BUAINATE TUNGTAWN A KAAISAANNA

✍️ Pastor Thangdoulal Suantak

Text: Phatna Laate 50:15= “Na gentheih ni un kei hung sam un; ken k'ung hunkhia diing a, tuachiin n'ung tawisang diing uh hi.”

Tuni in Buainate tungtawn a kaaisaanna chih thu i kikum khawm diing uh hi. Ataktak a chih in kuamah in buaina i deihkei uh hi. Hilezong eite’n ei hung lehdou gige silte, ei hung langpan tawntung mi or i nna sepna uah buainate leh i innsung mahmah uah zong buaina tamtak i tuakkha theizel uh hi; hibang hun chiang in, bangchi a hih silte hung tung ahia, chi a i phattuam ngaihnate uh mansuah a, lungkia-tak a hinkhua zak mai diing pen baihlam mahmah hi. Hilezong Pasian in tupna leh ngiimna kichiantak omlou in i tung uah buaina leh haksatnate a hung tun diing phallou diing ahi. Aziak pen Pasian in mihingte siatna diing saang in, hoihna diingte leh i tu dinmun ua pan a i khantouh ua, i kaaisaan diing uh deihzaw thamtham diing ahi. Tualeh buaina kichi pen buaina hipai mawklou in, khantouna diing leh kaaisaanna diing a hung tung masa ahi zaw a, hih buaina pen amah bek a hung pai hilou in hamphatna lompi tawh hung paikhawm ahi zaw a, eite’n a buaina pen bekbek i mutheih ziak un, kibuai beh toutou hi in ka thei hi. Tuaziak in hih buaina, na muhdan leh na thuakdan tawh na mailam hinkhua diingte kisaipha mahmah hi.

Buaina pen Ngiamkiatna Saang in Khantouhna Hizaw Hi.

Pasian in i hinkhua ua sil thak leh hoih khat a bawl diing chiang in, eite theihdan a tunggikna tawh maa a pan masa hi; tuachiin eite’n buaina pen ngiamkiatna diing a hung omdan in i ngaihsun uh hi. Hilezong buaina pen ngiamkiatna saang in khantouhna hizaw hi.

Pasian in David dinmun, belaampu pan a a kaisaansak utlai in, David tung ah bang a bawl a, chih ngaihsun in; lawm hoih, milian leh hausate a kiang a sawl in, amah a diing in lampi etlawmtak, mihing muhdan in a honsak kei a, hilezong eite muhdan tawh kibangloutak in buaina leh haksatna a sawl masa a, hua pen Goliatha ahi.

 

Goliatha kichi pen mi lian mahmah ahi a, David chia nih leh thum beek zong phathei phial diing in ka gingta hi; tuachiin David tawh a hung kimaituahta uh hi. Hichih hunlai in eite David hilehang zaw bang i chita diing uai maw… David in, “Toupa aw, hih mi liantak, mihing mitmuh a kei douzawh guallouh ka maituahlai in, sil thupitak bawl inla, nung deihsakna hung ensak in,” chilou hi; aziak pen David, tunggikna leh haksatnate tungtawn in, i tu dinmun a kipan a kaaisaanna omzaw ahi chih theisiam hi.

Khatveivei khantouhna i chihte leh i tu dinmun pan a kaaisaanna, dinmun hoihzaw a omna i chihte uh maw, thuakgimna leh haksatnate tungtawn in hung pai hi. David in Pasian min in Goliatha a dou a, tuachiin a zou hi; hibang a gualzawhna Pasian in a piaktak in David hinkhua kipumkheek or ni danglai a bang nawnlou in, nakpi in kaaisang hi.

Eite’n zong i sepna mun uah buaina i tuak maithei, i innsung mahmah uah zong buaina thupitak thuak in i ki-ngaihsun maithei hi; tuni a hibang thuakkha a na kitheih a, na ki-ngaihsut leh, nang dou kenla, na Pasian dousak in; Goliatha a dou pen Pasian ahi a, a minpha pen David ahihbang in, na buaina pen nang pianken mizia tawh dou kenla, Pasian a kipan a Kha Siangthou tungtawn a nan gah mizia tawh dou in, tuachiin nang a diing in buaina pen buaina hilou in khantouhna leh na tu dinmun pan a dinmun saangzaw a na kaaisaanna ahizaw diing hi.

Buainate Nial in Phun Ken

Kumpitouna chiangtan a David kaaisaangsak pen haksatna leh buainate mah ahi chih theisiam inla, buainate nial in phunphun ken. Buaina pen amah bek a hung pai ahi kei a, khantouhna leh i tu dinmun pan a dinmun saangzaw a kaaisaanna tawh hung zawk ahi chih na theihsiam chiang in, thuaklah na kisak mahmah buainate na maituah dan a hung tuam diing a, tuachiin buaina leh haksatna na thuakte gou manpha muh in na muzaw diing hi. 

Khatveivei buainate pen Pasian i muanna leh amah a i ki-ngakna uh khansakna diing in poimawh hi. Lai Siangthou, Paunakte 30:8-9 na in, …. “zawnna hung pe kenla, hauhsakna zong hungpe ken; ka poimawh an tawh hung vak in, a tuachih keileh kiching talua in, k'ung kilepsan kha diing a, “Toupa kichi kua e?” ka chi kha diing a, ka Pasian min ka buahsak kha diing hi,” a na chih pen ei mite a diing hileh kilawm ka saphial hi. Tualeh ei mite lak ah hauhna thuaklah leh pua zoulou zong ki-om hituak hi. Hibang ahih ziak in buainate pen Pasian lam a i ginna uh hatsakna zong suakthei ahihna ah, buaina thuak a kithei i hihleh Pasian lam a i kiik thak uh hoih mahmah diing ahi. Tua hileh buaina pen Pasian a i ginna uh kuantohtu ahi diing a, hua pen Pasian a diing a etlawm leh eite a diing a zong hoih hi diing hi.

 

Na Buaina a Letzawh zahzah in Na Hamphatna Diing zong Lian hi.

Pasian in haksatna neunou khat tawh mite thupitak in laamsaang ngailou hi. David buaina leh haksatnate, tunggiknate pen neulou ahihman in a lawhchinna zong thupi hi. Na mai ah sil thupi leh aamlah-huai bangmah omkei leh meelma in a hung sualkei diing chih thei inla, tuni a nang hung sual, na dougaal tunggikna pen na mailam khovaak ahi chih theisiam zaw in.

Na buainate, na haksatnate a let ziak in lungneu kenla, lung zong lungkia ken, Pasian in na mailam ah sil thupi leh liantak a koih hi chih thei in, na tu dinmun a na thuaklah buainate hamphatna in saang in. Nang pen nang a hilou a Pasian a na hihtaak ziak in na haksatnate Pasian in hung douzawhsak diing hi; Phatna Laate laibu in hibang in a na gen hi: “Na lampi diing Toupa tung ah nga inla; amah muang in, ama'n a hung sem diing hi. Ama'n na diktatna vaak bang in a taangsak diing a, na siamtanna sunlai nisa bang in a suaksak diing hi. Toupa masang ah dai ding-deng inla, lungduaitak in amah ngaak hamham in; a lampi ua hamphatna mute ziak in kilung khamsak ken, ngaihtuahna gilou pichin mite ziak in. Heh kideek inla, thangpaihna taisan in. Kihehsuah ken—hih in silhoihlou a suah zaw hi. Aziak pen mi giloute sukmang in a om diing ua, hinanleh Toupa ngaakte'n lei gou a luah diing uh hi” (Phatna Laate 37:5-9). Hibang ahihziak in, na leitung hinkhua mahmah ah, na tunggikna a letzawh zahzah in na hamphatna diing zong lian hi chih thei in.

*******

Share: