Nengtinlhing Haokip: A thuaknate dampih zoulou in si

Meitei-te'n pimang leh a pawngsual nung uh kum 2 nung in a thuaknate dampih zoulou in si

Kum 3 phial paita May 3, 2023 a Meitei leh Zosuan Singtangmite kal a namkal buaina kipatnung a Meitei-te'n thagum a a kisualhuan uh Zosuan singtangmi numei kum 20 a upa, a liamnate ziak a hun sawttak a natna a thuaknung in January 10, 2026 in si hi.

Kum 3 phial paisa a pimang leh pawngsual a omna ziak a liamna leh lungsim natna a thuaknate apan damsiang manlou in kum 20 a upa Nengtinlhing Haokip of Lhanghoi veng, Singngat bel January 10, 2026 in Singngat ah si hi.

A tung a thiltung tawh kisai in numei nih in National Commission for Women (NCW) ah hekna bawl ua, huai ban ah Manipur singtanggam a teng mite ai-awh in US-pansan association khat in North American Manipur Tribal Association ah hiai thu tun hi.

June 12, 2023 in Zosuan singtangmi numeite pawngsualna thiltung 6 tawh kisai in complaint bawl in om a, huai lak ah huai hun a kum 18 hilel January 10, 2026 a si Nengtinlhing Haokip pimangna leh pawngsualna tawh kisai leng tel hi.

Huai thu ahihleh Zosuan singtangmi numei nih Meitei mipi'n vuaktang a, a thawhna uh video in India gamsung pumpi a zelhsuak ma ni 38 a National Commission for Women (NCW) a complaint bawl a om ahi.

Zosuan singtangmi numei nih vuaktang a gamsa bangmai a bawl a omna uh video ziak in national media-te'n hiai thu im zou nawnlou ua, huai video pen India gamsung kia hilou a khawvel pumpi ah a viral lai in May 15, 2023 a pimang leh pawngsual a om Nengtinlhing Haokip thuakna pen phawkphak louh in omlai hi.

July 2023 in Nengtinlhing Haokip in Manipur Police ah a thiltuah tun in Zero FIR bawl in om a, huainung in a case pen July 22, 2023 in CBI khut ah piaksawn in om hi.

Kum nih val painung in leng Nengtinlhing Haokip tung a kilawmloutak a gamtangte lak ah khat mah leng matkhiak omlou hi.

Nengtinlhing Haokip pianna nu kum 48 a upa Lhingnei Haokip in thuthaksaite kiang a, agenna ah, a tanu in soisakna leh pawngsualna a thuakte ziak in a taksa tung ah liamna tuamtuam nei ua, huaiziak in nak (breathing) leng haksa sa ahi chi hi.

"Ka tanu ahihleh hiai thiltung mulkim huaitak a tuah ma in, mi kipaksak siam leh tei mahmah hi a, laisim a lunglutlouh ziak in ka tanaute uh khat tawh Imphal ah beauty parlour khat ah sem in, lawm hau mahmah in amaute tawh a chang in mun tuamtuam ah vakkhe zel uh chi hi.

Ka tanu tuh nuihmai leh ngaihhuai mahmah hi a, himahleh pimang leh pawngsual a omnung in a nuih mai ka mu nawnkei" chi'n a nu Lhingnei in gen hi.

A taksa a liamna a tuahte ban ah a tanu in lauthawngna nei in a lungsim ah thawmhauna neiden ahi chi'n Lhingnei in gen hi.

A thiltuah ziak in a tanu a kingaise mahmah a, inn sung ah pindan khat ah omden a, kuamah tawh leng kihou utlou in kikulkhum den in om a, Inn apan pawtkhiak ut nawnlou in, a lawmte leng a houpih ut nawnkei chi hi.

Trauma therapy sessions nei ding in doctor in nipikal khat in nihvei a tanu veh zel a, himahleh a tanu damsiang theilou a om den in, Minute 15 lel leng a ka pawtkhiaksan ding hon phalkei" chi'n a nu Lhingnei in gen hi.

"Kum nih paisa sung lauthawngna nei in ka tanu in a hinkhua a zang den a, hiai leitung a hin ut nawnlou ahihdan hon gen zel hi. Khatvei ka kiang ah a tung a thiltung teng miteng in thei leh mite bang a om thei nawn ding hilou ahihdan hon gen hi.

Pimang, soisak leh pawngsual a omnate a manglam in mangmat zel in huaite'n a lungsim ah lauthawngna behlap deuhdeuh ahi.

Lauthawngna ziak in zan in ihmu thei ngeilou a, huaite ziak a damtheihna hong kise hiaihiai ahi" chi'n a nu Lhingnei in gen hi.

December kha in Lhingnei nu damlouh ziak in veh kawm ding chi in Lhingnei leh a tanu, Nengtinlhing Haokip in a nute khua Singngat ah Christmas zang in va hawh uhi. "January 8, 2026 in ka tanu hong lua in a sung hong hoihlou chi hi.

Doctor dong ua doctor in damdawi a piakte zang in enkol mahle uh, ni khat thu a hong gimsia in January 10, 2026 in hon sihsan chi hi.

A lungsim a lauthawngna aneihte leh a liamte ziak in a damtheihna lam naktak in kisia a, kum nih val paisa sung a tung a thitungte ziak in damlouhna nei in a om den" chi'n Lhingnei in gen hi.

Medical report-te muhdan in, Nengtinlhing Haokip in gangrape leh soisakna a tuahte ziak in liamna tuamtuam nei a, a liamnate ziak in October 25, 2025 in Guwahati ah surgery bawl in om a, huai apan in a damtheihna in hoihlam sang a siatlam manawh hiaihiai hidan in thusuak in taklang hi.

Kangpokpi Police in Nengtinlhing Haokip thugente statement a lak leh a tung a thiltung tawh kisai a FIR bawl a omte pansan in chiamtehna a bawldan un, May 15, 2023 nitaklam in Meiteite'n Nengtinlhing Haokip  tel in mi 4 in pimang uh a, huaimun apan in New Checkon, Imphal ah paipih ua, Seikam School kiang ATM booth apan thagum in Maruti Swift car ah puak in om hi.

Huainung in Wangkhei Ayanpali area ah paipih ua, huai ah Meitei numei pawlpi Meira Paibi-te leh tualsung mi tamtak in naktak in soisa uhi. Huai zawh in puanvom silh a nunglam ua logo om Meitei outfit Arambai Tenggol hidia gintak thautawi pasal 4 in Bolero SUV a pawkhia in mualtung lam ah paipih uhi.

Pasal 4 lak ah 3 in kisualhuan ua, a pawngsualnung in pasal 4 teng thah ding leh thahlouh ding ah kisel ua, amaute lak ah mi khat in a gari (Bolero) a heina lam ah a gari in Nengtinlhing Haokip phukha in kawl ah kesuk hi.

Kawl ah a kiatnung in anteh-louhing pua auto-rickshaw driver khat in mnu in Bishnupur police station tan pawtung hi. Bishnupur police station puaktung ahihnung in Meitei police-te kiang a piakkhiak a om ding ahihdan kitei in Kim in rickshaw driver kiang ah Imphal a New Lambulane area ah kha ding in ngen hi.

Huainung in bangchichi hiam ah Kangpokpi hospital puaktung a om in huai mun ah admit in om a, huai apan in Nagaland khawpi Kohima ah etkol ding a paipih in om hi.

Nengtinlhing Haokip innkuante zangna-dopna dan in Rs 10 lakh mu mahle uh hiai thiltung tawh kisai in legal accountability bangmah ngah neilou uhi.

Shougrakpam Chandrakumar Singh, officer-in-charge, Porompat Police Station, Imphal East district in agenna ah, hiai thu zero FIR pansan in police station hong tung a, huainung in kintak in CBI khut ah piakkhiak a om ahih ziak in CBI in bangteng semzui hiam chih ka thei nawnkei chi hi.

Hiai thu Imphal a CBI branch ah dotna bawl himahleh staff-te'n bangmah thu theisak nuamlou uhi.

Huai ban ah Manipur buaina tawh kisai suizuite lak ah khat office of DIG Lovely Katiyar, Guwahati ah leng hiai thu tut in om mahleh huai apan in leng bangmah thu om tuanlou hi.

Manipur a namkal buaina tawh kisai case enkaitute lak a khat Manipur pansan lawyer, Victor Chongtham in agenna ah, "CBI in hiai thiltung tawh kisai in kuamah matkhiak nei nailou a, numei nih vuaktang a ganhing bangmai a thawh a omna tawh kisai a kigolhte leh galvan mankhe mahleh hiai thu ah kuamah mankhe nailou chi hi.

State in zero FIR tamtak chiamteh mahleh pansakna leh case tuamtuamte bawhzuina bangmah omlou a, Manipur buaina tawh kisai suizui CBI leh agency tuamtuamte ah lametna bangmah ka neinawnkei uh" chi hi.

Nengtinlhing Haokip sihna tawh kisai amah sunna leh a innkuante khamuanna in a singtangmi pihte'n Wall of Remembrance, Tuibong, Lamka ah January 17 in candlelight vigil nei uhi.

Hiai thu ah kuamah matkhiak omlouh ban ah legal accountability bangmah omlouh ziak in Lhingnei in a tanu tung a thiltung tawh kisai in, "Ka hinkhua ah deihthusam khat kia ka nei, huai tuh ka tanu pimang a pawngsualte gawtna piak a omlai uh ka mu nuam.

Kuate ahi ua chih ka theinuam, ka tanu ka ngai lua" chi'n anu Lhingnei in gen hi.

21-01-2026 | Wednesday

©𝐙𝐨𝐠𝐚𝐦 𝐈𝐧𝐬𝐢𝐠𝐡𝐭

Share: