ZNN FT 2026: Khallai FC 3-2 Papa FC; Love FA leh The Shepherd's FA-te knock-out lut

Tuni Ningani 29th January, 2026 in Phungkhothang Mawtual, Hiangtam Lamka ah 78th Zomi Nam Ni Football Tournament 2026 group stage kimawlna matches 2 um a, Khallai FC leh Love FA in guolzawna tang a, Khallai FC-te puonat huaitah in goal diff erence in knock-out lut joulou a, Love FA-te Group B apat knock-out lut ta hi. Match masapen ah Group A aum Khallai FC ten goal 3 aguolzawna poimaw ahidan theikawm in kimawl a, hinanleh chance nei nonlou Papa FC ten sportmenship hoitah langsah in theitawp suoh in kimawl a, naikal kimkhat ching masang in Lunminthang leh Th angmoi goal zangin 2-0 in makai masa hi.

Khallai FC ten halft ime masang in Mangneilal tungtawn in goal khat khum a, tualeh second half ah Khamzalian in goal 2 khum in 3-2 in guolzawna tang nanleh The Shepherd's FA ten goal diff erence a neihoi zaw zieh in knock-out lut joulou a, Group A ah SYMROPIA FC leh The Shepherd's FA-te knockout lut uhi.

Match nukhiepen ah Group B aum Love Football Academy leh Bungmual YC-te kimawl a, Love FA ten 1-0 aguolzawna tangin knock-out lut uhi. Tam match ah chance neilou Bungmual YC ten sportmenship hoitah langsah in theitawp suoh in kimawl a, goal kikhum umlou ah beiding agingtat ahilai in Kennedy Haokip in hunbei kuan mama in Love FA adi'n goal poimawtah khat khum in 1-0 in guolzawna tang uhi. 

Goal kikhum masang in Love Football Academy coach Ginminthang Hangshing in hamkam kilawmloutah a zat zieh in red card pie in um hi. Group B ah Love FA ten points 7 nei in knockout lut a, zingchieng Septawpni 30th January, 2026 in District Police leh FC Zotal-te knock out lut ding kituh ding a, point 4 nei FC Zotalte draw tan in zong kai ding a, District Police adi'n guolzawna chilou lampi dang neilou uhi. Nai 2:00 pm in Group C aum Haiciin FC leh Ganggam SC-te kimawl ding hi. 

Zogam Today | 30.01.2026

Share: