Jesu’ Thugen Mipiten Ngai Ut Mahmah Uh, Tawm Noukhat in Hinpih Uh

 ~ Pro Pastor Dr. Kammuanmung Thangniang

Thangkhal Baptist Church (ABA), Delhi

Outline

Pasian Lalgam a Kihel Dingdan Hilhna (5: 1-7: 12)

(Nungzui Hih Dingdan Thuhilhna)

 

1. Pasian Lalgam Mite Manphatna leh Mawhpuakna (5: 1-16)

i. Pasian Lalgam Mite Hamphatna (5: 12)

ii. Pasian Lalgam Mite Midangte a Dinga Vak Hiding Dan (5: 11-16)

2. Diktatna Diktak Thuhilhna (5: 17-6: 12)

i. Diktatna Diktak (5: 17-20)

a. Pasian Danthu Hilhna (5: 21-48)

 Pasian in Tualthat Ken Ahchihte (5: 21-26)

Pasian in Angkawm Ken Ah Chihte (5: 27-30)

Pasian in Kikhul Lou Ding Ah Chihte (5: 31-32) 

                                    Pasian in Kichiamna Ah Chihte (5: 33-37)

Pasian in Phulakna Ah Chihte (5: 38-42)

Pasian Melmate It Ding Chi Hi (5: 43-47)

Pasian in Nungzuite Bawl Dingte Tawmkim a Ah Genna (5: 48)

a. Pasian Thu Diktak a Zuih Dingdan Hilhna (6:1-7: 6)

Midangte Panpih Dingna (1-4)

Thum Dingdan (3-15)

Anngawl Thumna Neih Dingdan (6: 16-18)

Gou Khol Dingdan (6: 19-24)

Niteng Nek-le-dawn Pasian Tunga Ngakding (6: 25-34)

Midangte Tungthu Khenlou Dingdan (7: 1-6)

Thum Dinga Thuhilhna (7: 7-12)

 

  3. Jesu Thuhilhte Zuidinga Sapna (7: 13-28)

i. Kong Kawchi’k a Lutding a Sapna (7: 13-14)

ii. Zawlnei Diklou Apan Kiveng Dinga Vauhilhna (7: 15-20)

iii. Gingtu Khem Tampi Umding Genkholhna (7: 21-23)

iv. Suangpi Tuang a Inn Lam Dinga Sapna (7: 24-27)

v. Thukhinna (7: 28-29)

 

Tulak teng Mizo La siam banah thugen minthang Evangelist Vanlalsailova in Lamka khopi mun tuamtuam a Pasian thugenna leh lasakna nei koikoi hi. Utube apan en theih dianga koih in um a, huate apan enkhatte nasan in thah kingah hi. Hi program upding kuan lakvel in hi program toh kisai social media (zogam.com) ah ngaidan tuamtuam kigelh a, bangzah hiamte kana mukha hi. Mi khat in hibangin post hi, “Vanlalsailova thugen hoihsa kitam mahmah. A thugen zui ut i tam diam!?” A dang khat in hichi’n post kik leuleu hi, “Watsaap status, FB status…. ah heutupa Sailova toh ki post na kia muh din om. … Sailova Pathian thu genna ah ka piangthak chih muh di om vet lou.” A tung a thu kigelhte dawnna hileh kilawm sim in midang khat in hibang in zogam.com mah a post hi, “Sailova hi ana dem non kei un, I gou man pha khat uh ahi.”

Crusade tampi kinei, camp tam veipi kibawl, piangthak tampi um, ahin, Pasian thu hinpih kitamlou chih pen ngaihsunna khata puaknat huai mah hi. Thugentu mel hoihsak ziak hiam, thugenpa toh lim kilak ut ziak hiam maimai a hih progam mang dinga paikhate pen Pasian mudan in pai thawn mahmah ding uhi. Tuachi mahbangin, thugenpa lasak ngai utlel apaiten zong khalam hamphatna ngah tawm mahmah ding uhi. Sil dah huai tak mai khat ahihleh, mipi tamzaw thamte pen tua igente ziak lel, ahihkeileh Pasian thu toh kisai lou na dang khat ziak a program vasim hilel himaithei ding uhi.  

Mipi tamzaw thamte’n khalam hamphatna ngahlou ding danin ngaihsun talei, program pen lawhsam ahi chihmai ding ahi diam? Leitung mihingte ngaihsunna ah lawhsam chih theih ding hi. Ahin, Pasian ngaihsunna a lawhsam hilou ding hi. Pasian in mihingte lungsim theikhin ahihmanin, hibang thute pen amah a dingin sil lamdang hilou ding hi. Jesu’ gentehna ana gente lak a tallang mahmah khat ahihleh khaichi thehpa toh gentehna ahi (The parable of sower). Khaichi thehpa’n khaichi a theh hi. Khenkhatte lamsik a atu a, khenkhatte suanglei lak a atu a, khenkhatte linglak a atu a, khenkhatte lei hoih a atu hi. Amasa khaichi thumteng pen (ah tawpna pen chihlouh) Pasian thuza a hinpihloute genna vive ahi. Hih gentehna pen tuchiang dongin eite lak a zong diklai chitheih ding hileh kilawm hi.  

Tanchihoih laibute in Jesu nasepnate laka ah thugennate tampi chiamteh uhi. Jesu thugente mipite’n ngai ut theih mahmah uhi. Laisiangthou mun tuamtuan a mipite’n Jesu thugen ‘lamdang asa uhi’ chia chiamteh in um hi. Mualtung thuhilhna ah Jesu’n thuhilhna sau tak nei a. hua thuhilhna bung thum tak dim in kigel hi (Mathai 5-7). Mathai 7: 28 na in hichi’n gen hi, “Tualeh Jesu’n hih thute tengteng a genzoh in mipite’n athuhilhte lamdang asa mahmah uhi.” A poi amhmah khat, Jesu thugen nasan zong mipi tamzaw thamte’n hinpih lou uhi.

A tangpi a genn in, Pasian thu ngaikhia a hoihsa mahmah tampite’n zong hinpi lou mawk hi. Khaichi lei hoih lak a tute mah bangin tawmnou khat in Pasian thu kipakpih in, hinpi taktak hi. Nang leh kei zong Pasian thu za a ah hinpih mi tawmnou khatte ihi thei uhi. Pasian thu za a, kipakpih a, hinpih ding in Pasian in thupha hung pechiatta hen.

 *****13112022*****

Share: