LEITUNG ah sihna in bei hun a nei ngaikei diing a, vaantung ah hinna in bei hun a nei ngaikei diing hi. Sihna pen
 |
| Pic: Author |
I Laa uh khat in, “Hin kum ching a mualliamsa gual ngaihte, tu in thangvaan sau mang ah leeng uh, bang di’n ama’uhte puul i dou diam lei ah, kumtawn a hung chingpa Pasian phat ni hang” a chihbang in, leitung kikhenna gam ah, mualliamsate puul douna hinkhua zakh-na saang in, ama’uhte kiang tunna diing a Pasian tawh hinkhua zakh-na ah nopna leh lungdamna omzaw hi.
Unaupa Lalthangpuia laa phuak ei haam a a kilehkhiatna ah, “Hun kipak om a liam aw mi zatam, i damlai pallun a tul; nam chin in hun mualliam, ngaih huai sa va-ngut hang” a chihbang in, i hun hoihte un a hung mualliamsan zeel a, i damlai pallunte un zong, tulpan a hung kaikhum zeel hi; hichibang ahihziak in Nam chin a mi zousiah in hih hunhoih hung mualliamsan pen, ngaih huai i sa mahmah ua, i khelah mahmah uh hi. Hitalezong hun tung a thu neihna neite i hi kei ua, hun tawh kisai a gen-le-sak neihtheihna diing right zong piak a omloute i hi uh hi. Hichibang ahihziak in LST a i muh Toupa Pasian kiang ah i kileh thak diing uh hi.
Pasian beelte khamuanna maw hibang ahi; LST Job. 19:25-27, “Ka tanpa a hing chih ka thei a hun tawp chiang in leitung ah a ding kiik diing hi; ka vunte suksiat a a omkhit chiang in, ka taksa in Pasian a mu diing a, ka mit mahmah tawh amah ka mu diing a, ka mit in mun tuam enlou in, amah mahmah a en diing hi. Tuachiang in ka sung ah ka lungtang a puukta diing hi,” chi in, Job kichi mipa in, a tate teng a suun nung, a gantate teng a suun nung leh a neih-le-lam teng a suun nung in gen hi.
Ataktak a chih in, Job a diing in a tate, a gantate, a gamte, a silate, a loumate leh a damtheihnate saang a poimawhzaw a om diing in a gintaak huaikei hi; hitaleng ama’n hih silte, a unpi a a taan nung a, hichibang kammal a neihtheihna pen a Pasian vaang ahi. Pasian neite’n maw, a hinkhua ua poimawh mahmahte a taan ua, a lost hang un, Pasian ah khamuanna a nei uh hi.
Tualeh hih a thugente a kipan in Job in a theih chian mahmah sil thum a om hi chih muhtheih in a om hi.
Khatna ahihleh, Pasian a om chih kichiantak in a thei hi. Nihna ahihleh hua Pasian mai ah ni-khat-ni chiang in a ding diing chih a theichian mahmah hi. Thumna ahihleh Hua Hun-le-ni maituah diing in mansa in a omta hi.
Eite zong Khristian khat i hihna uah, silt hum kichiantak in i thei sam uh hi.
Huate lak a a khatna ahihleh; Lei taksa in a gamtat-theihna pen nusiata mahleh, hua lei taksa sung a om hinna kha pen a hingzing hi.
Nihna ahihleh, LST dungzui a na kigen sihna kichi pen ahihleh Pasian tawh kikhenna ahi a, i lei taksa huak pilna a i theihbang uh sihna ahikei a, tualeh hih sihna pen “A change of status/ dinmun kikhekna” chih ahi a, hih pen 1Kor. 15:53-54 na a i muhbang un, “Muat-thei pen Muat-theih louhna a kheek ahi diing a, Si-thei zong, Sih-theih louhna a kheek ahi diing hi. Hichibang ahihziak in, i lei taksa mit a i muh uh, i theih dan uh sihna pen sihna lam hizawlou in, “Dinmun Kikheekna” ahi hi.
Thumna ahihleh, Sihna in eite Pasian hing kiang ah hung puitung hi, chih ahi. Aziak pen, 1Kor. 15:50 na dungzui in, Toupa Jesu Khrist a om mi khat a diing in, sihna pen sihna ahikei a, hilezong omna mun suanna/ kheekna ahi hi.
Sihna in eite, i Toupa Jesu Khrist bang a, a hung thohsak kiik diing ahihleh, sihna pen sihna a hithei kei diing hi.
Sihna in eite, mialna pan a vaak a, a hung thohsak kiik diing leh, sihna pen sihna a hithei kei diing hi.
Sihna in ei haat louhna pan a haatna a ahung thohsak kiik diing ahihleh, sihna pen sihna a hithei kei diing hi.
Sihna in eite, khelhna leh mawhnate pan a siangthouna a a hung thohsak kiik diing a ahihleh, sihna pen sihna a hithei kei diing hi.
Tuni a i leitung mit a i muh uh sihna pen Sa leh Kha kikhenna ahi. I hinna kha un i lei taksa uh a nusiatna ahi hi. Aziak pen i kha hinna uh teenna innpi pen i lei taksa uh ahi.
1Kor 15:50, Tu in sanggamte aw, taksa leh sisan in Pasian kumpigam aluah thei kei a, muatthei in zong muattheih louhna aluahthei kei, chih ka gen ahi.
1Kor 15:54, Tuachia hih muatthei in muattheih louhna a silh a, tualeh hih sithei in sihtheih louhna a silh hun chiang in, zohna in sihna a valhzouta, chia kigelh a hung tangtung ta diing hi. Chih thute LST a i muhbang un, ei Khristiante pen, sihna tung a gualzou diing a Jesu neite, Hinna Pasian a neite i hihlam uh mangngilh kei ni.
Rom 8:10 na ah, “Misi lak a Jesu kaithoupa kha noumah a a om leh misi lak a kipan a Khrist kaithoupa'n noumah a om kha ziak in na pumpi uh sitheite zong a hingsak diing hi,” a chi hi.
Tuni a Sihna thuneihna nuai a omte i nawnkei ua, sihna tung a mi gualzoute i zawta uh hi. Sihna tung a thunei diing a siamthak a omte i hihziak un, gualzawhna hinkhua nei ni hang in, sihna kizousak nawnkei ni.
I Toupa Pasian in a thuphate tawh hung ompihta hen. Amen!
~ Pastor Thangdoulal Suantak
.jpeg)
.jpeg)
.jpeg)
.jpeg)
.jpeg)
