Indian Red Cross Society (IRCS) Churachandpur District Branch in vaipua thak ding telna nei

Indian Red Cross Society (IRCS) Churachandpur District Branch in tuni 3 October, 2025 nitaklam dak 1:00 in Dr. L.S. Gangte Residence, Ell Street, Chiengkonpang ah vaipua thak ding telna a nei hi. Zia hun achun, term 2025-2028 sung ah District Vice President ding ah Dr. L.S. Gangte teldawk in, District Management Committee, Chairman ding ah Rev Dr. Vanmawia; Vice Chairman ding ah Dr VC Pau Tonsing  leh Upa Lalson Suantak; Secretary - Vicky Suantak; Joint Secretary - S. Thangliankham; Finance cum Treasurer -Tinky Thangzawm leh Executive Member ding ah Rev. Mangthianlal, Niangngaihlun Buhril leh P. Thanglianlal te a teldawk ui. Indian Red Cross Society (IRCS) rules leh official structure dungzui in IRCS District Branch ah District Collector/Deputy Commissioner, or District Magistrate chu  ex-officio President ahi. Ziagualma achun, India ah IRCS President ahileh India President hi in, State IRCS President ahileh Governor ahi.

 
Voluntary humanitarian organization- Indian Red Cross Society (IRCS) ahileh society dang gual ah government nuai ah registration kibawl hilo in, Government of India in International Red Cross / Red Crescent Movement bakkai khat hiding ah Indian Red Cross Society Act, 1920 (Parliament Act passed in 1920 (Act XV of 1920) dungzui ah a phudaw, Government voluntary humanitarian society/organization ahi.

 
Red Cross Society nasep ahileh tawmngaina nasep, panpina ngaite panpi ahi. Red Cross Society member ah kua hileh tawmngaina nasep tawh panpi ngaite panpina nasep semnuam taphawt panthei ahi. 

~ W/A

Share: