Lamka, 29 Jan 2026: Phungkhothang Guite Mawltual (Lamka Football Ground), Hiangtam Lamka ah a 78-veina Zomi Namni Football Tournament 2026 pailel tuni in kimawlna match nih om nawn a, huai ah Lova Football Academy leh Khallai FC in vualzawhna tang ua, himahleh Khallai FC in goal khum tawmzawk ziak in knockout lut zoulou ua, Love Football Academy ahihleh Knockout lut uhi.
.png)
A 78-veina Zomi Namni Football Tournament 2026 ahihleh Lamka Event in CCPur District Sports Assn. (CDSA) leh My Bharat CCPur tawh pangkhawm a a sai uh hi a, tuni adia kimawlna match masa ah Pool A apan Khallai FC leh chance nei nawnlou Papa FC kimawl uh a, tua kimawlna ah Khallai FC in goal tamtak a Papa FC a zawh uh poimawh ahihdan theikawm a kimawl in, a match uh pressure sang mahmah in duhthu sam tak in kimawl theilou uh a, huai hun lemtang a la in, minute 10 in Papa FC in Lunminthang goal tungtawn in makai uh a, huaizawh minute 29 in Thangmoi tungtawn a khumbeh in 2-0 in makai uh a, Khallai FC kinepna tawm sak deuhdeuh uhi.
Half kuan minute 30 in Mangneilal tungtawn in Khallai FC in khum in kinepna thak neisak a, second half kipat apan goal khumbeh sawm in naktak in attack uh a, minute 48 leh 64 in Khamzalian tungtawn in Khallai FC in goal 2 khum uh a, thathak neisak nawn mahleh vualzawhna ding a 6-2 bek a a zawh uh poimawh ahihman in, goal poimawh zah khum zoulou uh a, 3-2 in vualzawhna tang mahle uh knockout lut zoulou uh a, Pool A ah Point 4 mah nei The Shepherd Football Academy in goal difference ziak in Symropia FC tawh knockout lut uhi.
Tuni a match masa a kimawl Khallai FC leh Papa FC ahihleh tutung tournament ah knockout lut zoulou uh a, melmuh hinawnlou phot ding uhi. Tuni adia match tawpna ah Pool B apan Love Football Academy leh Bungmual Youth Club kimawl uh a, kibei thei mahmah in kimawlna leng tension mahmah a, hunbei kuan minute 65 in tutung tournament ah Red Card lahkhiak a om masakna pen ding in Love Football Academy Coach Ginminthang in Red Card mu hi. Hunbei tan a goal kikhum zou om dia gintak ahihlouh lai un, hun bei na ding minute 2 in a sap in Love Football Academy in Coach om nawnlouh nung in Kennedy Haokip tungtawn a khum in vualzawhna tang uh a, Pool B a team 4 omte lakah Knockout lut masapen in pang uhi.
Pool B a om team 4te lakah Love Football Academy in match 3 ah point 7 laisuah uh a, Bungmual youth Club in ahihleh entute lam-et banglou tak in tuornament kipat apan hih hoih lou uh a, point laisuah zoulou in chance nei nawnlou uhi.
Zingchiang January 30, 2026 in kimawlna match nih om nawn ding a, match masa sun dak 12 in Pool B apan District Police leh FC Zotal kimawl ding uh a, tua kimawlna ah vualzawhna tang penpen knockout lut ding uh ahihman in kimawlna etnuam mahmah ding hi. District Police in match 2 ah khatvei zou in point 3 laisuah uh a, FC Zotal in match 2 ah point 4 laisuah uhi. Draw tan in FC Zotal knockout lutding uh a, himahleh District Police in vualzawhna a tan leh knockout lut daih ding uhi. Match tawpna ah Group C apan Haiciin FC leh Ganggam Soccer Club kimawl ding uhi. Haicinn FC a ding in a match masa ding uh hi a, a vuallelh uh leh leng match tawpna ah Pehlum Lamhil Lawm Football academy kimawlpih ding ua, huai ah vualzawhna a tan uh leh knockout lut veve ding uhi.
Ganggam SC in match masa ah Pehlum Lamhil Lawm Football academy zoukhia in point 3 nei uh a, Haiciin FC a zawhkei uh leh knockout lut zoulou thei uhi. Kimawl ding Ganggam SC leh Haiciin FC ahihleh player hoih ngen om khawmna tuak ahihman un, a zou ding gen haksa mahmah a kimawlna nuam mahmah ding hi.
Tournament ah Champion in Rs 2 Lakhs sang ding a, Runners up in Rs 1 Lakh sang in, Semi Final tan lut club nihte kiang ah Rs 10,000 tuak piak hiding uh a, Quarter final apan Man-of-the-Match Award om ding banah best player, best goalkeeper leh top-scorer kiang ah leng kipahman piak hiding uhi.
A 78-veina Zomi Namni Football Tournament 2026 om sung teng Ticket system zat hiding a, mi khat lut man Rs 20 lak in om hi. Tournament ah Lamka pansan Football Academy team 7 kihel uh a, Kangpokpi District apan chial aom guest team 2 - Football 4 Change leh Sadar Hills Football Academy tel in football team 25 kihel ua, guest team nihte Knock-Out Round apan kimawl pan ding uhi.
.jpg)
.jpeg)
No comments:
Post a Comment
Comments not related to the topic will be removed immediately.