Manipur Fake-Encounter

T

unai a Supreme Court in Manipur a Fake-Encounter a kigente tungthu suichien di’a Special Investigation Team (SIT) din dia a thutan khu sil hoi ahi. SIT in fake leh fake-lou ahing suikhiet i lamet uhi. Manipur a Security Force (Army or Police) te’n a ginmawte kaplum thei ahi chieng ua, minau taang hinkhuo khu bitlou hi. India Fake-Encounter ah Manipur a 2-na ahi khu sil lamdang ahia, hinanleh a gam a tengte di’n bangma lamdangna umlou hile kilawm.

 

Security Force leh Helpawl kikaptuoh chia mipi’n i thei uh khu a khem (fake) tampi ana um hi’n National Human Rights Commission (NHRC) in theikhia. Gintat huoilou khawp ah i gam ua tambang kikaptuohna a shi ana tam maw hi. Security Force te’n a ginmaw khat khu in kaplum dap thei a, tuazou chieng encounter ah shi hi chileh ko’n a theita diei maw?

 

Tambang a shina tuo khu i gam uah ana tam a, shina tuo innsung mite’n State Government kungah ana complain nanleh uh bangma a law zou tuon sih uhi. Tuabang government nuoi a um ihi manun Supreme Court thutanna khu a kipahpi huoi a, NHRC in zong minau taangte bitna a hing ngai poimaw tousem a dei huoi.

 

Naupang kum 12 a u-pa nasan singnuoimi chi’a Security Force te’n a kaplup uh khu Supreme Court in gingta tuom theisih. Tambang naupang tunga agamtat thei uleh pichingte khu bang suota ding? Tambang a shi mi 1500 vel Manipur ah ana um dan in Supreme Court ah complain pialut in um hi. Security Force tungah public in thuneina kinei sih a, hinanleh amau un zong dankal a gamtat theina a nei tuom sih uhi. Tualeh human rights zong a bawtsia thei tuom sih uh.

 

Manipur a shina kipatna khu Security Force-te zieh ahi chilei i khiel sih ding. Thuneina kheng val a agamtatna zieh un minau taang kishi loh vagiap ahi. Tuaziehin i gam ua Security Force te’n encounter a shi a chite uh kichien tah a suichien ding a poimaw mama mai. Mohna neilou tampi Security Force khutah shi dan in kimu thei hi.

 

Security Force-te gamtatna dihloute soisel ding khu a poimaw hi. Tambang shina dihlou i ngai poimaw lou uleh tampi’n kishiloh tou zel ding hileh kilawm hi. Pasal gentaahlou numei zong dawm tuonlou uhi. Ginmaw a um khate Security Force ‘thautang’ a pat a suohtat ding a gintat huoi lah deu hi. Adiehin Army Operation, Patrolling leh Curfew hun vel khu minau taang bitlou laitah ahi. Tambang hun khu ahi Security Force powerful laitah ahi a, tuaziehin minau taang adia hun zauhuoi tah ahi hi. Tuni’n mi um muong khat zong encounter ah shi chia kibawl thei maw ahichieng, suichien ding tam mama ding hi. 

Editorial, Zogam Today | 12.012.2012

Share: