Thangkhal Missionary Day zat in om | TBC Tangnuam

"Thangkhal minam sung a Pasian thu lut kum 80 chin ni..."

TBC Tangnuam in Progrmamme thupi tak in zangh...  

LAMKA, 08 MARCH 2019 – Thangkhal minamte lak a Pasian thu lutna kum 80 ching ni 07 March 2019 in Thangkhal Baptist Church (TBC) Tangnuam ah thupi takin Progrmamme zang uhi.

Hih hun ah Pastor Thawngluan-te innkuan (Thawngluan suan leh khakte) zong chialin om a, amaute apatin mi 5 in Progrmamme uap thei uhi.

Pastor Thawngluan Mualsuang

Missionary (Pu) Pastor Thawngluan tanchin leh Thangkhal kual a Pasian thu lutdan khangthu sutna Rev. Khaikhanthang in nei a, program hun sung in MG Muanlal, Youth Secretary, Tangnuam TBC in makaih in Nu Mannuamching, Member, TBC Mission Board in patna thumna nei hi.

Pa Paulianmang, Chairman, Mission Department, Tangnuam TBC in zinte vaidawnna neih a, tua khitin TBC Tangnuam Khanglai te'n "Zinmang henkol bulh Salbang i taanlai in khaubang sut ding i Pu Thawngluan" chi laa, Rev Khaikhanthang in aphuah ngainuam huai tak mai in sa ua, tang Goulun in music tum hi. 

Tua khitin mipi ding in Evan. Langh Do Khup in a phuak "Itna Sisan Luang In" chi la mipi in sa a, Missionary thohlawm Lia Remi LC Thangkhal leh Lydia Liankim in a donkhit un Upa Hangkhankhup, Vice Chairman, TBC Tangnuam Pasian kiangah apna nei hi.

Grace Nauching in "Sian itna Simthu" chi laa siamtak mai leh aw naldueuh mai in awi ziah ziah a, a laa sakin mipi lungsim khoih mahmah hi.

MG Muanlal leh Rev Khaikthang
in Pu Thawngluan Mualsuang visit-na nei

Rev. Khaikhanthang, Delhi TBC Pastor & Thangkhal Gospel Film "Tanglai leh Tuhun" Director in, Thangkhal Kual a Pasian thu pua lut Pastor Thawngluan tanchin sutna nei hi. Rev Khaikhan in agenna ah Pastor Thawngluan in Thangkhal minamte lak a khaichi hoitak hong puak lut a, ama zalin imi nam leh i saptuam khalam salam ah khanlohna om chi hi.

Pastor Thawngluan in 1939 March 07 ni'n Thangkhal minam sung a Pasian thu pualut hi. Tuni chingtan a kum 80 china melte muthei a i om uh kipak huai mahmah ahi chi hi. Pastor Thawngluan ahihleh T. Khajang Thangkhal khua pansan in Pasian thu Thangkhal minamte laka tangkou koikoi hi. Pastor Thawngluan hunlai in T. Khajang Thangkhal khua hausa te'n atunna ding inn ana pia a, akhua uah ana om sak uhi. Pastor Thawngluan a zin tun ziak un, Khajang in Thupha ngaih mah mah mai a, mou lam a zong thupha nga uh chi hi. Khajang khua a mou om te Lamka apatin mouthak ngen hi a, Khajang nuamsa mahmah mai ua, lungmuang tak in om thei uh chi hi. Pastor Thawngluan ana zintun ziak un Thangkhal minam sung a zong Record hoih mahmah mai uh chi hi. Pastor Thawngluan in a zi toh Khajang a ta ni tan piang man hi.

Pastor Thawngluan in diktakna chi hong tusak a, ama zal a khalam khanlohna leh taksa a khanlohna Thangkhal minam lak a om chi hi. Thangkhal kual a Pasian thu pawm masate tanchin genna zong neih hi. Tuate lak a Pu Ginsuanhau MLA pianna'pa Thangzalang tanchin zong gen kha a, Pu Thangzalang ahihleh a si ma inzong Pasian kiang a thum thum mi ahi chi.

