ZPM General Headquarters Aizawl: PRESS RELEASE
Dated Aizawl, 2nd Febuary 2026; Vawiin khan ZPM Party chuan party office-ah chhung inkhawm hun kan hmanga Agriculture & Farmers Welfare Minister Pu PC Vanlalruata chuan thu sawiin, 'Central-ah Budget thar an puang a, Mizoramin kan sum hmuh a pung dawn tih kan hre ta. ZPM hian Pathian kaihhruaina kan chang zel tih bak hi sawi tur a awm lo,' a ti.
Pu Ruata chuan, 'Pathianah kan intulut a, kan minister rualten, "Keini chu kan ei ru ve lo vang," tiin mipui hmaah thu kan tiam a. Vawiin thleng hian eiruknaa kut fai lo hming pu hi sawi tur leh hmuh tur kan zinga kan awm lo te hi Pathian kaihhruaina vang a ni tih loh rual a ni lo, Pathian hnenah pawh lawmthu i sawi zel ang u. Nikumah khan ZPM sawrkarin thlai thar leina budget-ah a dah a, Handholding-ah kan dah a, kan ring nghal mai a. Mahse, House-ah, "Khaw nge thlai thar leina tur in dah chu?" tiin min zawt a. Chumi a nih avang chuan kan CM-in "Lo dah tawh rawh u, a hranpain, Handholding-a dah loin, an hre thiam lo em mai," a ti a, Kum 2026-27 Budget-ah hian thlai thar leina tur kan dah dawn a ni,' a ti bawk.
Agri. Minister thusawi dang te:
1. Nikumah khan India ramah sawhthing rate a chhe em em a, ngaihtuah phak lohin a chhia a ni. Kg-ah Rs. 13, 14, 15 te a ni chho a. A buyer kan biakte pawh an lo kal lawk thei lo a. February ni 20-ah a rate a up loh chuan sawrkarin kan la ang, kan ti a Sawhthing rate up loh karah sawrkarin kuthnathawktu te hnenah kg-ah Rs. 50-in, mipui kan tiam angin kan la a ni. Hun a lo kal zel a, 'Hetiang ringawt chuan kan tlin dawn lo. Eng pawh ni se, mipui kan tibeidawng ve tur a ni lo,' kan tih avangin support price nen kan la zel a. Season tawp thlengin support price nen Kg-ah Rs. 50-in farmer-te hnenah pawisa a lut a ni. Kan vannei a, nikumah tun ang hunah hian sawhthing Kg-ah Rs. 10 -13 vel a ni a. Tunah chuan sawrkarin a hun tiam a thlen hma pawh khan Kg-ah Rs. 30 ten an hralh a ni. Mizoram sawhthing quality that bikna hi tunah hian India ram mai ni lo, khawvelin a hre tan mek a ni. Tunah pawh Marketing Board-in buyer kan zawn mek Mizorama rawn kal tam ber hi South India-a mi an ni. "Engati nge, Karnataka te, Kerala-ah te sawhthing a tam ve tho si a," ka ti a. "Keini sawhthing chu pesticide a tam lutuk a, nangni sawhthing chu organic certificate nei lo mah ula kan lei ngam a, kan lei duh zawk a ni," an ti. Kuminah chuan inchhuang ang u, kan ti a. Kan sawhthing quality thatna hi khawvelin a hre tan tawh a, lo induh ve deuh kan duh a ni. Support Price Mode-in kan kal dawn a, kan sawthing chingtute pawhin Marketing Board-in ruahmanna kan siam hi lo zawm se, kan sawrkar ruahmanna hi lo ngaihchang thiam se, Kg-ah Rs. 50 an inpteah a lut dawn e. Mizoram sawhthing quality tha hi khawvelah kan zuar chhuak dawn a, min lo nghak hram hram rawh u. Nikumah Congress leh MNF pawhin an cho ruih ruih a, buyer an kal mai loh avangin min beituah an tang leh si a, dem tur an zawng a ni. A sawhthing phurtu MNF leh Congress pa kan en lo, a phurh sawhthing chauh kan en a, Kg-ah Rs. 50-in kan tihsak mai. Kan ti zel dawn.
2. Tin, nikumah hmunphiah a rate grading-in kan ti a, garde mipuiin an thiam lo a, a leitu empanelled buyer-ten tih ngaihna an hre lo a. A tawpah sawrkarin, 'Grade siam loin Kg-ah Rs. 80-in i la mai ang u' kan ti a. Mizoram hmunphiah a chuangbang zawng zawng a bo a bang awm loin sawrkarin Kg-ah Rs. 80-in kan lei fai vek a ni. Marketing Board-in kan han ngaihtuah a, 'Kan mi leh saten kan thiam si lo a, Vaihoin min bargain leh dawn si a, nakumah chuan sawrkarin ungrade-in Kg-ah Rs. 80-in kum tir atangin la ila' kan ti a. Hun bituk chhungin tunah hian bul kan tan chho dawn a. Mahse, tunah hian hmunphiah hring Kg-ah Rs. 30 atangin Rs. 40-ah a up ta dawrh mai a ni. A kum khatnaah kha chuan kan farmer-te thiam loh ve bawk nen, keini pawh experience kan la nei lo ve deuh bawk nen, kan ti fuh lo a. Kuminah chuan a season tirah a lei hun tur kan siam a, tunah hian kan inkau vek tawh a. Collection Centre-ah Kg-a Rs. 80-a lei turin kan inpeih vek tawh a ni.
3. Hmarcha pawh chhim lamah an lo dawn tlawm deuh a, chhim lama kan hotute kan hrilh a, farmer-ho kha kan bituk aia tlawm chuan lo pektir suh u, support price nen kan rawn ti dawn, kan ti a. Tunah hian Vaihoin an rawn inlan leh mek a ni. Hmar lamah chuan hmarchaah kan buai lo. Sawrkar rate bituk aia toin an hralh mek a ni.
4. Chutiang chuan sawrkarin Marketing Board a siam ten ngaihtuahna an seng nasa em em a. A hmingin a chairman chu ka ni a, kan co-chairman leh kan thawhpui board member-ten ngaihtuahna an seng nasa em em a, tunah chuan ruahmanna fel tak kan nei tawh a ni. District Agriculture Marketing Committee (DAMC) kan ti a, district tinah kan committee kan din vek a. Secondary Collection Centre (SCC) ah pawh Supervisor kaihhruainain ruahmanna kan siam fel vek tawh a. An hna thawh dan tur Standard Operating Procedure (SOP) kan tih pawh DAMC te, SCC te, Society level thleng pawhin ruahmanna kan nei vek a ni.
5. Tin, 24/11/2025 khan Dr. VK Paul, Member, NITI Aayog chuan kan CM-in sawhthing a ngai pawimawh tih hriain, Delhi-ah 'National Consultation on Ginger Produced for Mizoram' tih an huaihawt a ni. Khawi state tan mah hian state pakhat pualin National level-ah consultation meeting hi koh a la ni ngai lo. Kan CM-in sawhthing a vei tih a hria a, Chumi avang chuan Delhi tlangah India ram pum huap Mizoram sawhthing chungchanga inrawn khawmna- Ministry of Food Processing Industries te, Ministry of Agriculture & Farmers Welfare te leh Ministry of Ayush te bakah India ram sumdawng lian, khawvel pawhin sumdawng lian an hriatte sawm khawmin Delhi-ah kan CM Pu Lalduhoma te nen inrawn khawmna hun an nei a ni. Chutah chuan Dr. VK Paul chuan, Mizoram hi India ramah sawhthing hmunpuiah min puansak nghe nghe a nih kha. Khatiang level pawha Mizoram sawhthing ngaihtuah a ni kha Pu Lalduhoma remruat a nih ka ring lo, chunglam remruat a nih ka ring a ni. Chung lam malsawmna hi kan tawng baw mek a ni. ZPM sawrkarin kan lo intiam tawh angin kan farmer-tena rate mumal zawka rilru hah lo taka an thlai thar an hralh theihna turin sawrkarin kalphung thar hnuaiah kan ruahman a ni. Chumi zulzui chuan hma kan la mek a ni.
6. Pathian zarah malsawmna kan dawng a, sawrkar pawhin sum leh paiah harsatna kan nei lo. Ba kan rul hnem em em a, a thente chu Congress sawrkar laia ba te a ni. ZPM sawrkar hnuah kan sawrkar hna thawkten a hun takah hlawh an la, an lawm em em. Hengte hi chung lam malsawmna kan dawn vang a ni. ZPM hi Pathianin min kaihruai a ni tih hi pawm ila, Pathian chakna ringa kan kalna dah bo mai loin, keimahni theihnaa hengte hi thlengah i ngai lo ang u. Pathian kan rin tlat chuan malsawmna hi vawiina kan dawn let tam tak hi min pe ang. ZPM kan vanneihna em em chu Biak In hrang hrangah zing tawngtai inkhawmah te tawngtaipuitu kan ngah a, kohhran mite chungah pawh lawm thu kan sawi a ni.
Chhung inkhawm hi Pu C. Lalnunnema, Vice President chuan kaihruaiin thu tawi a sawi a; Pu Zomuana, Jy. Secy. & Member, Mizoram State Planning Board chuan KMMTTP zirchianna report a pe bawk a. Party headquarters hotute, Minister te leh party mi thahnem tak kan tel a ni.
Sd/-
(ZIRSANGLIANI MANGPA)
Jt. Secretary
Media & Publicity Deptt.
ZPM Gen. Hqrs., Aizawl
PR No. ZPM 02/02A/2026/9
Date: 02/02/2026
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
