INDIA sunga political party tamjongleh, India's Independence jouva pat tunichanna, the most prominent political party tenichu BJP leh INC ahunghijing lhonne.
BJP in Central Government ahinsemkit dingin aumtai. Hijehchun akipah uvin, hibangse asohjenguve. Ahinlah, akipanau hi lungkham khoisat nan ajuijingin, kipa leh lungkham akoptauve.
Ipijeh a kipah uham? Term 3 kijomma lengvai ahinpohdiu ahitai. Hichu, koiham akipahlou ding?
Ipijeh a lungkham uham?
TDP pary hon a demand uchu ahileh, "Speaker post neipeuvin, cabinet minister post 5 neipeuvin, hiche lah achun Home le Defence jong jaotha ding ahi" tin kiletsahtah in thu aseitauvin ahi.
Alangkhatna JDU party hon a demand kit uchu ahileh, _"cabinet minister post 4 neipeuvin, hiche lah achu *Railway* leh *Finance* jong jaotha ding ahi. Chuleh, Central Government in atumbeh a Bihar gamsung atumkhohsah dehset ding ahi"_ tin kiletsah hoitho tah in, akio akampoh kit tauvin ahi.
Portfolio alen cheh, athupi cheh, it-umtah cheh phaldohding kitchu thil hahsatah ahi. Hiche post ho chu TDP le JDU apehdoh uleh, amaho party sunga BJP dinga thi-ngam a hungpangjing hon ipi alemlo diu hitam?
TDP leh JDU party teni jaolouva Government semthei ahikitpon, BJP dinga lungkham umtah khat vang ahitai.
Party chomchom toh kigomkhomma coalition government kisemkhom kiti hi alhou jipon, thaset umtah khat ahi. Ajehchu koima lung kitohjou jing lou ahi. Insunga iji-icha, inu-ipa, isopi cheng lungbon kitohjou jing louva, politics a tohkhompi jouse lhunglhaisah jingding kitichu hahsa ahi.
TDP le JDU lamkai teni jonghi kichom lele, jamdoh lele, dinmun kichehlou thoche tobang ahikit lhonnin ahi. Lunghol hahsa cheh, milepche cheh ahilhonne. Amahi party toh itihchanpi hungkivop jou diu hinam, tihojong gellouthei ahipoi.
👆Hichu central government ki form dingdan thu chomcha isei u chomkhat khongaikit uhitin...
👇Eiho Manipur context chomcha seikhomkit uhite.
Kuki-Zo chate ikitilmeh uvin, INC Candidate Alfred K. Arthur isondoh tauve. Thengsellin kiseileh, Kuki-Zo chate vote jalla nahchangsalla kaidoh ahi. Meilhei Thoubal Kakching langhon NSCN-IM toh akitho tohchet uvin, 100% NPF Candidate Timothy Zimik apeuvin ahi. Kuki-Zo chate milepche mikitahlou phabepmin NPF anason jongleh, atamjo 70% tobangin INC chu vote kipe ahi. Hitiho jalla hungkaidoh ahi. Lungdon umtah khatchu ahileh Churachandpur constituency sunga NPF in vote tampi amu chu lungdon umtah ahi. Hijongleh, INC akaitan, kipa aume.
INC Candidate Alfred K. Arthur leh aloiho vote campaign a ahunguva chu, nampi lamkai hotoh agreement ipi naneikhom uvem? Agreement chu written record um hinam? Separate administration chungchanga pan ahinlahding hinam? Kuki te ahin favour ding hinam? Tun akaidohtan, nakinopto nau agreement chu navelvet khom loulai uham? Hichengse hi nam mipiten ahetnom tauve.
*MP Election masanga nuijat umtah, lohso umtah phabep ho nungvet kit uhite*
1). Koiman nomination file aboltheilouding, MP Election atet theilou ding ahi. Boycott kibolvang ahipoi.
2). (Lamka based ITLF) : INC isot chehdiu ahi. BJP in eikhohsahtapouve. INC beltaute
3). (Sadar Hills based COTU) : Koiman vote alhah theilouding, ahinlah boycott vang ahipoi. _(Polling station munkhat munni a vote akilha kit thouvin ahi)_
Nuijat umtah, tamtah jong aumnalaijin, seibe da taute. *"Chutitheilouding ahi, boycott vang ahipoi"* ipikiseina ham? Boycott ibolleh bol ngalding, ibollouleh bolda ngalding ahi. *"Tanglu-ne, tangkong ngol"* kiti tobangbep ahi Hichepet chun Kuki Inpi Manipur (KIM) thu jong koiman alapon, KIM jongchu uhpoh ngamlouvin, amei anakhuptan ahi.
Seikhel masa, bolkhel masa, gelkhel masa ho akonna tukit-tuban leh kihilna lesson ineitheinadiuva themkhat hungkitahlang ahi. Tukit tuban leh kilungtohmo sesu a iumkitnaloudiuva, imitmonau neokhat highlight hungkibol ahibouve.
Achaina (conclusion)
Koi party kaihenlang, koi party in Central government semjongleh, Kuki-Zo chate dingin kineppithei kisonpithei khatcha aumpoi. INC vang chu hileh, neokhat beh upai umtheijep ding ahi. Pathen tailou eihodingin kinepnading dang aumtapoi.
.jpeg)
.png)
