ZORO Kaihhruaina In A Tum Khatna Remna Siam A Ni
21st September, 2024: ZORO kaihhruaina in Myanmar ram Chin State a awm Chin National Front (CNF), Interim Chin National Consultative Council (ICNCC), Chin Brotherhood leh Chinland Government hruai tute tel ni, inremna thuthlung sawihona hun hman a ni a, Pu R. Sangkawia ZORO President in a kaihruai a, Pu Rohmingthanga Kawlni Vice President in hunserh a hmang a India ram Mizoram State Aizawl City Pu Lalmuanpuia Punte, ZORO Vice President & Adviser to CM (Political) room-ah vawiin 21.9.2024 chhun dar 12:00 ah inremna thuthlung sawihona an neih thu ZORO G.S chuan Zofa Journal ah a hriattir.
Thu dawn dan in ;
ZORO chuan unau leh unau inkarah inhmuhthiam lohna awmin silai hial lekin an lo inkap tawh a, nunna chan pawh an awm a ni. Hei hi ZORO chuan tha ti lovin inremna kawng a zawng thu a sawi.
Pu L. Ramdinliana Renthlei ZORO General Secretary chuan ZORO in remna palai hna an thawh chhan sawiin, “Zofate hi unau vek kan ni a, inhmu thiam lo tur kan ni lo a, tangrual tur zawk kan ni. Unau kan nih angin inthen thei kan ni lo a, indo thei pawh kan ni lo. Zofate chu khawi hmunah pawh awm ila lungrual taka awm tur kan ni a, keimahni leh keimahni hi hmelmaah kan insiam tur a ni lo a, hmelma thuhmun nei tlang zawk tur kan ni. Zofate hi Pathian ringtu kan ni a, Pathianin min pui anga engtik niah emaw chuan inremin kan la awm anga kan la insuihkhawm vek dawn a ni.”a ti
He huna thusawitu Pu Lalmuanpuia Punte, Adviser to CM & Vice President ZORO chuan, “Vawiina hian inremna lam hawiin ke kan pen a, remna palai in rawn kal tha a, a lawmawm hle a ni. Kan unaute inrem hi Mizoram sorkar duhdan a ni a, vawiina kan inkawmkhawmna pawh hi sorkarin min hriatpui a ni. Sorkarin ZORO kaltlangin remna palai hna kan thawk a ni. India Sorkar pawh hian in inrem hi a duh a, India hian tanpuina min pek pawh a duh a ni.” a ti.
ZORO huaihawta inremna thuthlung sawihona hi tluang taka neih a ni a, Pu Dr. Lorain Lalpekliana Chinzah, Adviser to Chief Minister in a telpui bawk a ni. A hnuaia mi ang hian thawh dunna thuthlung siam a ni.
THAWH DUNNA THUTHLUNG
Keini Chin National Front (CNF), Interim Chin National Consultative Council (ICNCC), Chin Brotherhood leh Chinland Government te ni 21, September 2024-a Zo Re-Unification Organisation (ZORO) huaihawta inkawm khawmna nei te hian uluk taka kan sawi ho hnuah, a hnuaia tarlante hi thinlung takin kan pawmin kan zawm tlang tih kan puang e.
1. Keini Zofate (Chin-Kuki-Mizo) hi thlahtu thuhmun, tawng khat hmang (Same language - different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni.
2. Kan ram leh hnam tana hma kan lakna kawngah kan thahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh.
3. Tun hnuah buaina leh harsatna a lo awm pawhin tharum leh ralthuam che lek zawng a hmalak loh nise.
4.
ZORO hmalakna a inremna thuthlung sawiho hi tha kan tiin kan pawm a, inremna tluantling a awm theih nan atul dan a zira inbiakna neih leh nise kan ti.
5. Inremna Committee siam tha kan ti a, meeting leh hunah inremna Committee siam nise kan ti.
-----------------------
~ ZOFA JOURNAL
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
