmah a, tangtawn hinna a zon pen mu chian theilou ahita ve. Vualzawlna i tante mu chian mahmah napi in hon  vualzawltu mu chian theilou kitam leh kilawm sa ing.

Jesun mihausapa kiangah thupiakte na thei vele a chihleh Mihausapan huaite thei mah ing ka neu apan ka zuih sa ahi chi. Jesun bel a zui kei chih thei chian mahmah hi. Mihausapa kha hausa, huaiham, tagahte kiang a pia phallou ahi. Huaihamna tuh milim biakna toh kibang ahi. Huchi ahi a eive le maw tangtawn hinna zong na pi a a muh theih louh. Min Sabiltung enlou a Jesu a et nilouh lai ua en a Sabiltung kia na buaipih i hihleh zaw Jesu na mu kha lou ding mah i hi ve.

         ________________

via WAP

Share: