"Phatna Kipanathupa seiphong leho keng iti hoi tam!"
(Rome 10: 15)
By: Rev. Yampau, Ph.D.
Thumakai
Mapgam kiti tua Layshi gamkaisunga cheng eimiteho lah a Pakai Jesu Christa huhhingna thupha lhangsamdinga Manipur North West Association akon hungkisol Ojapu Tongkam Singsit (1909-1958) jouva hungkisolkitchu Ojapu Letjavum Sitlhou leh aloinu Ojapi Jampineng Sitlhou hilhon ie. "Mimasa teho khonung (The footprints of the faithful Missionaries)" (Jer. 6:16; Heb. 13:7) hetdoh akon tukhangmiten Pathen tahsanna lamdol a pilhin naleh panlahna aneidiu deinan hiche Pakai lhachateni thusimhi aphatdungjui in ahung kijih doh in ahi. Pathen in asimdoh Ho jouse chunga athah in phatthei bohjom tahen.
Hinkho masalam thu
Pu Letjavum Sitlhou hi Manipur state, Tamainglon District a Malungdai kiti khoa kum 1900 a peng ahin, apa chu Pu Luntong ahi. Khosung mitechun apachu ngailut sahtah in "Tuhbeng" tin anakou un ahi. A jiehchu amahin a onsehleh Atuh chachu a behbeh ji hileh akilom ie. Pu Letjavum hin penpi sopi pasal khat aneiyin amachu amin Pu Ngultong ahi.
Pi Jampineng Sitlhou hi Pu Lhunjamang Sithou le Pi Phelchong Sitlhou chate lah a alhumpen ahin, kum 1907 a Ukrul District, Bijang kho a anapeng ahi. Apenpi asopiho chu ahileh tah le don dungjui a jihlhahding chun: Pu Jamkithang, Pu Jamchungnung, Pi Lhingpineng, Pi Thangkhoneng, leh ama Pi Jampineng ahivie. Pi Jampineng hi asapohdan aneuvangin mi melhoi khat jong ahi. Hitia asapoh aneu jieh jong hintin, insungmi le khosungmiten ngailut sahtah in "Pisi" tin anakou un ahi.
Lekhasim Hinkho
Kangpokpi Mission School kiphudoh hi Manipur thinglhangmi adeh a Manipur eimiho dinga phachomtahanahin ahi. Mission school phatchompi holah a Pu Letjavum leh Pi Jampineng jonghi anapang lhonin ahi. Pu Letjavum hin Mission school a class VI gei anasim in ahi. Pi Jampineng hi kum 1921 in Kangpokpi Middle English School (ME School) a school anakai pen in, class III achaiphat in kum 1924 in Nawgong (Assam)a class IV – VIII gei agasim kit in ahi. Assam a Class VIII asimlai chun Assam Governor pun lekhathep hetpina medal khat(Outstanding Student Medal) anapen ahi.
_____________________________________________________________________________________
1 Hiche thusim a asungthu ho kilahdohna hochu Reference (phengmai -9) a list akibole
Christa a hinkho kikhel
Pu Letjavum hin Pakai Jesu Christa Huhhingna thupha chu Mission School akaina akonin ahintahsan in chute chun kum 1924 in Missionary sappa Rev. Dr. Crozer khut a Baptize (Twiphum) a nachangin ahi. Pu Letjavum hi Pathen natohding thanomtah mikhat ahin, aman ahinkhoa atuppen chu Missionary khat hiding tihi ahi. Hijeh chun Pathen thu jildin, Jorhat Bible School (Assam State) a G.Th kum thum agasim in Kangpokpi Mission School a Pathen na ahintongpanin ahi. Pathen natohding thanopjeh chun Kum 1931 in Kohima (Nagaland) anajonin, kum 3 jouvin Manipur ahinjon kit in ahi. Chutichun phatsot louvin Pi Jampineng toh kum 1934 in Pastor Khupsei in Tamainglon H.Q ah Pathen min in gopna ananeilhontan ahi. Pi Jampineng vangchu Missionary sappa Rev. William Pettigrew (William Shaw) Pathen thuseina akonin Pakai Jesu chu a huhhingpu le a Pakai in ahinkisan in ama khut mama chun kum 1912 in Baptize anachangin ahi. Hichenia Baptize achan khompichu Pu Helkhup (khonunga Pastor Helkhup) chu ahi.Mitheng Paul in "Koi hileh Christa a umchu akisemthah ahi" (II Cor. 5:17) atibangchun Pathen lhagao lamhilna hinkhothah sunga Pathen lhacha na tongdingin Pathen kouna anangah lhonin ahi. Hichelai tah chun Pathen in Isaiah themgao akoubangin Mapgam a gachea Pathen na gatongdingin kouna anachang lhonin ahi (Isaiah 6:8).
Myanmar (Burma) a akisollhon Mapgam Kuki Mission field hi Pu Tongkam Singsit akon abul kiphutdohsa ahinatoh kilhonin, Manipur Kuki Houbung kiloikhom honjong banjom a mission na tohjom theina dinghi anakhohsah un ahi. Chutichun Pu Tongkam Singsit natoh banjopdingin Pu Letjavum leh aloinu Pi Jampineng chu kum 1935 in Manipur North West Association in Mapgam a anasol kit uvin ahi.
Pu Letjavum te nupan jong amasapen in agam umdan kholtohdin Manipur gam Tongkoi2 khoa um Pu Tongkam Singsit kom a agachelhonin ojapi navahgei chun agaum lhonin ahi. Tongkoi khoa chun achanu masapen lhon Nengkholhing chu apengin ahi.
Ojapu Letjavum leh Ojapi Jampineng in Mapgam ahinjot lhonhi Pu Adoniram Judson tenupan 1813 kum a Burma Mission field ahinjot lhontobang ahi. Pu Judson tenupan akichenjoulhon sotloulai a kipana thupha jal'a apu apa chenna, gamnomtah America gam ahindalhah lhon'a gam hahsatah Burma gam ahinjotlhon a, thichan geiya Pakai na ahung tohlhon bang in Pu Letjavum tenupan jong akichenjou lhon sotloulai a Christa kipana thupha jal leh Burma gamcheng Kuki chate khohsah najal a gamnom tah Manipur phaicham leh thinglhanggam chu ahindalhah lhon ahi.
_________________________________________________________________________________
2 Tongkoi kho hi emite lah a Houbung masaloi tah in akihen, Pathen tahsan nalam a hattah ahivie. Khat vei chu Pakai Jesu Christa anivei chan a ahungding nichu anaitai tin, natong louvin ana ngah'uve tin akihei.
(2. Tongkoi Houbunghi Manipur Kuki Houbung holah a amasaloi ahin, tahsan nalam a hattah ahivie; khatve chu Christa hungnading anaitai tin natonglou'vin angah'uve tin akihei)
Hiche laitah a Mapgam cheding kitihi achehodinga kingaitomna lentah ahi. Ajieh chu mapgam hi gam hahsatah, tichu duchat khat choh a nehthei louna, deichat khatjong mujou louna, chenom na khat a jong gachenavah vah theilouna, gamlah thingnoi leh juham vaham kidang tahtah noiya, thinglhang vot kaoseu sou lah a kengjenga lamjotna, chihna lekhavah umlouna gamthip ahi. Ahin Pakai Jesu Christan "Koi hileh kanung eijui noma chun, ama kingaitom henlang, athingpel kaput henlang kanung hinjui hen" (Mk.8:34) atibangtah chun Pu Letjavum tenupan jong hahsat genthei thohding ginglouvin tahsan masateho khonung chu hangsentah in ahinjui lhonin kum 1935 chun Mapgam ahinjon lhontan ahi.
Mapgam ahunglhun lhon
Chutichun Joseph in naosen Jesu leh anu genthei tah a Igupta gamlam ajotpi bangchun, Pu Letjavum in jong kumkhat jong lhing loulai naosen Nengkholhing leh anu chu mol le lhang lah a kenglam in genthei tah in Mapgam ajotpi tan ahi. Hiche laichun Pu Thangkhojam chu Tuikol (Joujang) kho a apansan Pathen na onthotah in atongin ahi. Pu Letjavum te nupa alhunkum chun mapgam a Pathen hou mi 70 val aumtauvin ahi. Pu Letjavum tenupa vangchu Thingphaijang kho a apansalhon in natoh ahungkipan lhontai.Ojapu leh Ojapin jong khangthah hochu Thadou lekha Bul ahilpan lhonin chukalval in football, volleyball ichepdanhojong ahil lhonin, chule phat onseh leh gospel team in khovel dunga khangdong hotoh agache jiuvin hitichun thanom tahleh chimtih neilouvin Pathen nachu agammite hotoh kithokhomin ahintong lhonin ahileh phatsotlouvin houbung jong akibebe jengin ahi.
Adeh in Ojapu leh Ojapi hi school oja, lekhathem miching ahilhonjieh in government lamkai thanei hotoh jong lenkhomje, kivopje athem lhonin, Layshi sap honjong jabol nale ngailutna, khohsah na lentah anapejing jiuvin ahi.
Methodist Mission hunglut leh Houbung chehchao
Hichelai chun Myanmar (Burma) gampumpia lhumlam akon Missionary chomchom tampin na ahintongpan tan ahi. Kum 1813 kum a Baptist Mission ahung lhungbang chun kum 1887 in British
Methodist Missionary Society in Rev. G.H. Bateson chu kolgam a ahinsol un Methodist mission natoh ahinpan un ahi. Hitichun upper Burma a eimite kho, Maingdaungphai a Mission Head Quarter ahinsem un, Mission in nomtahtah, Mission school hole, hospital chule Preacher Pilhing Bible School, Mission manchah motor boats
ho geiyin pilhingtah in ahinsemun, lhacha natongho jong loman hoitahtah ahinpeuvin ahi. Methodist Missionary sappa Rev F. Kinchin chu kum 1938 in Pu Letjavum leh Pi Jampineng umna Thingphaijang ahunglhung in Baptist houbung mite lah'a na ahintongpan tauvin ahileh houbung mi tampichun Baptist Mission dalhan Methodist Mission ajop gamtau vin ahi. Methodist Mission Sapten Baptist houbung mite henga:
"Nangho Baptist te Pathen leh keiho Methodist te Pathen chu thakhat ahibou vie hijeh chun keihotoh tongkhom uhite" atiuleh Baptist houbung tamtah in jong lhagao a jong sochatna ahia, tahsa lamdol a jong phatchomna ahileh tin, Methodist Mission thahchu ajop tauvin ahi. Methodist Missionary sappa Pu Rev. F.Kinchin chun Ojapu tenupa agamudoh nichun kidang asalheh ie;ajieh chu hitobang tah a English paotho themtah mini hiche gamthipnoiya anaumding chun anagingcha pon ahi. Sappan jong Pu Letjavum tenupa chu Pathen na tohkhompi din anatemin ahi.Hichelai chun Pu Letjavum tenupan Methodist Mission chu anajop lhonleh sapten jong amaho bantah in koimai thei inte; chukal valin inchen khosah chule hinkho mandan jong nop samaithei lhonin te. Ahinla hiche phatchom ngaina hochu adalhalhonin Baptist missionary hina a thigei a tongdingin pan alajolhon tanahi. Amani chutia Baptist houbung (Mission) chunga thutah a adinlhon vangchun a houbungmite atamjo anading joupovin ahi.
Hiche houbung chehchao hi Mapgam Baptist Mission dinga nilhum kon bangchu ahin, Methodist Mission vangchu anei agouleh aloupinatoh, ahaonatoh ninou emsel hungsoh bang chu anahi. Kum 2 sunga a houbung miten mission thah ajop phat un, gol le pai chule kivoppi dingjong aumtah loujieh in Pu Letjavum leh Ojapin jong Thingphaijang chu adalha lhonin Golhangbung khochu ajonkit lhontan ahi. Golhangbung a kum 2 bang aumjou lhonin Layshi3 jonding in achekit lhontan ahi.
Mapgam a hesoh nale gentheina
Mapgam a Baptist Mission natoh nasunga Ojapu leh Ojapi dinga lhaset umtah leh gentheina sangpen chu angailut ahoubung miten ajamsen'uva, gol le pai kivoppi bei a gamthipnoi a hinkho anaman lhon, Ojapi gentheitah a ahinkhobei, chule Ojapu adammo laiya ajending leh a hinkho beinia avuiding eimi anaumlou tihohi ahi. Hitia ginchat loupettah a khopihuibanga hunglhung houbung chehchao nanikho, hichea kon'a hungpengdoh kimukhelna hohi Ojapi chun anadou lallheh ie tichu ama labol lathah bu No. 155 ah anoiya bangin akimudoh thei ie.
1. Letset chung a hin aw, chunglengva banga kalen laihin,
Eisulung jingding lhepna ahat, nung le ma chem le thal,
Ahem ie kadingin nitin in,
lungmong moleh lhamong theilou kahitai.
Pakai lungset twikhanglen gin tobang,
Hoija tham a lunglengvai le kahim?
Chung Pathen in set leichunga hin aw
A natong dinga eilhamon hi naimo?
2. Nitin in lhepna meipijing in eijin khumjeng jongle,
Pakai hatnan eikhu jing tahen;
U le nao chamdel in Christan eipeh u na tong'u te,
Pah banga I hinkhou amol kahsen.
3. Kipah in kalung penge, chungnungpen Christa kom achun;
__________________________________________________________________________________
3 Layshi hi Naga ho tamchen na khokhat ahin, solkar office umna chule molchung a um kholenthim khat ahi.
Lal loupi bon noi leiset a leng,
Christa dinga kahinkho hi genthei thohdia kaphal ie,
I lou va kei lung kisih ding kahim?
4. Letset chunga kagolte leh kajat chanpite ho chu,
I themmo nau kingaidam'u hite,
Christa lalmun loupi Salem gamnom ichan nadingun,
Khat le khat kingaidam to cheh'u hite.
Lhangpi kholui a ka le maona
Hitia Layshi jon a achate mithum (Nengkholhing, Thangkholen, Chongneikim) toh acheuva Lhangpi kholui ahinphah laitah un ojapi chu anavah phat ahunglhung in lampi a anavahden tan ahi. Ahin alunggim genthei laitah le phat hoimolai ahitoh kilhon in atha jong a lhomin hitiho jieh chun anavah namun a angailut asenji leh achate dalhan Pakai kom'a chondodin Paheng ajontai.
Ginchat louva ojapi hitia ahinkho abeiphat in Pu Letjavum jong pasal khat kisahtah hinkho mang ahivang chun thil ijakai agelleh alungsungin adoujou tapon ahi. Angailut houbung ten adalhah keu'u hilouvin, nop nale dana a golphatah a anei, angailut a senji in jong adalhah kitphat chun athoh jou himhim tapon gamthip noi achun aw thongjenjun in apengjah in, achate le aji akoi in abonun hakapin akaptauvin ahi. Hitia achate toh akagin'u chu Lhangpi hon ahingal jah un agadel
lut'u leh Ojapu leh achateni Nengkholing le Thangkholen akap pumin agamutau vin ahi. Amahon jong Ojapu chu alhamon un chule Ojapi longjongchu phaten avuitauvinahi. Hitichun, Ojapu leh chapangho chu a lhem un, ojapu vanchu abithei tapon ahi. Teijang Baptist Houbung upa Pu Mangkholal chun Ojapi chu anoiya bang in pupa lakai in la anabol in ahi (1970):
1. A. Golkhai nungteng selung hemin.
B. Chung Pathen thangvah jeila a Oiding najil Pi Jampineng.
2. A. Mano munthong lhunglou lai a.
B. Venngal nigelle seen-angkoi pa lam thongnu nasemo.
3. A. Samang jal na Lhangpi khomun.
B. Khangnoute selung lai nemhen sihtwi bangin longgom jinghen.
Pu Adoniram Judson in Chaikkhami a Pathen na atohlai tah in acha leh ajinu ahinkho abei in lunggenthei athoh lai tah in " Christa a ding hihih poupou leh" tia tha akilah a akitlung mon bangin Ojapin jong "Chrsita a dinga kapheldohsa kahinkho idinga kakisih ding ham" tin akilungmon e tichu alabol in aphonge.
____________________________________________________________________________________
( Hetding: Ojapi thidan hi hetdan kibanglou aum ie. A chanu chun anuhi naosonat a thi hilouvin, Malaria net a adammo laitah a apahi Maingdaung a um Doctor pu kou'va achekah thi in asei ie; Ahin KCBA Golden Jubilee thusim bu phengmai 8 a chun Layshi a kijendinga achelaitah Lhangpi kholui agei'uva thi in asei ie.)
Pi Jampineng chunga mudanphondoh
"Ojapi Jampineng hi ginnei loumi, thutah a dingjing mi, numei hangsentah, numei kikhal tah ahi"—Pu Palal, Kangpokpi (Lathah bu ana khomtup pa).
"Rev. William Pettigrew Missionary sappa chun athikon geiyin Pisi (Jampineng)hi ageldoh jingin, adeh in Burma akon chapangho(Pisi chate) chu agapuidoh ding phat un, amakom a ahinpui diuvin thu a lhah in ahivangin ahinpui lutpeh jou tapu vin ahi. Pisi jeh chun sapten keiho insungmite eingailu lheh jeng ui"—Pi Thangkhoneng (A'u nu), Old Lambulane, Imphal. (From Rev Yampau Interview note – 1991)
Pu Letjavum in self-support a Mission na atohjom
Pu Letjavum in jong banjom a Pathen na atohjom theinading lampi ngaitonan achate thum toh Laysi ajonpai in, Layshi ah government service (Clark) na atongin, mitheng Paul in ponbuh asem a gospel kipana thupha alhangsap bangin, amanjong sorkar natoh pumpum in on seh leh sakhol khat in khoveldung a agachen Pathen thuchu a lhangsap jom jingin ahi. Pathen natong ahijieh in agammi Para Naga honjong analungset lheh un, angailu lheh uvie.
Kitepna khon Thi geija Christa a ding
Thichangeiya Pakai lhachana atoh Kum 1941 in TB chopnat nan ojapu chu ahin sugenthei pantan ahi. Hitichun phatsot louvin angailut Kuki Baptist mission field leh achate thum dalhan aji umnamun Pakai kom a choldodin achetan ahi. Pu Letjavum, Christa sepai galhangtah long chu Naga hon phatea avuikeu'u hilouvin, adalhah achate mi 3 jong lhasam louvin anasin un ahi. Apa hinkho bei chungchanga achapa Thangkholen thusei doh:
"Keiman kapa athi in kanagel poi, Pathen thusei a gamchom a chen kanagelgel ie; mihon napa athitai atiu chun katahsan theipon ahi". ati.
(from Rev. Yampau interview note, 1991).
Teijang Baptist Houbung upa Pu Mangkholal chun kum 1997 in pupa lakai in anoiya bangin Pu Letjavum analachoi in ahi:
1. A. Selunglenge kolkim vella.
B. Venngai nigeltoh lonlhi puma Layshi ma nano Pu Letjavum.
2. A. Limkhom piding golle heova.
B. Nitin sanggat lenpuldou-a thimang najin Layshi gamlei.
3. A. Nalong damsa lhenem huiding.
B. Laijon cheng la gamvang lata veigam Hammolten pemang jil.
4. A. Lhaulha kidding khojang tonan.
B. Veigam lei a hinkhal sunga Genthei a nahung bol em.
5. A. Nungteng neugol lunglai gil a.
B. Lhaulha lengthei khojang tona kumsot Kaitwi chan longhen.
Sangget kile joulou chapangho
Pu Letjavum ahikho abeitai tithu Manipur State, Malungdai khoa cheng aupa Pu Ngultong in ajahdoh phat in kum 1947 in Mapgam (Burma) ah agachen chapang chaga thum chu agakipui tan ahi. Malungdai alhunjou'u phat sotlou vin a nao'u aneupen Chongneikim ahinkho abeikit in ahi.
Hitia kumthum bang achenjou un achennau inchu mei in ahinkan ahileh chengenthei ahungkipantan ahi. Hitia a'u nutoh achen genthei laitah lhon thusim chu Pu Thangkholen chun hitin avel seidoh in ahi:
"Ka u Nengkholhing in ponve khatbou anei ahin, janteng Sanget kilelou hiche ponve chu keima eisil peh jin ama anihtoh ithingdetdet in alum jin ahi. Neh ding aumjongleh kihom deldel in kanekhom ji lhon in, hitichun lhi le nap pumin hinkho kanamang lhon ie; ka u Nengkholhing hi gentheina sangbeh seh hih leh baitah in jinei ponte" ati.
(From Rev Dr. YamPau interview note – 1991).
Chapangho gentheina asanbehseh jiehchu apu Pu Jamkithang, Tamainglon C.O chun chenkhom pidingin agakipui in ahi. Chen genthei jeh-in kum 1955 in Ng. Nengkholhing hi Burma gam Tamu a um apu Mangkolthang Sitlhou kom ah kumkhat agacheng in ahi. Akhove in a amajong a jinei paipai tai.
Thangkholen vang chu government chaga school (Adimjati Sikhsa Asharam), Imphal a kum 1956 in lekha anasim penin ahi. Niseh leh a u nu ngai jing a kapkap jin ahi. March 17, 1957 kumin Churachanpur a um Imphal branch (Asharai) a class V gei asim kitin, kum 1965-66 chun class VII-VIII gei N.G High school a asimin ahi. Kum 1968 in class IX CCpur High School akai jouvin Sgunu High school a class X akaijom in ahin analolhing jou tapoi.
Pu Thangkholen in education lamdol a aseidoh khatchu: "Kapa leh kanu hi lekhathem anahilhon in keiho achaten amani dinmun cha jong phajou loudinga kaum diuhi nasa kasalheh in ahi" ati. (From Rev Yampau interview note 1991). Anu le apan gospel kipana thupha jal'a adalhah lhon chapang genthei hohi Mapgam a cheng Kuki Houbung miteleh Missionary dinga ahinsoldoh Manipur North West Association in avetsui joulou vangin Pathen milungset khoto themtah chun hiche chapangho hi avejingin adalhapoi. Pi Nengkholhing jong Sgunu ah phaten ajinei in, Pu Thangkholen jong Class ten asim jouvin Churachanpur College a na atong panin, hiche lekhajihpa toh akimuto laichun College a Laboratory Assistant in apangin ahi. Pi Nengkholhing hi tulai tah in akum 65 bang ahitai.
KCBA in Ojapu Letjavum leh Ojapi Jampineng dinga lhan asem
KCBA in jong aphatdung juiyin Ojapu leh Ojapi chunga tohding kintampi leh khankho aphatchan anatho jouhih'u jongle khonungin abanban in tohdinga lom kinho anatongchai un ahi. Kum 1997 in Ojapu le Ojapi lhansemna akibol in geldohna molsong chu Lhangpi Kholui, Thingnel lamka a anakiphut in ahi. Chukal val'in kum 1996 in Ojapu phatea anavui a achate anasin, Layshi a um Para Naga hokom a jong kipathu agasei un ahi. 4 Tomponho jong Rev. C. Yam Kho Ngam lamkainan achapa Pu Thangkholen kom a agathahlut un ahi. Pu Letjavum chunga thivui kin hihen chapangte ho chunga kinlah na hijongleh kin hinla Layshi a um sopi Naga ho kom'a kipathuseina jong anabol un ahi. Lhansem nia Pu Chongkholet Manli in alachoina:
Pi Jampineng lhansem nia lachoi na:
A. Navui saichung Jampineng.
B. Neogol chengto namin thei thijang kalouvie.
A. Lhaulha sehin O chinnigel.
B. Nalel thimthu Zouchang pha bang gamkom lot.
A. Setlei gamkom lodenta.
B. Chung Pathen selung lhaina Limsolang hinkhun.
A. Jampineng le Letjavum.
B. Mangthei louding nakhankho KCBA lunglai a.
( Labol: Ngamkholun, Manli )
__________________________________________________________________________________
4 KCBA Golden Jubilee thusim bu (2008), p.5
A. Nigel khangjing hungthou vo.
B. KCBA lumsong tun naselung lhai nam?
A. Pupa selung moljong le.
B. Jeila'n navang kalhem ie, naselung lhainam?
A. Umi lhaolha sehih o.
B. Natoi sahlhong kaphongnai KCBA ten.
Thuchai na
Pu Tongkam Singsit, Pu Letjavum Sitlhou le aloinu Pi Jampineng (Pisi) hinkho leh anatohnau thusim lahgom vangchu akijih chaitan ahi. Ahin amahon a hinjih pat'u hiche Kuki Baptist houbung thusimhi banjom a akhangmiten ajihjom diubou kin anei un ahi. Pathen in adinga gospel galsat phatah mithum ho genthei na,lhilonna, kana hohi sumil pontin, chule gospel kipana thupha jal'a tahsa jengjong muchitu a hintulut teho jal' in Burma Kuki Baptist mission hi nikho khat leh Pathen in a sen sangget ahinkiledoh sahding ahitichu kinepumtah ahi. Tunia "Kuki Chin Baptist Association (KCBA)" vanghi Pu Letjavum chatebanga sanget kileloulai ahinalai ie. KCBA President pu Pu Rev. Daniel Paokholet chun hiti hin Houbung chaget la anabol in ahi.
1. A. Hinve temmo Chung Pathen.
B. KCBA sen sangget mel munan nate.
2. A. Sen sangget mel a namu leh.
B. Hamjang phat na silpon lhenem chan hinhui yin.
3. A. Silpon lhenem chan hinhui yin.
B. KCBA sangget mel kile nadin.
4. A. Sen sangget mel kile hen.
B. Namtin lai a Jing ninouchan emsil sel hen.
5. A. Jangphol meibang ka an ie.
B. Pengthah golnou cheng vang sonnan Ka an ie.
"Mitlhi pumpuma muchi tuten, kipah thanomin aga kilo'u hen! Akap pumpum a muchitu ding poa vaikon chu, a changpal kipoh-in kipah thanomin inlam hinjon hen! (Psalms 126: 5,6).
Ojapu leh Ojapi thusim akon kihilnathei tampijong akimudoh thei ie. Kolgam Kuki Baptist Houbung lhahsap hungkipat nahi gamsung houbung miten houbung leh Pakai lhacha natongte chunga thutah a dinjoulou na; Pathen houleh phatchom ngaikop na; khankho thoding tampi suhmil na; hitiho jeh-ahiti akimudoh thei ie.
Hitiho akon kikangsedoh theinadin "Mimasa teho khonung" jui angai ie. Pathen in a lhachateni kinepna bangin Myanmar Kuki Baptist Mission hi jing ninoubangin emsel in a loupinadin dongsang jing tahen.
Reference:
1. KCBA Silver Jubilee Thusim (1983)
2. Interview sources by Rev. Dr Yam Kho Pau (1991) &
3. Evan. Haopao Haokip (2009)
4. KCBA Men Department, Pupa Lakai a kiso Labu
5. KCBA Golden Jubilee Thusim Bu (2008)
6. Christian Lathah Bu
~ KUKI NEWS 📫
.jpeg)
