1st Prize Winner Essay Competition - Mr. Francis Thangliantung

DIKTATNA IN NAM A TAWISANG

DIKTATNA :

Pasian hihna(attribute) te lak a khat ahihleh Diktatna ahi. Pasian pen diktatna lam ah buching(perfect) hi. Pasian adiktat mahbang in amah muang a kalsuante zong diktak a kalsuan ding pen athupi pen ahi.

Diktatna ichih chiang in diktaktak a gamtang a khosa cihna ahi a, Hamkamsuak guak a diktat hilou in a gamtatna a zong diktat ahi. Mi diktat in thilhoih leh dik guak bawllou in a Sahkhua a dante zong kiptak in kem in tu tinten tawntung hi.

Bible sung a muhtheih mah bang in Diktatna pen gingtute a ding in poimoh mahmah a, Pasian thu sung a diktatna kigen tuamtuamte i en zual ding uhi.

1.Mi diktat in golgukna/nekgukna kichi mongmong lalou.(Exo.28:8)

2.Mi diktat in deihsak tuam neilou.(Prov. 18:5)

3. Mi diktat in thuakgimna tampi anei a hilehjong tuate tengteng apat in Toupa’n ahunkhia hi.(Prov. 34:19)

4. Mi diktat gouneih manpha hi.(Prov. 37:16)

5. Mi diktat khotuahsiam leh nunnem uhi.(Prov.29:7, 12:10)

6. Mi diktatte tung ah Pasian deihsakna atuung(Psalm 84:15), tualeh a kalsuannate a detsak hi.(Psalm 37:23)

7. Mi diktatte pen kumtawn a kithei gige ahi.(Psalm 112:6)

8. Midiktatte’n thuneihna atuk chiang un mipite kipak uhi.(Prov. 29:2)

Bible sung a diktatna thu tampi muhtheih ding a um a, igenseng kei ding hi. Tua atung a itaklat Bible bung leh thangte bangjah hiamte tungtawn apat in Diktatna thu umjia itheihna ban ah hungpanpih khak leh chi a itaklat ahi a, tualeh ithupi uh zong ahi.

I thulu a diktatna in nam a tawisang chih ahi a, nam tawisang na ding a poimoh pen ahihleh diktatna ana hi ahi. Diktatna in lawmhoih leh panpihtu hoih mah mah khat nei a, huapen ki-ukna/ki-thununna(discipline) ahi. Kithununna panglou in kuamah a diktak zou kei uhi. Tua ahihman in, kithununna ziak in diktatna ahung siamkhia a, mi mahni kithunun joulou pen diktatna lampi juijou lou ahi. Mi kuapeuh amah utna a apai chiang in diktatna lampi nusia in diktatlouhna lampi ah ana kalsuan jojel uhi. Namsung leh khotang kivai puakna ah ki-thununjohna leh diktatna poimoh mahmah hi. Mihing khat hihna a poimoh mahmah khat ahihleh mahni/eimah ki-thununjohna ahi. Tuajiak in diktatna siamkhiatu ki-thununna a hung omlouh chiang in nampi le khotang vaiteng buaizak zel hi.

Diktatna pen kum tungtawn a hung piang khia hijawlou in a zil a zilkhiat thoh jawk ding ahi. I nam uh diktatna toh kalsuan ding chi ihihleh hung khangtou momnoute diktatna lam a kalsuan ding a zilsak ding ahi. Bible sung ah muhthei bang in “Naupang a paina ding lampi a chil in, a upat dong in jong tuate akipat in a paimang kei ding hi”. (Prov 22:6).

Hihsung a imuh mah bang in naupangte diktatna lampite ah kalsuan dan sinsak a panlak masak poihmoh mahmah ahi. Amaute tunung chiang a lamkai dingte ahihman un, sinsakna hoih piak poimoh ahi. Tualeh Romte 11:16 ah “...azung asiangthou leh, abate zong tuachihmah bang in asiangthou hi...”. I nam sung uh puahphatna ding in abulpi puahphat masak angai a, tuahileh maban ding zong hung hoih touzel ding ahi.

Diktatna a ikilam thak ding uh poimoh mah ahi a, tua ahiman in kipat hun mahmah tah hi. Singtuailai ut dandan a khiakkoi ahithei a, aletchiang a bawltheih nonlouh ahihbang in inam diktatna a ikilamthakna ding in tuhun apat a khangnoute diktatna lampi jilsak ding ahi. Diktatna lampi kithuhilhna ding in sehtuam mi a om sese tuankei a, ahihta in jong, mawhpuakna lianpen nu-le-pate khut ah akinga hi. Nampi khat diktatna lamna ding in Nu-le-pate khut a om ahi. Inn sung a diktatna jilsak masa kihileh nampi lamkai hung hihchiang in diktatna mah hung pibawl a hung kalsuan chiangun, i nam etlawmna leh gualtung tuanna i neithei ding uhi.

DIKTATLOUNA

I khotang leh gam a chin tampi ineih te jiak un igam khangtou theilou a, tuate lah a lauhuai leh a khok pen diktatlouhna leh nekgukna ahi. Hihte in inampi min zahlaksakna leh khanmohbok suak sak hi.

Diktatlouhna munkhempeuh a muhtheih in um a, kivaipuakna sang mahmah leh zahtakhuaite a zong om veve hi. I lungtang tawngte a hihte diktatlouhna lungtang ihua chiat ua, ahinlah mahni angkhualna leh hamphatna ding om chiang in diktatna lungtang kineithei nonlou hi. Hichibang thil namkhat peuh sung ah muhtheih in om ah, tuate ziak in midiktatte khut sung ah ki omlou in midiktatloute nuai a ki om jaw hi.

Diktatlou a gamtatna te ziak in ikivaipuakna te a buaina tampi piangzel in khotang leh mimal hinkhua tampi te susia theijel hi. Hichibang a diktatlouhnate ziak in nampumpi midangte muhniam leh mite ngaihsang kihi theilou lou a, i nam a minsiatna leh thuak ding kua dang hilou in eimah kihi a, mite mai ah maizumna leh mahni kimuanngamnate kiam in tuate ziak in kineu suksuk lawh ding hi. Nampi lamkaite kivaipuakna a mimal metna leh diktaklouhna toh a ahung gamtang a om chiang un, paidan lemlou leh lungtunglou a lungkimlouhna hungpiang chiang in khotang kivaipuakna hong subuai in siatna tampi tuntou jel hi.

Hichibang a diktatlouhna hang/ziak a inam sung abuai vengvung chiang in kuan hung hunkhia thei ding ahia? Kuamah dang omlou in eimah mah bawl ding ahi. I dinthak kiktheihna ding in thudik leh hangsan tak a panmun khoh a, mai-et tuam omlou a adik-atang a thukhen zok ding ahi. Thutak a vai ihom theih a diktatlouhna kipatna bul ibawhkhiat chiang un nampi kilamthakna hung tungthei ding a, lam-etna bei le sangdak ngamloute a ding in lam-etna nisuak hung hita ding hi.

THUKHITNA:

Nampi khat kilam thak theihna ding in mitphiat kal a lamkhiat theih hilou hi. Sapte/mikangte thupil khat in ana genna ah “Rome was not built in a day” chih ahi. Hih thupil in agennop pen ahihleh thil thupi leh lian, hunsawtpi theihden tawntung a om ding, minthang leh akhang-akhang a gentham ching ding khat sepsuah khiat leh bawlkhiat theihna ding in hun-le-tha lut mah mah ding agenna ahi. Tuachi mah bang in inam tawisangna ding leh lamthakna ding in hun lut ding a, diktatna a kilamthak hunjong hunsawt maithei ding ahi. I nam khantouhna ding in, ikalsuanna ah dawhjawhna leh migitna tawh diktatna lampi haksa mahleh kalsuan hamham som ding ahi. Haksatna leh gensiatnate ithuak ding ua, ahinlah lawhchinna pen a tawptan taite a ding ahi.

I Toupa Pasian in diktatna tawh inam sung uh vai hunghawm henla, tualeh eimah jong diktatna lampi tuan kawmkawm in kalsuan jousem di’n thupha hung pia tahen.

(Note: Hih Essay ahileh the 1st Khalvontawi Essay Writing Competition 2020 ah "1st Prize Winner" ahi. Admin te phalna louh leh hih khalvontawi media source credit pelou in mundang a suahsawn/piaksawn phal ahikei hi.
- Admin, www.khalvontawi.com)

Share: