SETAN SECRETARY
1982 kum a Burma gama
mite gen leh ngaihkhiah nuam pen, Saptuam Upa Kiphatsak luat ziaka lampial a
Setan Secretary a kim 3 sung vingveng ana pang khin, gawtmun a chep khak cheu
ziaka Pathian lama hong kik nawn tanchin ama kama a gen hoihtak in ana sim tei
awle. Na hinkhua etchiang na di'n ana zang inla, vangam hia gawtmun na tel zawk
ding??
KIPHATSAKNA GAH:
Ka min ahihleh Thaidun
ahi a, Burma gama Lelaite khaw mi ka hi. Kei mimal taka Pathian thu thei tak hi
a ngaih ka hih ziak in mite'n hong ngaina in, hong pawl nuam mahmah uhi, huai a
pat in mahni ki deih khopna leh kha lam thu ki thei sakna (Spiritual Pride) ka
hong nei a, a top lam in bang kei sanga Pathian thugen siamlou leh theilou zote
thugen ngaihkhiak dia kikhop pawimoh sak lou na ka hong nei a. Kikhom lou in
inn ah Pathian thu zir in Bible ka sim sim zel hi.
GAMHUAI/DAWI IN PI
MANG:
Khat vei Bible sima ka
buai lai tak in aw chiang mahmah in "Thaidun, gamnuai ah pai lechin, na
Pathian na thuak ding" chih chiang takin ka lungsim a thu hong gen tu om
in ka thei hi. Pathian aw ahih gingta in gamnuai lama ka vak khe ngal hi.
Gamhuai/Dawite Vansawltak eng mahmah banga ki siam danglam in hongpi mang ta
uhi.
SETAN SECRETARY DIA
KHEMNA KA PAWM:
Lampi setaktak leh
gamnuai ken setak laka hong pai pi zel ua, a heutupa kiang ua hong pai pih uh
ana hi a, a kiang ka tuntak un, a heutupa un amau pawl a tel di'n leh a
Secretary ua ka pang leh bangkim a thawn a tang thei vek ding ka hihdan thu
khong, lawh ngei leng hoih tak hong pe ding uh ahihdan thu khong, thil hih
theihna thupi tak te hong pe ding uh ahihdan khong gen in hong khem nak mahmah
uhi. A pawl ua ka tel a ahihleh ka mihingpih te kiang a amau tanchin bangmah
gen phallou ahihdan khong, amau kivaipuakna dan a nei tengteng uh ka zui vek
ngai ding ahihdan thute khong hong hilh vek uhi. A dan ua, nungak angnem khoih
phal louh ahihdan khong leng tel tei hi. Kei ka hihleh hong zou mahmah mai ua,
amau pawl a tel ka lem sak pih pah hi. Inn lama kik sese nawn lou in kha thum
sung ka training suak ngal hi.
GAMHUAI/DAWI TE
KHAWSAK DAN:
Gamhuai/Dawite'n zi
leh ta khong nei tei ua, a khawsak dan uh leh inn leh lou a suang dan un ei
mihingte toh a ki lamdang kei hial hi. A dawhkan uh saupipi hi a, a tutnate
khong uh suanga bawl ahi vek hi.
A SUNGKUANTE'N ZAWNG
NASA MAHMAH UH:
Kha thum tak training
a om mang vengveng ka hih ziak in inn lama ka sungte'n ana zawng nak mahmah
ua,himahleh ka mang na mun tak a theibun kei uhi. Hong zong tute ka omna mun a
pat in chiangtak in ka mu thei vek a,a thawm uh leh a thugente uh ka zak pha
vek hi.
KHUA A KIKNA:
Kha thum ka training
zoh in, ka khua lam ua ka kik a, inn ah ka lut ngal hi. Ka sungte'n thu hong
dawng nak mahmah ua, Himahleh kamkhat lel inleng ka dawng kik kei. An hong thuk
ding in ka sungte ka sawl a, ankuang thumna nei hetlou in annek ka thuah ziak
in ka sungte'n ka omdan ngeina hilou chih thei ua lamdang hong sa mahmah
uhi.
