NAGALAND GAM'A KUKI TE THUSIM

Thumakai:

Nagaland hi 1st Dec 1963 kuma India

Gam State 16 channa dinga ana

kithenso ahi . Hiche Gam hi Suo

lamma Burma, Lhumlamma  Assam,

Sahlamma Arunachal chuleh Lhang

langga Manipur in atom in ahi. Hiche

State sungin Kivaipohna Districts 7

aummin ahi. Vaipuote(Govt) hiet

pehna nuoi in Nam (Tribe) 16

aummin ahi . Hiche Nam 16 holah

chun Kukite jong ajao than ahi.

Nagaland Gama Kuki Chate hi atamjo,

Ahthibung Gamkai (Peren District) leh

Molvom Gamkai (Dimapur District)

sungin acheng ui. Phek district sungin

jong themkhat aumkit un ahi. Gam

kivaipoh dungjui in MLA 60 aummin,

Kuki Chate atamjo hi, Ghaspani-II AC

leh Tening AC nuoi in aumin ahi. Kuki

kho jouse Haosa in akivaipohun

amavang Ghaspani Town, Kohima,

Dimapur, Tuensang, Mon, hoa, Kuki

Community, Chairman akilheng tho

un ahi.

Chanchin/History:

Alexander Mackenzie in ajih lekhabu

'NE Frontier of India' akhun Assam

Phaicham toh Patkai Mollhang kikah a

Chieng Kuki ho anatin ahi(Nagaland

Kukite aseina)(A Mc Kenzie, NE

Frontier of India, Pg 435). Chukit leh,

Sheakespeare in 'The Lushai Kukis'

kiti lekhabu anajih na ajong khun,

Naga Hills a Kukite hoitah in asei in

ahi. William Shaw in 'Notes on the

Thadou Kukis' ati nah ajong khun

Nagaland a cheng Kuki Chate thu

hoitah in aseiyin ahi. Sir Edward Gait

in 'History of Assam (1906)' ajihna

ajong Nagaland Kuki Chate chenna

Muol leh Lhang ana hetpeh in ahi.

British Vaihoplai akipat ana kithang

Kukidolong(Ghaspani nuoi a kho) khu

mit tah a kimu Kukite Lalna vetsah na

ahi in ahi. Leut. Scott(1897) leh

Mohori, Siakkhuma chu Kohima jonin

ahungun ahileh, Kukidolong ahinphah

uchun Paat lah chu ahinpal thei

tapouvin ahi hitichun Paat appal

theilou phat uchun, Mohoripa

Siakkhuma(NC Hills , Hmar, Pg 406.)

chu ahungin Kuki Haosa (Mills, Pg

564) ho koma kithopina ahung thum

in hitichun Haosa hon Gollhang asol

un , Paat lah achun Lei(Bridge) agado

peh tauvin ahi. Hiche nikho apat chun

hilai munchu Kukidolong (Kuki=Kuki,

Dolong=Bridge) tin Vaipote leh

Milham in ahin hietpeh tauvin ahi.

(*the local guide who was fluent in

the language of the native tribes

residing nearby went to look for

help:)

Naga Hills hung piendoh masangchun

NHTA(Naga Hills Tuensang Area) ana

kitin, hichun tunikho a Nagaland

Pumpi khu ana huop pon ahi. NHTA

in anahuop sung gamma chun Kukite

khatcha ana chengpon ahi. Amavang

1885 jouva Naga Hills hung piendoh

jouva kipat in , Kukite chenna chu

Naga Hills huop sungin ahung

ummin, Kohima District huop sungin

ana umtan ahi. Dec 1997 kumin

Dimapur District ahung kithenso phat

in, Kukite atamjo Dimapur district

sungin aki umtan ahi. Chujouvin,

Peren District ahung kithenso kit in

Kukite akeh khatchu Peren District

(Ahthibung Gamkai) huop sungin

ahung umkit tan ahi.

Naga Movement Leh Kuki Chate:

India in chamlhat amu jou jou chun

Naga Hills langa boina lientah ana

umtan ahi. Hiche boina hi chamlhat

masanga kipat anakipan hitajongleh,

India Chamlhat jouva bou Boina chu

ahung sang cheh in ahi. Naga ten

India te Chamlhat toh kitoh chun

amahon jong Chamlhat Gal ahinsat

pan un, hitichun Kum 30 Vaal jen

Chamlhat Gaal asat jouvun, 1963

Kumin Naga Hills sese chu, Nagaland

State a ahung kipedoh tan ahi. Naga

te Chamlhat Gaal sat hi ana thupi in

ahi. 1929 kumin Simon Comission in

Naga Hills ahung vil chun Naga Hills

hi Inda Gama jao louding ahi tin,

Memorandum ana peuvin ahi.

Memorandum pe holah achun, Kuki

Chate Thalhengin, Pu Lengjang Kuki in

jong Khuthei ana pen ahi e. Chukit in

India Chamlhat toh kitoh in Pu AZ

Phizo in NNC ahin phutdoh in Gaal

nasatah in ana umin ahi. NNC in Gal

abol lai chun Kuki Chate dingin jong

mun apen ama in Kuki Tribal Union

tin NNC nuoi a Wing khat akoi in ahi.

NNC thunei laichun Nagaland sunga,

Kuki, Sema leh Rengma hohi ana

kitoh un ana kijawl un ahi. Hitichun

akihoutoh thei jeh uchun, SEKURENG

kiti (Se=Sema. Ku=Kuki,

Reng=Rengma) in ana kiloikhom uvin,

SEKURENG min in State chuom khat

demand ana bol un ahi. Phat ahung

che in ahileh Sema langa Lamkai, Gen

Kaito chu NNC Angami Region hon

ahintha phat un, SEKURENG demand

chu ahung chebe thei tapon, Sema,

Kuki leh Rengma kiloikhomna chu

ngah in ahung umtan ahi. 1970's

akipat in Manipur langa Suopi Uisadu

(Tangkhul) hon Naga Movement a

pan ahinlauvin, amaho hunglut a

kipat in Nagaland a Kuki Chaten a Iti a

thohkhah lou gentheina ahin thoh

tauvin ahi. 1985's akipat 1997 geichu

Nagaland a Kuki Chate dingin Thimpi

jing tobang ahi. Uisaduhon muntin in

Kukite suhbuoi nading ahollun, Kuki

Kho tampi ahallun, chuleh Milham leh

Miching tampi eitha peh un ahi.

Amavang atil apat chenkhompi Naga

danghon ima gielsetna neilou in

thakhat in Kukite toh kiloikhom

nading lang amano jingin ahi. Naga

movement khoh laitah in Kanjang

(Phek District) langa um Kuki Chate

chu Pochury in alalut un, tunikho

geiyin, Pochury in aumtauvin ahi.

Jamir khang ahung hi phat in Jamir

lamkainan Kuki leh Zeliang kikah a

boina ho seilhap in ahung um pantan

ahi. Phat ahung chen ahileh, Naga

Movement chu ahung dao cheh cheh

tan ahi. Hitichun phat che to

dungjuiyin, Uisadu ho thaneina ahung

lhom cheh cheh in, Kuki Chate dingin

jong kidodohna ahung umpantan ahi.

Tunaicha injong Pu C Singson

Makainan, Nagaland a Kuki Chate'n

Kuki Region amu tauvin ahi. Hiche

Kuki Region ahung umdoh theichu,

Naga namdang tetoh munkhat a

kidinte pithei ihitauve tina ahi.

Innchen Daan:

Naga Gal kichai til chun Kuki Chate

kho tampi akihallhan, aki nuoimang

aumin ahi. Gal jeh achun Inchen adet

theipon, Milham Hinkho ichen

hammin ana tongkhan ahi. Inn leh

Lou det theilouvin ana um un ahi.

Amavang Gal kichai akipat in Kuki

Chate ahung kido doh pan tauvin ahi.

Nagaland gama Kuki Chate hi 100 lah

a 50 tobanghi natoh det neilou/Lou

bolla kivah ahiuvin ahi. Akhochen dan

u anuom in Munpha laitah leh

Munhoi laitah atoupha un ahi.

Molvom Gamkai a Kuki Chate acheng

hon, Phailei Lienpitah tah anei un,

Chuleh, Pacific Asia adinga 'Lengthei

Huon' Lienpen jong Kuki Chaten

atoupha kit un ahi. Govt of Nagaland

in 'Rice Bowl of Nagaland' tia

aminsah gam chunga Kukite gam

toupha atamjo ahi in ahi.. Molvom

Gamkai sungin Themjil nalamin 100

lah a 77 tobang lekha he (Literate)

ahin chuleh, Ahthibung gamkai lang

khu Themvetna lammin alhasam

jepmin 100 lah a 60 velbou Lekha he

ahi. Haosat nalangin Koima akiphah

joulou vangin, Chaga chungnung jong

koima aumdehpon ahi. Kuki Chate

toupha na gamho hi, Gamhoi,

Gampha ahin, aman je athep leu Lal

chungnung hidiu amanje atheplou leu

Chaga noinung hiding ahi e. Molvom

gamkai a um Kuki Chate Pathen

Phatthei boh najal in Lengthei Huon

lamma aha kipei thei un, Inchen

hoitah in akisiem toh jouvun ahi.

Tunikho in Molvom Khopi khu Kho

Haosa penloi ahitan ahi.

Hou leh Beh:

1872 Kumin America Baptist

(Northern) missionary, Edward Winter

Clark, chu Ao te lah a Kipana Thupha

Lhangsam dingin Mission Munpi,

Sibsagar, Assam, dalhan ahung tan

ahi. Amavang ama ahung lhunvah

vangin Kuki Chate lah in Kipana

Thupha alhung jou naipon ahi.

Hitichun phat ahung che ahung chen,

William Pettigrew in Manipur Kukite

lah a Kipana Thupha ahin pohlut

chun Nagaland langa Kukite jong

nasatah in atongkhan ahi. Kipana

Thupha chu Mitin in akisan jouin ahi.

Rev Rivenburg teho Khang ahung

kipat in, Pu Ngulhao Thomsong tehon

Kukite lah a Kipana Thupha ahin

lhangsam leuvin, Kohima a Kuki

Baptist Church jong 1910 kumin

phudoh in aumtan ahi.

Kipana Thupha ahung machaltoh

kitoh in Kuki Chaten Kiloikhomna

apoimo daan ahin hetdoh phat un,

Kiloikhomna neiding ti tohguon

ahung umtan ahi. Abul achun

kiloikhom nachu atuma neiding atileu

Houbung alhom nahlai jeh uchun

Zeliang tetoh thakhat in Zeliang-Kuki

Association tin 1920 velchun Kohima

Field Church nuoi a phudoh in aum

tan ahi. Kohima Field Church chu

Council of Baptist Church Assam and

Manipur (CBCAM) nuoi umkit ahi.

(KCC Medziphema, Golden Jubilee

Souvenour 1999)

Phat hungche toh kitoh in Houbung

leh Tahsan mite ahung pung cheh

cheh in hitichun, Zeliang lah ajong

Pathen Hou ahung tamtan, Kuki lah

ajong Pathen hou ahung tam tan ahi.

Hiti chun Houbung ahung tam phat

chun, Zeliang leh Kuki chu atum tum

in ahung kivaipo tauvin ahi. Kuki

Chaten, Kuki Baptist Association

atiuvin, Nagaland Baptist Church

Council nuoi a akipo un chuleh

Zeliang tenjong NBCC nuoi mama in

atuma akipoh kit tauvin ahi. 1970's

vella patnin, Pathen Lhacha Dr T

Lunkim in Manipur Gam akon in

Houbung Theng Khatseh Thupha

ahung lhangsam in Nagaland a Kuki

Chate lah a Houbung Theng Khatseh

amachaltoh kitoh in, KCC Nagaland

Synod Phudoh in aumtan ahi.

Tunikho hin Nagaland a Kuki Chate

lah a Bahkai Houbung ho sese chu,

KCC, Nagaland Synod, Mission

Centre-Molvom, KBA-Nagaland, NBCC

nuoi, Mission Centre-Khaibung,

Roman Catholic, Christian Revival

Church, Pentecostal leh Judaisim hou

aum in ahi.

Kiloikhomna leh Kivaipohna (Eima

Kuki Sung):

Kiloikhom ahilouleh Inpi nei apoimo

daan kiti hi Kuki Chate lah in anal

hung vah pon ahi. Kho Haosa

kivaipohna khellin Kivaipohna chu ana

kineipon ahi. Amavang 1929 a Simon

Comission in Naga Hills ahungvil jou

akon chun Kuki Chaten Kiloikhom

akhoh daan ahin hepan un, Pu

Lengjkang Kuki chu Kukite Palai

masapen ahung hitan ahi. Mr  CR

Pawsey, Deputy Commissioner Naga

Hills in Kuki Tribal Council neiloudaan

ana seitan ahi. Aman aseina achun,

Tribal Council bei a, thinglhang mite

chu Phaicham mite Toupha a umding

ahi atin ahi. Hiche laitah achun NNC

kipat tillai anahin ahi. Pu CR Pawsey

hietpehna leh makainan 1942 kumin

Kuki Chaten Kuki Tribal Council/Kuki

Union Committe tin ana neitauvin ahi.

KTU or KUC akiphu napipen chu

Molvom leh Chalkot(Ahthibung)

gamkai a um Kuki Chate dinmun

vettup a siemtup tihi ana tuppi pen u

ahin ahi. 1960 kumin KTU chu Gamnoi

kiloikhomna in ahung pangtan, NNC

toh kikhut jopna nasatah in ahin

neitauvin ahi. Dec 1963 kumin Kuki

haosa Shri. Paochung GB of Khaibung

(1946-48), Shri. Limjalal Kuki GB of

Bungsang (1948-50), Shri. Onpao Kuki

of Inbung (DB) (1951-55),

Shri.Langkam Kuki of Ghaspani

(1955-58), Shri. Hemkhojang Kuki of

Chalkot (1958-60), Shri. Vomkhothang

Kuki of Bungsang (1960-63) amaho

chengin KTU chu suhbei dingin

Kihouna ana nei un hitichun KTU

suhbei in ahung umkit tan ahi. 1962

kumin, Angami leh Zeliang hotoh

kiboina aum phat in Kukiten Western

Sema Kuki Council tin ana kiloikhom

kitun ahi. Amavang 1964 kuma

Ghaspani a MLA a Kuki ahung kai phat

in, Kuki toh Sema jong ahung kitoh

mo pantan ahi.

Hitichun ahung che ahung che in

1983 kumin KUC Khompi achun, KUC

chu Kuki Innpi Nagaland tin khel

dingin phatsah na ana umtan ahi

(Source:Pu Laljahong Vaiphei, ex Pre-

Kuki Inpi Nagaland). 1966's vel mama

chun, Kuki Simlai hon Kiloikhomna

nei akhohdaan ahin ngaito un

hitichun Simlai Kiloikhomna din Kuki

Students Organisation tin ahin

phutdoh kit tauvin ahi.

Tunikho a Kuki Chate Kiloikhomna api

a kinei hochu 1) Kuki Tribal Union-

NSCN-IM. 2) Kuki Inpi Nagaland. 3)

Kuki Mothers Association 4) Kuki

Students Organisation. 5) Kuki GB's

Union.

Pawlitiks (Politics) lama Nagaland

Kuki Chate:

Nagaland Interim Period chun Pu

Lutjakai Haokip, Ahthibung chu

Member anahin ahi e. Chuleh MLA

masapen teni chu, Pu Langkam

Doungel, Ghaspani leh Pu Laljalam

Singson, Inbung ahihon in ahi.

Chujouvin, 1982 kum in Pu Henlun

Singson , Ahthibunga konin MLA

akaidoh in, Forest Minister ana tuh in

ahi. Tunikho in MLA akineitapon ahi.

Amavang Pawlitiks chu akichiem thiem

te thu thu ahijeh hin , Kukiten jong

kinepna lientah akinei kit in ahi.

Ghaspani leh tening Constituency

akhun Kukite khu Thukimsei (Deciding

Factor) in apang jing thei in ahi.

Pawlitiks kichem masa hon Jamir ana

kikhut joppi un Zeliang tetoh Kuki

kikah in boina tampi Jamir in ana

sulham in ahi.Chuleh tunikho injong

Pawlitiks a Panmun lien tah tah tuh

Kuki Chate aum nalai in ahi. Pi Rosy

Thomsong in State Level Congress

Committee a Secretary atuh in, chuleh

Pu Athang Chongloi injong Indian

Youth Congress a National Secretary

chan ana tuh in ahi. Jamir khang

ahung kichai phat in Pawlitiks kichiem

thiem Kuki Chate tampi anohphah

tauvin amavang tunichanna panmun

lajing theijong adimsiet un nampi

kinepna ahiuvin ahi.

Nei leh Gou:

Nagaland Gama Kuki chaten Govt

akon Nei leh Gou tampi akinei joupon

ahi. Thiljouse hi mihem misim jaat leh

mihiem aboltheite vaipohna ahijeh

hin. Amavang masanlai a Kukite lah a

anaching masaho/ ana Lal masahon

khonung dinmun ding aveuvin, hoitah

in aboltheichen aboldoh un ahi. Govt

hietpehna nuoi a Kuki Chate Nei leh

Gou hochu

1.      Mim Kut: 17 th January.

Restricted State Holiday.