Missionary Thawngluan in Thangkhal khua tuamtuam a thu agen lai in Khaukual khua a dingin khalam a mi khanglou masapen ahi chi hi. Thangkhal sungah zong Pasian nei leh Pasian ana ngaisak masate Pasian in domsang a, mit a mu thei in taksa dan a zong khangtou mahmah uh chi hi.

Thangkhal khangthu a kisut chia mite lungsim khoi mahmah mai hi, Rev Khaikhanthang in thu agen zohin Lia Lydia Manhoihching in Ei Thangkhal minam te adin Jesu Christ hoih chi, kipak huai mahmah tuni in eite a din Pasian hoih ahih man in, Unaupa Pumkhothang Tawmbing in "Christ hoihna" chilaa Lydia Manhoihching in siamtak in sa hi.

Tg MG Muanlal, Pi Thuangkhongai, Rev Khaikhanthang

Tua khitin Pastor Thawngluan tapa takpen Pu T. Ginzalian in thugenna na nei hi. Ama'n agenna ah, "Ka pa zal a thei phak leh Thangkhal min a program omte a chialna leh deihsakna ka mute uh thupi ka sa mahmah uhi. Tuni chiangtan a na deihsaknate uh ka mu ka tan te ziakun ka kipakna uh sang mahmah hi" chi hi. Tuabanah tuni mahmah in Pastorpu U Khaikhan toh KHALVONTAWI te'n zong tuni ka tenna uh hong pha in, vehna honnei uh chi hi.

"Ka pa Thangkhal Kual a Pasian thu hong gen apatin kum 80 chinna te bang thupi tak a lop a om kipak huai a, ka pa na ngainatna uleh ka pa na itna uh thupi kasa mahmah a ka pa zal a asuan akhakte zong chialna te ziakin kakipak mahah chi hi.

Upa Laanghaulian, Chairman, Tangnuam TBC in thugenna nei a, tuachi'n Pastor Thawngluan innkuan pihte kiangah "Present" piakna Upa Hangkhankhup in nei hi. Tuaban ah TBC Tangnuam Nupi Pawl leh Khanglai Pawl in Thangkhal Missionary Pastor Thawngluan innkuan pih, asuan akhak te Progrmamme uap hong kal suan mi 5-te kiangah pahtawina pakkhi awh sakna nei uhi.

Pu (Pastor) Thawngluan tu-le-tate ban ah KV Social Media Group leh Rev Khaikhanthang

Mission Department, Tangnuam TBC in present piakna zop kik a, Pa Paulianmang, Chairman, TBC Tangnuam Mission Board in Pastor Thawngluan'zi Thuangkhongai a di puan khat present piakna nei hi. Kipakna thugenna Pa Kamsawmthang, Mission Secretary in nei in, mipi dingin kikhop tawpna laa "Gospel delh huai pen pai jel in la" chi laa sak zoh in Upa Laanghaulian in hun khakna thumna nei hi. Kikhop tawpin mipi paikhawm tengin kimelthei tuahna leh lungdam etsakna in singpi leh nekthei nek khawmna nei in hun zou uhi. Progrmamme hunsung Rev. Ginkhankap te nupi in zong uap uhi.

Thangkhal Kual a Missionary Pastor Thangluan Tawmbing suan leh khakte:

1. Pi Ngaizaniang kum 1934 in Temnol Khajang (T. Khajang Thangkhal khua) ah ana piang hi. Amah ahihleh Pastor Thangluan in Thangkhal minam te lak a Pasian thu gen a T. Khajang khua pan san a agen lai a T. Khajang mah a, a zi toh aom khawm laitak a piang ahi. Pastor Thangluan ta masapen ahi hi. Pasian lungsiatna toh tukum 2019 tan a kum 76 phata hi.

2. (L) Vungzanem ahileh T. Khajang khua ah kum 1972 in a pang hi. Ama ahihleh a tawngtawn mun ding hongna zotsan ta hi.

3. Pu Ginzalian, Pastor Thangluan tapa takpen ahi a, kum 1950 in Mualpi a Pastor Thangluan in Mission Teacher asep laitak in pang a, tukum 2019 tan in kum 69 hita hi. Dorcas veng New Lamka a zi ata toh khosa lellel uhi.

4. Pi Chiinkhanngai kum 1952 in Mualpi a piang a, tukum 2019 tan in kum 67 pha hi.

5. Pi Lalmuanching kum 1957 in Panglian khua a piang a, tukum 2019 tan in kum 62 hita hi.

6. Pu Nengkhanthang kum 1959 in Panglian khua a pang a, tukum 2019 tan in kum 60 hita hi.

7. Pu Thangkholian kum 1961 in Panglian khua a piang a, tukum 2019 tan in kum 58 hita hi

8. Pi Manhoihching kum 1965 in Panglian khua a pang a, tukum 2019 tan in kum 54 hita hi.

Thangkhal minam te Gospel toh khalam taksa lam mit vaksak Missionary Pastor Thangluan ahihleh kum 1902 in piang a, Kum 1983 July Date 2 in a tangtawn mun ding zong zotsan ta hi. Khovel kum 81 adam sung tengin Thangkhal minam te suaktatna khovak puaktu hi a, tuni chiangtan in Thangkhal nam Thangkhal ham leh pau zang Saptuam pawl tuamtaum a om ten zong ki mang hilh lou hi.

Pastor Thawngluan a kipakna khat ahihleh asi masang in Thangkhal Saptuam din khiat man pen a kipakna lian penpen te lak a khat ahi. Thangkhal Saptuam kum 1981 April 04 in M. Tanglian a Upa Gindal inn ah ana kiphut khia hi.

Thangkhal Saptuam min masa pen "Thangkhal Christian Association (TCA)" kiphu khiat khit, kum 3 leh kha 3 apai zohin Pastor Thawngluan in a tangtawn mun di hung na zawtsan hi. Ama damsung a Saptuam a din khiat man pen thupha i ngahna mahmah uh khat ahi hi.

Pastor Thawngluan a seenzi (zi masa) T. Khajang Thangkhal khua a kivui hi. Alam dang mahmah khat ahihleh Pastor Thawngluan in adam lai in Thangkhal minam te a ITNA tawh en in, Christian dan toh kituak lou, hihte na bawl lou di uh, hite na bawl ding uh chi thutampi deihsakna toh gen gige hi.

Tangthupha agenna khua pansatna Khajang khua ah, a zi si in T. Khajang khua mipi ten, "Pastorpu aw ka kap thei di uai chin dong uhi". Pastorpu Thangluan in adawnna ah "kap zenzen lou e" chi in akhua mipite kha muan thu gen pih lai hi. A zi si a Khajang khua mite kah di phal lou lai hi, i ngai sut ngetngut leh a lamdang mahmah khat ahi hi.

T. Khajang khua mipi te'n bang ziak a Pastorpu zi si a kakap thei di uai maw chia adot e ichi leh, Christian dan juih di na tampi Pastor Thawngluan in gen ahihman in, denchia va mawk kahlei Christian dan toh kituaklou achi kha di aw chi'n va adong uh, kichi hi. A seen zi asi tak chiangin kum hong paitou zel a, Pasian gamna aseppih ding zi Pasian in khat pia in, Pi Thuangkhongai ahi a, tun chiangtan dam lai hi. Tu'n Dorcas Veng ah om a, atate toh houlimna a kum 95 vel hita ding in gingta uhi. Pu Thangluan in a zi luang bei zen a eite lak a Pasian thu hong tangkou pen manpha mahmah hi. Thangkhal mi leh sate a itna thupi mahmah hi.