TRAINING NAWN DI'N INN
KA PAWTSAN NAWN:
An ka nekzoh in ka
sungte kiang a," ken leitung a Pathian tamtak laka ka biak ding ka muta,
nou loi in na biak uh Jesu ahihleh Mary leh Joseph te sawn ta a pai uh hi a,
bangmah ahikei. Kou ka hih uhleh ut dandan in mi ka that thei ua,ut leh ka
hausa sak thei bawk uh. Thil tuamtuam midangte hih theilou ka hih thei ua,
nasep ngai hetlou in siang tak in ka pawlte'n hong chom/vak ding uhi. Tun
ahihleh Training ka zo nai kei a, kha thum dang training ding in ka kuan ngai
nawn ahihman in, hong zawng nawn het kei un" chi in inn ka pawtsan nawn
ngal hi.
Kha thum sung dawite
laka training ka hong bei nawn uhi. Ka training sung leng gen di tam mahmah
ahi. Khat vei temsaupi tawi kom in ka vak kual a, Rev. Sanghei tawh a lawmte'n
lui kiang a sun an ne in ana tu khawm uhi. Huchi'n ka vau ta hi. "Hiai, na
omna mun uh ka gam ahi a, kin a kin in pawt khia un" ka chi hi, amau hong
thei ngeilou uh ahihman un, mi hai hiding a hong ngaihtuah in kin deuh in hong
paikhiak san uhi.
DAWITE MEL LEH PUAM:
Dawite a mit uh ei
mihing a tawh kibang lou in, a tung zong ngen in om a, mit khat chau a laitaka
nei le om uhi. A nak uh sau in a tung lama kawi tou veivui nei ua, a muk vunte
uh sah in sau thei mahmah a, bal in bal thei ua,a khente'n Ki (horn) nei bawk
uhi.
MEETING MASA PEN:
A secretary ua kum
thum ka pang sung in meeting tam vei tak ka nei uhi. Gen vek seng ding leng
ahikei. Ka meeting neihna masa pen uh ahihleh China khawpi Peking kiang a lui
lian mahmah kiang ah ahi. Ka heutupa uh chair ah tu in kei ahihleh a kiang a tu
in Secretary na ka len a, Khristian te'n "Gammial" a chih uh kou
"Gam Vak"(Eng) ka chi ua, Khristian te gamlaksa te kou
"Gammial" ka chi daih uhi. Khovel gam tuamtuam a pat ka missionary te
uh hong tel kim vek ua, a nasep dan uh report te hong gen in, nasep tou zel
didan khong ka gen khom uhi.
AMERICA MISSIONARY
REPORT:
Chairman in America
gama missionary report pe ding in hong sam ta hi. Kipah mel tak in hong ding
toupah zet in, "kei nasep dan pen ahihleh a hausak thei luat ziak un
Pathian pawimoh lou a ngaihtuahna ka nei sak a, Biak inn lampi zuan sese
in lou mahni inn a TV et leh Radio a ngaihkhik hun ahihdan lungsim ka nei
sak hi".
"A Biak inn
tamtak uh a kikhom ding a om zoh nawnlou ziak in khak ua, a khente zuak ua,
Biakinn lian taktak mi sangtampi kitatna dingte a mi sawmnih, sawmthum khong
chau ki khom liak luak ua, ka loh ching mahmah" chi'n report zou hi.
Members te kipak in a
khut uh bang zua zua ua, ka heutupa un, "A pastor te uh lah bang a chi
ua?" Chi in dawng a, "A pastor tamtak te uh leng a min maimai a
Pathian thugen leh kikhop na tawm leng peih lou ding in ka zou hi" chi in
dawng kik a, ka heutupa un "Nang mahmah, a pastor te tan uh nawn zoh"
chi in a liangkou a beng theutheu a, members te khut beng ding in hong sawl a,
a khente a a lukhu te un tung lama vawk tou hial in, kikou ging pawl tawh nasa
mahmah hi.