Hiche Mim Kut hi Pu

Langkam Doungel leh Pu

Laljalam Singson MLA anahi

honpet a ana boldoh hon

ahi. Hiche nikho hi Kuki

Chaten Thupi tah in akinit in

Govt akonin jong Kipah tah

a Kut akiman thei nadingin

panpina ahung jingin ahi.

2.      AIR Kohima, Kuki

Programme: AIR, Kuki

Programme hi MLA masa

teni mama chun ana boldoh

hon ahin, tuni channa Nei

Leh Gou thupi loitah khat

ahi.

3.      Kuki Literature Academy: Pu

Paolal Hangsing Retd IAS,

Pu S Changsan, Pu S

Hangsing leh Rev T

Hangsing chengin aboipi u,

Literature  lama Kuki Chate

Meivah a pang ahi.

4.      DB: Duibashi hi Nagaland a

Administration lampanga

Tribe cheh in kinei ahin,

chitobang chun, Dimapur

DC nuoi a Kuki DB khat

aumin, Ghaspani ADC a khat

chuleh Ahthibung langa

jong aumin ahi.

Misimna 2001/Cencus 2001 leh Kukite

Dinmun:

2001 kuma Misimna dungjuiyin

Nagaland a Kuki Chate chu Mihem

43000 vel tin akisei in ahi. Nagaland

langa Khosah daan hi, Kho khat in

alhompenna Inn 60-100 beh anei tei

tei ahi. Agommin Kuki kho 27 Vel ahi.

Khopi dom se chu, Ahthibung-Inn

2000+, Molvom-Inn 500+, Maova,

Bungsang, Ghaspani, Phaipijang,

Bongkolong tiho ahi.(*Data for

Cencus 2011 is not available for public

acess yet)

Simlaite leh Themzilna:

Kuki Chaten Themzilna mun khat bou

ana kinei in ahi. Hichu Molvom GMS

anahi. IAS leh Officer tampi ana simna

hiche GMS Molvom chu Tunikho in

Govt High School a ahei dohtai.

Themzilna lampang hin Kuki Chaten

High School chan Zilna  ding ihao un,

Asanglang ahiteng Gampam jottei

ahung ngai jitan ahi. GHS-Molvom leh

GHS Ahthibung ,chuleh Govt Schools

Kho jousen umtobang ahi. Houbung

langa kona KCC Nagaland Synod Nuoi

a, CMS-Molvom leh CMS-Ahthibung

aumin ahi.

Nagaland akon Kuki Chate Simlai ho

Pachanna sangtah tah neijong ahung

um in, chuleh Sorkar Natoh Holna

injong Simlai ten natoh ahin kijihdoh

atam lheh tauvin ahi. Alhangpi achun

Nagaland a Kuki Chate hi Simna

lampang hahsatna aumbehseh pon,

Ahthibung Gamkai tailou Molvom

Gamkai langho hi Simna ding mun

abuoina aumpon ahi.

Thukhumkhana:

Nagaland gama Kukite dinmun hi

Dinmun buoitah khat ahitan ahi. Naga

Society a kipum peh dingjong

hahsatna tampi aumin amavang

kikangse je aumkitpon ahi. Hijieng

jongleh tunikho a Kuki Chate Jousen,

Chihna, Thepna, Haosatna hinlam

doh sohkeileu, koima Liim nuoi a kisel

khoh angai tapon ahi.

Ghaspani lhanga Kukite a itih a boina

umlou hella ana chengjing chu, NNC

Movement akon in Gamnoi a ki

surrender Angami hochu ghaspani

langa Govt in ahin chensah un,

atamjo Mezoma, Khonoma akon

ahiuvin ahi. Amaho ahung chenlut

akon in Kuki Chate Neil eh Gou,

Phailei ima ave lel un Thubuoina

chunga buoina ahinsiem un ahi.

Hitichun Gamnoi toh akitho un

Suhgenthei leh Lunglinglao in Kukite

anal ha un, amavang Pathen panpi

najallin tunikho in cham dellin

akicheng thei tan ahi.

Nagaland a Kuki Chate Politics

kichep daan athep leu MLA ahin nei

kitdiu hi tahsanna lientah ahin,

chuleh tunikho a Gampam a Themzil

tampi ho a Nikho u ahung lhun teng

Nampi'n Zalenna Dihtah chu hin

mutante ti kinepna ahi.

~ KUKI NEWS

Share: