UNITED Peoples Front-Zomi UPF (Zomi) saina in tuni in Muvanlai Camp ah SoO tawh kisai a Government tawh kihounate report piakna leh political awareness program om hi. Hiai hun ah UPF (Zomi) heutute apan report om in, paikhawmte apan dotna leh dawnna hun banah kikupkhawmna hun leng nei uhi.
Hunzatna ah Singngat Area a khaw 30 val apan Hausa, VA member, Zomi CSO, Saptuam heutu, Youth Club leh pawl tuamtuam apan mi 250 val paikhawm uhi.
Commanding Officer Lalringzuala, Salvation Army in thumna a hun pan in, Camp Director Nathan in vaidawnna thu gen in Khamtheih douna ah mipi leh Hausa te'n leng panpih dingin chialna bawl hi.
Ketheos Zomi, Team leader, UPF(Zomi) in report piakna leh Dotna leh dawnna hun zang hi. Aman agenna ah tutung a a kalsuanna uh hun dang tawh kibanglou a mimal mahmah a leng nakpitak a hon hetkha ahihdan a gen banah thum mite thumna ziak leh khaw hausa leh mipite'n Pawlpi nung leh ma a a hon dinpih ziak ua hiaitan kitung leh mipi deihna bang a kidingtang zou ahi chi hi. Zomi-te adia Pathian in lampi a sialsak dante, a hunhun a panpihtu a piak dante, kilang ahihdan gen kawm in thumna ah phawk tou gige ding in ngen hi.
Aban a genna ah Zomi te'n SoO Extension deihlou kihilou in, Govt. roadmap leng zui nuamlou kihi lou a, himahleh Government palaite tawh kithukim theihlouhna pen camp 3 teng ahibang a aom ding chih chauh ahi chi hi. Huaiziak in eite pen a thukhel leh eiziak a SoO Extend a om lou hinai pahlou in, tua camp tawh kisai discussion zawh chiang a Ground Rules te etkhawmna omlai ding ahihna ah tua dan a ZRA ziak a SoO Extend theihlouh kichi pen diklou ahihdan gen hi.
Huaiban ah UPF (Zomi) heutute pai nunga leng meeting khat om ahihdan gen a huai pen a sap a ki-omkha lou ahihman in meeting a om theihleh SoO leng extend louh tawh kisai in bangziak a Zomi-te ngawh a om sese hiam chih gen hi.
Bangziak a UPF (Zomi) hong gingkhia hiam chih Ketheos Zomi in tomkim a gen in, a lou-theilou dinmun a kitunziak ahi chi hi. Kum 2005 in ZRA in SoO la masa a, Govt advise na bang in Kuki groups tuamtuamte zawn in, ngaihdan kibatpih deuh teng tawh Aizawl ah, huailai a Mizoram CM Zoramthanga theihpihna tawh UPF bawlkhiak in hong om chi hi.
UPF sunga ngaihdan kibang kichite ahihleh Issue base a kalsuan ding, nomenclature ki-imposed louh ding, kuapeuh huamkha a kalsuan ding (inclusive) chih ahi chi hi.
Talk hong paitouzel in, UPF & KNO in mipil misiamte kaikhawm in Draft bawlsak ua, amau Article 244A based TC status hoihtak bawlsak in, TC min ding ah UPF leh KNO in Public consultation sai in, Kangpokpi ah Final ding in kipaikhawm chi hi.
Huai hun ah, suahpih te'n Kuki TC ahih kei leh ka pomthei kei uh a chih chiang un, i movement uh leitual kidenna hong bangta ahihman in, huai hunlai a Interlocutor AB Mathur in leng, amin ah buai kei un, Govt in amin kon phuahsak ding uh chi in, TC Provisions ding ahi na buaipih ding uh hon chi ahihdan gen hi.
Amah advise dan a paitou in, Solution omthei dinmun a hong om chiang in suahpih heutu khenkhat leh State Govt a mi khenkhat pangkhawm in ZRO/ZRA suksiat hon sawm in, Vice President Calvin zang uh a, amah kiphinna in ZRO kia buaisak lou in, UPF a phelkhap banah, i movement leitual kidenna ahihman in, poi chihlouh ngal gen ding omlou ahi chi hi. Huchibang dinmun in om mahleh, Pathian in chance hon bawlsak a, ei Plan hilou May 3, 2023 in buaina kituak a, hiai buaina ah, Kuki, Zomi, Mizo leh Zo Suan nam teng kipangkhawm a, Galdou kawmkawm in Separate Administration movement kipankhethei chi hi.
Hiai movement ah leng non-communal or non-nomenclature in kipan a, CORSAM, Joint Innpi, JAC Student body, MTFD leh a dangdang kibawlkhia a, himahleh huaite leng Kuki min ginglou chih ziakin pawlkhatte hong kiwithdraw uh chi hi. Hiai bangteng i tuahtouh chiang in UPF(Zomi) chih alou-theilou a zang a, kalsuan hong ngai hizaw ahi chi hi.
ZRO in UPF a kibawlkhiak masak apan tunitan amuhdan ahihleh Eipawl min (name) haihchilhte i hi ua, huaiziaka Meghalaya Model poimawh i hi uh chih ahi chi hi. Meghlaya State movement lai in leng Hill Leaders Conference chih min zang ua, movement khat a paikhawm in, State hon muh chiang un Govt. in amin phuahsak ua, Meghalaya chih hong piang in, tua state thak sung ah Garo, Khasi leh Jaintia Nam te'n kituaktak in a zar zoukhawm uh a chih banah, huaidan mah in, Kuki, Zomi, Mizo leh a dangdang min liandeuh a ineihte banah Zosuan tribes teng in hamphatna kibang tangkhawm thei i hi chih chiang mahmah ahihdan gen hi.
Huaiziak in ZRO kalsuanna pen a phengphi, tuampai nuam dan in koih kei un chi a, i vek a paikhawm dialdial thei i hihlai a, Zomi nawlkhiin sawmna, ZRO suk chimit sawmna policy (anti-Zomi policy) tuamtuamte ziak a hiaibang dinmun kitung hizaw ahi chi hi.
Hiaitan tun nung in leng suahpih heutute'n theisiam a, Non-nomenclature & Inclusive Policy and Strategy hon pompih theih uh leh chiklaipeuh in kong zapi kihong gige chi hi.
Thautawi te'n Operational area kineichiat a, Sadar Hills ah KNF leh KRA om in, huai sung ah VPC leng om uh, himahleh, policy matters ah KNF/Kuki forum ah paikhawm uh chi hi.
VPC HQ pen Zomi Council nuai a om ahi chi in panla dek leng buaina piangpah ding ahihbang in, Zomi operational area ah Zosuan teng zalen tak a i teenkhawm ding mah himahleh, lamtuam sial a, policy tuam a om leh eisung ah buaina piangpah ding ahi chi in, Tribe level a sai ding leh sailouh ding om ding a, Nampi level a saiding om ding ahihman in, huaitan khensiamlou heutu leh hausa omna ah buaina piangsek ahi ahi chi hi.
Zosuan ngen kihi a, Zomi policy zuihsiam ding, anuam a haksa i palkhawm ua, agah lawh ding a omleh leng i hamphatpih chiat ding uh ahi chi hi. Nampi level ah kuamah khentuam ZRo/ZRA in neikei mahleh, Nampi policy kalh a gamtang leh kalsuan khatpeuh bel amah leh amah Nampi melma kisuah ahi chi hi.
Huaiban ah Zomi ihihna pen electoral politics tawh kisai kha hetlou a, electoral politics ziak a Zomi hihna puansilh bang a suah khiak a silh theih zel himawk lou ahi chi in, Zomi ihihna taihsan theih leh kiphawk louhsak theih himawk lou ahi chi hi.
Maban ah pangkhawm semsem ding, hat semsem ding, Pawlpi lam leng kibawl ngai omte kibawl hoih thak zel a, kituak tak a kalsuan tou ding ihi uh, chi hi. Banghiam khat bek muh teitei na dia pan i lak chiat ding uh ahi chi hi.
Dotna leh Dawnna hun dakkal kim sung neih ahihzawh in, Pastor Genliankap, ZRO Chaplian in Nam nasemte adia thumsakna nei hi. Hunzatna a kihelte'n a theihlouhte uh theihchetna leh thudik leh diklou theihkakna mu in kipak mahmah uh chi'n leng gen uhi. Nitaklam ann nekhawmna ding G.Bualjang hausa Suanchinpau Guite in bawng khat a thawh mipi paikhawm teng in nekhawm uhi.
Behind the Truth' BTT
🔴🟡🟢
.png)