Hichia meeting a gam
tuamtuam a pat report ngaih khiak zoh ahih in chairman in, "Tun hiai tan
in i hunsak phot ding ua, na zi na ta te uh leng na ngai mahmah ding uh chih a
gingtak huai a, i om na chiat i zuan ding ua, i na uh gin omtak in i sem zel ding
ua, tung Pathian in gawtmun a hong khum khom hun ding nai mahmah ta a, huai
ziak in gamlak ding tam mahmah lai ahihman in a kinlam in leh tua sanga kuhkal
zo sem in i pang lai ding uh. Lungkham het kei un, ei kia hilou ahi, khovel
mipi tam zaw te toh gawt mun lut khom ding i hi uh. Khristian tamtak leh a
pastor tam zawte i lama pang ngen ahi uh. Hiai sang in nak zosem in hong pang
unla, pathian lunggimna ding bawl nak semsem leng, a hun chiam leng suan
gamla kha moh lou ding ahi", chi in hasawtna thu gen hi. Meeting nawn na
mun ding ahihleh Burma gam Matupi gam ding ahih thu a gen khit in mahni nasepna
mun leh omna gamlam zuan in ka leng khe siausiau uhi.
Kei leh ka pawlte ka
omna mun ka tung dek kuan un, tangsang mahmah khat a singpi dawn khopna ka nei
ua, huai sung nasep ka nei ngei kei uhi. Antang ahihleh ka antang koina singrem
ah ka poimah dan uh zir in ana om zel mai hi. Sa leng ka duh peuh mah uh, Sakhi
sa, Sa ngal sa leh a dangdang ka inn ua ana ki khai tawp zel hi.
Khat vei ka meeting na
ua, Sial lian deuh mai ka gou ua,a phei hong pia ua, gik sa kawm pipi a pua in
inn ka lutpih leh ka sungte'n mak a sa mahmah uhi. Inn ka bawl ut chiang inleng
zankal in Dawite'n Bii leh mau leh a pawimoh teng ka inn kong tual ah ana koih
sak vek zel ua, zing thoh chiang a zat thei mai di'n masa in om vek zel
hi.
A khen chiang in aktui
leh mai nou thak taktak khong ka inn ua ana om zel hi. Ken le maksa in a top in
ka heutupa kiang a, hiaite koi a pat a hong kipan ahia chi in ka dawng hi. Aman
"piangthak loute leh lungsim taktak lou a thohlawm ana thohtute thohlawm
ka kiang a hong lut zel a, huaite ahi" chi in hong dawng hi. Gingtu diktak
leh lungsim taktak a Pathian it kom a thohlawm leh sawma khat pete thil piak
neu in tawm mahleh Pathian kiang tung vek zel a, Van dakpi te kheng ging in van
mipite kipak thei mahmah uhi.
Khat vei mah leng ka
heutupa kianga kha khat loh ka la a, Rawksai bag dim zen in inn ka pua tung hi,
ka zi ana mangbang mahmah mai a, "Sum hiai zahzah koi a pat a nawn lak
ahiam?" Chi in hong dawng a, "ka loh, ka heutupa un hong piak
ahi" chia ka gen leh hong gingta mang lou a, "Na heutupa uh leh na
lakna mun ka muh ut" chi in hong zuih teitei sawm hi. Ka paina munte
a paithei lou ding ahihdan khong ka hilh chiang inleng "ka pai thei
ding" chi teitei hi.
"Chih leh lah,
hong zui awle" chi in ka tawnpih ta a. Kei ka hih leh kawl sia leh ken,
sang taktak te a lampi hoih mahmah a pai bang in haksa hetlou in ka pai thei a,
ka zi bel pai ngaihna a theise kei, himahleh sawt lou nung in Dawi lungsim hong
nei tei in amah leng hong pai thei sam hi. A khen Chiang in tui sung a ka lut
ua, a khen chiang in leng in ka leng thoh uhi. A top in ka heutupa uh omna mun
ka tung ua, Chair suang a kibawl ah ana tu a, a kiang ah, "Pu aw, ka zi in
ka loh laklai mu ut a, ka loh lak nailou teng nawn pethei diam?" Ka chi
hi. "E! Ahi maw" chi in A/Roll (loh lakna bu) hong phen a, "Hi,
hiai ah aw" chi in sum tam deuh mai hong ham khia in ka Rawksai bag a hong
thunlut sak hi.
Ka zi in, "Pu aw,
hiai sumte sorkar sum hi a, koi a pat na lak ahia? Chi in dawng a, ka heutupa
un "E, ka Secretary pa uh zi meuh in ana thei nailou na hi maw? Khristian
tampi te'n sawma khat a piakte uh,thohlawm a thohte uh Pathian kiang tung
phaloute ka kiang a hong lut vek zel ahi. Pastor pa'n ne mang vek hinteh na
chite khong uh kei kiang a Tung vek ahi" chi in dawng hi.
Huchin, inn lama ka
kik pih ta hi. Inn ka tung un, ka zi mihing pangngai suak nawn a, kei ka hihleh
dawi toh ka khosa khom den lai hi.
GAMHUAI/DAWITE NASEP
DAN:
Gamhuai/Dawite nasepna
hat mahmah hi. Khristiante kikhop khomna khong a leng vatel zel uhi. Dawite'n
lukhu khu zel ua, huai khu kei le uh mihing mit a muhthei hiding uhi. Lukhu a
khuk Chiang un mihing mit ah ki mu thei lou a, mihing taksa khong a paisuak
thei uhi; mihing lungsim khong a leng thugen thei ua, kikhopna leh lasak khomna
khong a mite liangkou a lu uh va nga zel ua, ihmut suahnate, lungsim a thildang
ngaihtuahnate, Pathian thugentu thugen ngaihkhiak peihlouna lungsim khong
bawlsak zel uhi. Himahleh Thumna a nei chiang un Biakinn nuai leh Biakinn kiang
khong ah ana om zel uhi. Dawite'n a lauhpen uh ahihleh khristian te a thum khom
chiang ua, "Amen" a chih khom mahmah uh lau pen uhi.
Thum khomna a nei
chiang un, midik tak leh mifel thumna pen vak (eng) zung hattak bang in kong
lam leh vanlama kikap tou a, huai vak zungte Dawite'n a khut leh ban khong ua a
sukkhak chiang un tan zel a, a heutupa kiang ua va tai in a heutupa un ana tuam
dam sak zel hi.
Khovel a mihingte pau
ging himhim a guk a bilbuk a ki hou hilehleng tunglam a paungaihna a pau mah
bang in ging ngaih mahmah in tunglam tung tou veve hi. Ken tape recorder in ka
record khe zel a, ka heutupa kiang a ka play zel hi, "Kampau
thanghuai,nungak leh tangval kikhemna kampau,mi gensiatna kampau te khong ka heutupa
un a zak chiang in kipak petmah hi.
Huai bana lemlakna
(Camera) ka nei bawk ua, mi thil hih khel lai khong lim kana lasek ua, huaite
Cinema film bang deuh in ka heutupa uh muh di'n ka suak khe zel ua,et nuam sa
in hong phat nak thei mahmah hi.
GAWTMUN LAMPI A DUTY
NA:
Misi sate lampi
gawtmun zawtna leh Vangam zawtna lam kak taka ka ding sek uhi. Second khat teng
in misi kha in misisa te khovel a hong zuan zel uhi. A khente ka omna mun uh
tunglou a kik thak, hing thak nawn leng tampi om uhi.
Mihoih leh felte bel a
kha uh Vansawltak eng mahmah nih in ana vaidawn in ana pi zel uhi. Vangam lampi
kawi pel lama van mipi leh vana ana khol tawldam masate'n ana vaidawn zel uhi.
Kou omna zawn a hong tung Chiang un eng petmah ua, et leng ka en hoih ngam kei
ua, kana kibuk san zel uhi.
A min a khristian ki
chi maimai te bel a mai kimkhat neu chik vak tei a, a khat lam ahihleh vom
mahmah hi. A paina lampi uh leng en hoih ngam lou in pai haksa sa mahmah
uhi.
GAWTMUN LAMPI A HONG
ZUAN UH:
Pastorte leng gawtmun
lampi hong zuan tam mahmah uhi. Ka om na mun uh a hong tung chiang un,"Koi
lam zuan dek na hi ua?" Chi a kana dawt chiang in a min khristian kichi
chihmah tak chu "Vangam" chi in hong dawng kik zel uhi. Huai chiang
in, kou "ka mi leh sa na hi ua, van a na pai thei kei ding uh"
ka chih chiang unleng,"Nou dawi/gamhuai na hi uh, vangama ka Pathian kiang
a ka pai ding" chi in hong dawng thouthou uhi. "Achih leh pai
vele" chi a i pai sak chiang in gawtmun lampi mah hong zui kik zel uhi. A
ziak ahihleh Vangam lampi a et chiang un, vakpha mahmah in van mite mu ua, amau
lah bal/nin mahmah ua, va zuan taktak ngam tuan lou uhi.
A min a khristian leng
kichiloute bel gawtmun lam a pai suak sak pahpah ua, himahleh pastor leh a min
a khristian kichite bel sawi sa nak thei mahmah uhi. Dawite'n,"Midangte
kiang a hong sumin setu na hi" chi ua, pek zial zial sek ua, a khen chiang
in Phim lian mahmah leh sau mahmah in dawt ek ek zel ua, ut leh dah a, a
sawisak khit chiang un pai sak pan zel uhi. Pastor te gawtna ahihleh tua sang
in nasa zo lai hi.
Mifelte kha Vansawltak
in a hongpi te ahih uh leh Vangam a lutma ua pat in nasa tak in mipite'n ana
lawm ua, dak chi tuamtuamte tumging in, totorawt chi tuamtuam mut ging in,
nuamsa in kipak thei mahmah uhi. Huaite tengteng ken mu thei vek ka hih chiang
in a guk in ka eng thei mahmah hi.
A ban gen zel lai ni.
Khat vei ka duty lai in Sataw khua a papi khat si a, a kha in gawtmun lampi
hong zuan hi. A hong nung kik lam ka ki tuak kha uhi. Amah a tak in ka mu ngei
kei a, a khua uh leng ka mu kha nai kei, Setan Secretary a ka top nung in ka
veng ua hong zin tung kha a, 'E, gawtmun lampi a nawn kik lama i kituah lai
sang in na na upa in na na tek sot ta ngei e' ka chih le zo, ki guih zawk hial
hi. A damlou lai a a kha in gawtmun lampi a zuih ngei thu leh a hong dam kik
dan khong hong hilh vek hi.
MATUPI MEETING THU
PASS:
Matupi gama meeting ka
neih un ka chairman un,"Gingtu kichi tamtak zo i zou khe zel uh, himahleh
Halhthakna (Revival) a tung zel a, camping leh campaign leh crusade te
gingtute'n uang deuhdeuh zel ua, i mi leh sa i khah suah zel uh. Huai ziak in
bang chihdana gingtute ki zou ding hiam? Chi in thu ka gen khom Uhi. Sawttak ka
gen khom nung un, hichidan in thupuk na kon bawl ta uhi.
1. Puanthan mantampipi
te migenthei deuhte'n lei zou lou uh ahihman in, second hand tampi, mantawm
chikchik a leithei didan ki ngaihtuah henla, sungkuan tamtak ki nasak zel le
innkuan kehdar Hong tam semsem ding uhi.
2. Kikhop ngaihsak
louhna leh kikhop sung a leng pathian thu a lungsim ua a lutlou na di'n nak zo
sem a beipi suah ding.
3. Thumna a neih lai
ua, naupangte leh naungek te suk kah ding.
Chihte khong ahi
tangpi hi.
GAWTMUN KA VA EN KHIA:
Hichia kum thum Setan
Secretary a ka pang nung in gawtmun bang chidana om hiam chih ka thei ut mahmah
hi. Huchi'n a en di'n kava paita hi. Hichia etmai in bel gawtmun etlawm lehlam
zozen abang, mei leh kat ki polh in kuang luahluah mai a,a letdan ahihleh kam
in a gen zou kei ding. Huihpih nung gige bang mai in meikuangte ki zial tup tup
mai a, bang chin a om chi in a thuk louna mundeuh a kil lama ka va lut sin a,
meikuangte bel ka mut mit tawm zel hi. Hu ka hiplut toh kituak in ka kam sung
hong kang a, na chih bang chu mihing kam gen in a gen zou kei ding. Ka pawt kik
pah a, huai apat in kisikna leh gawtmun a om lauhna ka nei ta hi.
DAWITE'N KA LUNGSIM
THEI UH:
Huai pat in ka lungsim
khekta ka hihman in ka lung put teng Dawite ana thei khin vek ua, dawi sagih in
hong um kual in,"Bang ziak a Gammial lama hong paisan sawm na hiam?"
Chi in hong dawng ua, ken bel "lawmte aw, gawtmun a om ka lau lua a
hi" chi in ka dawng a, huchin hong pai san in, a heutupa kiang a va gen
uhi.
Ka heutupa leh captain
pa uh kintak in kei lam zuan in hong pai ua, Captain in Thal hong tawi ahihman
lau in ka tai hi. A thal in hong kap a,ka nungzang taka hong kha a, ka awm lama
pot lou deuh hi. Ka heutupa un "na hong kik kei leh hong thah
thouthou ding ka hi uh" chi in hong paisan uhi.
Huchi'n ka zi kiang a
ka taksa khophok lou a lum ah ka kha va lut nawn a, ka kha lut toh kituak in ka
pum hong kapna mun uh na pet mah a, kha guk sung ka damlou loh hilh hial hi. Ka
zi in thu hong dawt chiang in dawng theilou in ka kap top zel hi.
Huchi'n ka zi in
Pastor va sam a, ka pastor un thu hong dawt in Setan pawl apat tawp ka sawm
ziaka hong sawisak dan teng uh ka hilh vek a, "Pastor nang le ki ging in!
Pastor tamtak gawtmun a lut mu ka hi. Nang le lut mai thei na hi." Ka chi
hi. A lungtang khoi kha mahmah ahi ding a, ka pastor pa uh hong piangthak loh
hial hi.
Saptuamte'n hong thum
sak gige ua,kha guk nung in ka dam khe khong hi.. Halleluiah!! Pathian phat in
om hen. Kei pen tak Hong it a, gawtmun a pat hong lakhia a,a ta a hong siam pa
chik mah in ka taimangsan nawn kei ding. Tun ahihleh ka hondampa leh sual nasep
dan puang zak in ka vak khe zel ta hi. Dawite nasep dang leng lehkhabu a
gelhlel ka hi, chi in gen hi.
Source: Makedonia -
14th Nov, 21st Nov, 28th Nov, 1982. 5th Dec, 12th Dec 1983)
(A sau luat khak ding
lauhna ziak in, sau lou lou paihkhiak khen zek a hong ki let khia ahi a, bana
ama gen bangbang a eipau a siamdan dan hong ki let khia ahi.)
~ Barakhaih Langel Paite
via Social Media
No comments:
Post a Comment
Comments not related to the topic will be removed immediately.