~ MG Thangkhal

Admin, KHALVONTAWI Social Media

Ni 9 sungin Thangkhal sungah mi 5 mualliam

LAMKA, FEB 26 – Tukum 2019 February kha Vangsiat huai tak maiin Thangkhal nam sung ah mi 5 mualliam hi.

Date 16 February 2019 in Pa Khupneilian of S. Geltui in hong na mualliamsan a date Feb 17 ni'n a S. Geltui Hanmual ah kivui hi.

Nu Mandeihching of Shillong in date 22 February 2019 in hong na beisan a, aluang M. Tanglian Khua ah Feb 24 kivui hi.

Date 23 February 2019 in Pi Ginkhoman zingsanglam in hong beisan a, Feb 23 mah in Ngoiphai Hanmual ah kivui hi.

Date 24 February 2019 zingsanglam dak 1:15am in imi nam a ding a Information Secretary a i neih uh Pu Ginsuanlam of New Mission Veng in a tenna inn ah hong na mualliamsan hi.  Sunday mah in New Mission Veng Thangkhal Hanmual ah kivui hi.

Date 24 February 2019 in Pu Ginkhokam of Tuibuang in hong na mualliamsan a, Feb 25 Tuibuang Hanmual ah kivui hi.

Photos: Condolence Program leh Kivuina Lim by Mr MG Muanlal Thangkhal

M. Tanglian Biakinn honna om

LAMKA, 21 FEB 2019 — Thangkhal Baptist Church Executive Member-te leh TBC Woker te’n tuni zingsang lam dak 8:00am in M. Tanglian khua a Biakinn honna nei uhi.

Biakinn honna leh latna TBC Tuitha Area Pastor Thanglet in nei a, Upa Zalianpau, Chairman, M. Tanglian TBC in Progrmamme makaih in, Upa Khaikhanhau,  Chief of M. Tanglian in mipi-te vaidawnna nei hi.

Phatna laa Grace Nauching leh Nuamngaihkim in sa ua, Upa Thangsuanhang, President, TBC in thugenna nei hi. Aman agenna ah M. Tanglian khua pe’n Thangkhal minam a ding a mun poimoh mahmah mun ahi chi. Thangkhal minamte kivaihawmna sangpen Thangkhal Peoples’ Organisation (TPO) leh Thangkhal Saptuam kiphu khiatna mun M. Tanglian khua hi a, imi nam hi’n Saptuam lam hitaleh a mun poimoh mahmah ahidan zong gen hi. A sung a om mite lungkia lou a pan alak tou ding uh chi’n hasotna zong nei hi.

Progrmamme hunsung in  Rev. Chinminlian, Executive Director, TBC; Rev Ginkhankap, Upa Dalkhenpau, Rev. Kamsuanhang,  TBC Singngat Area Pastor, leh Upa Khaikhankap te’n zong thugenna nei uhi.

Pastor Hangmuanlian, Director, Youth & Mission, TBC in thumna neizoh in paikhawm mipi te’n Itna Annkuang umm khawm in hun zou uhi. M. Tanglian khua a Biakinn hon thak ahihleh ni dang a PCI (R)-te Biakinn hih a TBC Pawlpi in Rev. Khen P. Tawmbing kiang a ana lei uh ahi.

TPO prez leh mi 3 gari'n phukha Shillong ah

SHILLONG, 17 AUG 2015 --- Zani zingkal lam in Pa Thangsuanlal te nupa leh Pa T. Khaikhanhau (Tanglian Hausapu), President, Thangkhal Peoples Organisation (TPO), Manipur te nupa'n vangsiat om takin Nongpoh, Meghalaya khel deu mun a gari tuanna uh Maruti car  pen gari dang khat in phukha in Guwahati International hospital ah etkol in om uhi. 

Tanglian Hausapu leh a gari nei le ahe'k Pa Thangsualal pe'n neukhat kisukha sim uah ahi'n a condition uh bangmah lunghimoh huailou chithu kiza.