SBI Branch inaugurated in Parbung

Parbungah SBI Branch hawng

PARBUNG, February 27, 2026, Virthli (ONP): SBI Parbung Branch chu February 27, 2026 khan Parbung Bank Complex ah hawngna hunser hmang niin Pherzawl DC, Pi Mannuamching, IAS in ribbon cutting neiin a lo hawng tah. Pherzawl DC in Parbung SBI Bank hawngna a nei zoin Rev. Jacob L. Hmar in Pathien kuoma inhlanna a nei a, Pu D. Lalmuan K. Gangte, Chief Manager, SBI, AMCC, CCpur in keynote address hrilna a nei.

SBI Parbung Branch hawngna hunser hmanga um hi Pu Pc. Lalnunpuia, LDM, CCpur & Pherzawl District in a keihruoia, Pu Lalrokhawm, Representative of MLA, 55-Tipaimukh A/C, Pu Piangkhanmuan Vaiphei, MPS, Addl. SP Pherzawl le Pu Ramdinglien, President, Hmar Inpui Hmarram Region hai a'nthawkin thuhril tawi ngai thlak a ni a, an ni baka hin  Village Authority Union, Pherzawl District, Parbung Village Authority, Hmarram Kohran Inzawmkhawm, HYA Hmarram JHQ, HYA Pherzawl JHQ le HSA GHQ han thuhrilna hun an hmang a, SBI Parbung Branch hawng theia a um chungchangah SBI staff hai kuoma le, hma latu Tipaimukh MLA chungah an lawmthu hai an hril.

Hi huna Pherzawl DC in thu a hrilna a chun Parbung SBI Branch hawng theia a um chu lawmum a ti thu hrilin Pherzawl District mipuiin an sawr ṭangkai ngei a beisei thu a hrilin Parbunga SBI Bank ṭha taka a function theina dingin  mipuiin mawphurna insângtak an nei thu a hril a, mitinin bank account hawng dingin le, Pherzawl district mipui hmun dang danga bank account lo hawng ta hai khawma Parbung SBI Branch ah mani account hai transfer seng dingin mitin a fiel a, Parbunga SBI Bank hi sukchangtlung ding le ṭha taka a function ding chun sum a'n vir râwn a ṭul a, mimal, pawl le kohran khawma SBI Bank hi hmang ṭangkai tum ei tiu a, Parbung SBI Branch sukhringtu ding chu mipuihai  ei nih tiin a hril a. A hril peina a chun Parbunga SBI Branch umna dingin nasataka hma a lo lâk ve thu hrilin aithîng, hmunphi, lo hmasuok hai le thlai man hai sie khâwlna dinga Pherzawl district mipuiin Bank an mamaw thu SBI hai kuomah a lo intlun hlak thu le, khawpui le hmun danga Bank hai angin sum invirkuol le sum deposit a lo tam rak naw hun a khawm hmangaina le ngilneina neia SBI Parbung Branch hi enkawl tlat dingin SBI staff hai a fiel a, Pherzawl district ta dinga sawrkar a'nthawka fund hung hai chungchang a khawm Parbung SBI Branch hi ṭangkai taka hmang a la ni ding thu a hril.

Pu Ruata Khuptong, Dy. Manager, SBI, AMCC, CCpur in lawmthu hrilna a nei a, Parbung SBI Branch hawng a ni theina dinga nasataka hma latu, Tipaimukh MLA ~ Pu Ngursanglur Sanate le a team hai, Pherzawl DC le Parbung Village Authority hai chungah lawmthu a hril a, hi hunser uop dinga fiela um hai po po kuoma khawm a lawmthu a hril. Hawng thara um SBI Parbung Branch a hin Pu Seineo Chongloi chu Manager a ni ding a nih.

@ https://www.virthli.in/2026/02/parbungah-sbi-branch-hawng.html 

Share: